ރާއްޖޭ މާކެޓުން ސާމްޕަލް ނަގައި ސްކްރީންކުރި ދެ ބޭހަކުން ކެމިކަލްގެ މާއްދާއެއް ކަމަށްވާ ޑައިތައިލިން ގްލައިކޯލް (DEG) އަދި އިތައިލީން ގްލައިކޯލް (EG) އަށް ޕޮޒިޓިވްވެފައިވާކަން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފި އެވެ.

އެމްއެފްޑީއޭއިން ބުނީ ކެމިކަލް ފެނުނީ ޕާކިސްތާނުގެ އެފްރޯޒް ކެމިކަލް އިންޑަސްޓްރީސްއިން އުފައްދާ މެފްނެކް ސުސްޕެންޝަންގެ 50 މިލިގްރާމް (މެފެނަމިކް އެސިޑް) އަދި މެލޭޝިއާގެ ކޯޓްރާ ފާމާއިން އުފައްދާ އެކްސެލް މެފެނެމިކް އެސިޑް ސަސްޕެންޝަން 125 މިލިގްރާމް (މެފެނެމިކް އެސިޑް) ކަމަށެވެ.

އެގޮތުން އެ ދެ ބޭހުގެ ކޮންފާމެޓްރީ ޓެސްޓު ހެދުމަށް ރާއްޖެއިން ބޭރަށް ފޮނުވުމުގެ މަސައްކަތް ކުރަމުންދާ ކަމަށް ވެސް އެ އޮތޯރިޓީން ބުންޏެވެ.

އެމްއެފްޑީއޭއިން ބުނީ އެ އޮތޯރިޓީން ވަކި ގޮތެއް އަންގަންދެން އެ ދެ ބޭސް ރާއްޖެއަށް އެތެރެކުރުމާއި، ވިއްކުމާއި ބޭނުން ކުރުން ވަގުތީ ގޮތުން މަނާ ކޮށްފައިވާ ކަމަށެވެ.

އެހެންކަމުން މިވަގުތު ބޭސްފިހާރަތަކާއި ބޭސް ގުދަންތަކުގައި ހުރި އެ ދެ ބޭސް ސްޓޮކާއި ވަކިކޮށް ބެހެއްޓުމަށް ވެސް ވަނީ އަންގާފަ އެވެ.

ބޭސް ވިއްކާ، ބޭސް ގަންނަ އެންމެހާ ރައްޔިތުން އެކަމަށް ހާއްސަ ސަމާލުކަމެއް ދިނުމަށް އަދި އިތުރު މައުލޫމާތު ހޯދަމަށް ހޮޓްލައިން 7200321 ނަންބަރަށް ގުޅުމަށް އެމްއެފްޑީއޭއިން ވަނީ އެދިފަ އެވެ.