މަޖިލީހުގެ އަމީންއާންމުގެ މަގާމުގައި ހުންނެވި، ފާތިމަތު ނިއުޝާ އާއި ކައުންސެލް ޖެނެރަލްގެ މަގާމުގައި ހުންނެވި، ފާތިމަތި ފިލްޒާ އަދި ސާޖެންޓް އެޓް އާމްސްގެ މަގާމުގައި ހުންނެވި މޭޖާ ރިޓަޔަޑް ތަލްހަތު ހަސަން އެ މަގާމުގައި ބަހައްޓަން މަޖިލީހުން ފާސްކޮށްފި އެވެ.

އެ ތިން ބޭފުޅުން އެ މަގާމުގައި ބޭތިއްބުމާ މެދު ގޮތެއް ނިންމުމަށް މަޖިލީހަށް ހުށަހެޅީ މަޖިލީހުގެ ގަވާއިދުގައި ބުނާ ގޮތުގެ މަތީންނެވެ.

މަޖިލީހުގެ ގަވާއިދުގައި ބުނެފައި ވަނީ، ގަވާއިދަށް އަމަލު ކުރަން ފަށާތާ ދެ ދައުރު ހަމަވުމުގެ ކުރިން މަޖިލީހުން އެހެން ގޮތަކަށް ކަނޑަނާޅާހައި ހިނދަކު ހިނގަމުންދާ މަޖިލީހުގެ އަމީންއާންމާއި ކައުންސުލް ޖެނެރަލް އަދި ސާޖެންޓު އެޓް އާމްސްގެ މަގާމަށް މީހުން އައްޔަނު ކުރަންވާނެ ކަމަށެވެ.

އެ ތިން މީހުންނަށް ވެސް މަގާމު ލިބުނީ މަޖިލީހުގައި ލިބުނު ވޯޓަކުން ފާސްވެގެންނެވެ. ނިއުޝާ މަގާމުގައި ބަހައްޓަން 79 ވޯޓު ލިބުނެވެ. ފިލްޒާއަށް 80 ވޯޓު ލިބުނެވެ. ތަލްހަތަށް އަނެއްކާ މަގާމު ލިބުނީ 80 ވޯޓުންނެވެ.