ރާއްޖެ އާއި ތަޖިސްކިސްތާނާ ދެމެދު ވިސާ އެގްޒެމްޝަން އެއްބަސްވުމެއްގައި މިއަދު ސޮއިކޮށްފި އެވެ.

އެމެރިކާގެ ނިއުޔޯކުގައި ކުރިއަށްދިޔަ ރަސްމިއްޔާތެއްގައި އެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ އދ. އަށް ކަނޑައަޅުއްވާފައި ހުންނަވާ ރާއްޖޭގެ ދާއިމީ މަންދޫބު ޑރ. އަލީ ނަސީރެވެ. އަދި ތަޖިކިސްތާނުގެ ފަރާތުން ސޮއިކުރެއްވީ އެ ސަރުކާރުން އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބު ހިޒް އެކްސަލަންސީ ހިކްމަތު ޖޮނިބެކް އިސްމޮއިލް އެވެ.

ފޮރިން މިނިސްޓްރީން ބުނީ އެ އެއްބަސްވުމައި ސޮއިކުރުމާ އެކު މިހާރު ވެސް އަމަލުކުރާ ޔުނިލެޓަރަލް ވިސާ-ފްރީ ރެޖީމްގެ ދަށުން ވިސާއާ ނުލާ 30 ދުވަހުގެ މުއްދަތަށް ދެ ގައުމުގެ ރައްޔިތުންނަށް ދަތުރުކުރުމަށް އޮންނަ އުސޫލު ދާއިމީ ވެގެންދާނެ ކަމަށެވެ.

ރާއްޖެއިން މި މަހު ޑިޕްލޮމެޓިކް އަދި އޮފިޝަލް ޕާސްޕޯޓު އޮންނަ ދިވެހިންނަށް ވިސާއަކާ ނުލައި އަޒަރުބައިޖާނަށް ދަތުރު ކުރުމުގެ ހުއްދަ ލިބޭ އެއްބަސްވުމެއްގައި ވެސް ވަނީ ސޮއިކޮށްފަ އެވެ.

އެ އެއްބަސްވުމުގެ ދަށުން އޮފިޝަލް އަދި ޑިޕްލޮމެޓިކް ޕާސްޕޯޓު އޮންނަ ދިވެހިންނަށް އަޒަރުބައިޖާނަށް ވިސާއަކާ ނުލައި ދަތުރުކޮށް، 90 ދުވަސް ވަންދެން އެ ގައުމުގައި ހުރެވޭނެ ކަމަށް ފޮރިން މިނިސްޓަރީން ބުންޏެވެ.

ރާއްޖެއިން ގިނަ ގައުމުތަކަކަށް އޮން އެރައިވަލް ވިސާގެ ފުރުސަތު ލިބެ އެވެ. މި ވޭތުވި އަހަރުތަކުގެ ތެރޭގައި މި ލިސްޓަށް ގިނަ ގައުމެއް އިތުރުވެފައި ވެ އެވެ.