ހައުސިން ޑިވެލޮޕްމެންޓު ކޯޕަރޭޝަން (އެޗްޑީސ) އިން އިންތިޒާމު ކުރި މޮނިއުމެންޓު ޑިޒައިންކުރުމުގެ މުބާރާތުން އެއްވަނައަށް ހޮވުނު ހުށަހެޅުންތަކަށް އާންމުންގެ ފާޑުކިޔުން އަމާޒުވުމުން، އެ ޑިޒައިންތައް ރިވިއު ކުރަން ފަށައިފި އެވެ.

އެޗްޑީސީން މިއަދު މިއަދު ކުރި އިއުލާނެއްގައި ބުނީ ޑިޒައިންތައް ރިވިއު ކުރަނީ މުބަރާތުން އެއްވަނައަށް ހޮވުނު ހުށަހެޅުމަކީ އޭއައި ޖެނެރޭޓެޑް ޑިޒައިންތަކެއް ކަމަށް ބުނެ އާންމުން ފާޑުކިޔަމުން ދާތީ ކަމަށެވެ.

"ދެންނެވުނު މުބާރާތުން އެއްވަނައަށް ދިޔަ މޮނިއުމެންޓު ޑިޒައިންތަކަކީ އޭއައި ޖެނެރޭޓެޑް ޑިޒައިންތަކެއް ކަމަށް ބުނެ އާންމުންގެ ޝަކުވާ މި ކޯޕަރޭޝަނަށް ލިބުމާ ގުޅިގެން އެ ޝަކުވާތައް އިތުރަށް ބަލައި ބަނަ ލިބުނު ޑިޒައިންތައް ރިވިއު ކުރުމުގެ މަސައްކަތް މި ކޯޕަރޭޝަނުން ކުރަމުން އަންނަ ވާހަކަ ދަަންނަވަން،" އެޗްޑީސީގެ ބަޔާނުގައި ބުންޏެވެ.

މޮނިއުމެންޓު ޑިޒައިން ކުރުމުގެ މުބާރާތެއް އެޗްޑީސީން އިންތިޒާމު ކުރީ ހުޅުމާލޭގެ 17 ސަރަހައްދެއްގައި ބަހައްޓަން އެ ކޯޕަރޭޝަނުން ނިންމާފައިވާ މޮނިއުމެންޓުތަކަށް ޑިޒައިންތަކެއް ހޯދުމަށެވެ. އެޗްޑީސީން އެ މުބާރާތް އިއުލާނު ކުރީ ސެޕްޓެމްބަރު 24، ގަ އެވެ.

އެޗްޑީސީގެ ބަޔާނުގައި ބުނީ މުބާރާތުގެ ސުންގަޑި ހަމަވިއިރު، ޑިޒައިން ހުށަހެޅީ ޖުމުލަ ހަތް ފަރާތަކުން ކަމަށެވެ. އަދި އެ ހުށަހެޅުންތަކަށް ބަލައި ވަނަ ދިނީ އެޗްޑީސީގެ ޕްރޮފެޝަނަލް ސްޓާފުންގެ ޕެނަލަކުން އިވެލުއޭޓު ކުރުމަށްފަހު ކަމަށެވެ.

އެޗްޑީސީން ބޭއްވި މޮނިއުމެންޓު ޑިޒައިން ކުރުމުގެ މުބާރާތުން އެއްވަނައަށް ހޮވުނީ އަބްދުﷲ ޝައިމާން ވަހީދު އާއި އިބްރާހިމް އިފާޒްގެ ޓީމް އާކޯސް އެވެ.

"މި މުބާރާތުގެ މަގުސަދަކީ ހުޅުމާލޭގެ ތަރައްގީއަށް މި ކޯޕަރޭޝަނުން ކުރަމުން އަނަން މަސައްކަތުގައި ދިވެހި ފަންނުވެރިންގެ ހިޔާލާއި ވިސްނުން ހިމެނުން ކަމުގައި ވާތީ، މިފަދަ މުބާރާތްތަކުގައި ދިވެހި ފަންނުވެރިންނަށް ފުރުސަތު ނުލިބޭ ގޮތަކަށް މި ކޯޕަރޭޝަނުން އަމަލު ނުކުރާނެ ވާހަކަ ވެސް ދެންނެވިން،" އެޗްޑީސީގެ ބަޔާނުގައި ބުނެފައިވެ އެވެ.