އެޖެންޑާ ކޮށްފައިވާ މަސައްކަތްތައް ހާމަނުކޮށް މިނިވަން މުއައްސަސާތަކުގެ ކޮމިޓީގެ މިއަދުގެ ބައްދަލުވުން ވެސް ސިއްރުކޮށްފި އެވެ.

ބައްދަލުވުމަށް ހާޒިރުވި މެންބަރުންގެ ތަފުސީލު ހާމަކުރުމަށްފަހު މުގައްރިރު ވަނީ ބައްދަލުވުން ކުރިއަށް ގެންދާނެ ގޮތެއް ނިންމުމަށް އެދިފަ އެވެ. އާންމުކޮށް ކޮމިޓީ ބައްދަލުވުމެއް ސިއްރުކުރުމުގެ ކުރިން އެ ދުވަހު ކުރާ މަސައްކަތެއް ހާމަކުރެ އެވެ.

މިއަދުގެ ކޮމިޓީ ސިއްރުކުރަން ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފު އެވެ. އެ ހުށަހެޅުމަށް ތާއީދުކުރެއްވީ ކޮލަމާފުށީ ދާއިރާގެ މެންބަރު އިބްރާހިމް ދީދީ އެވެ. ހުށަހެޅުން ފާސްވީ ކިތައް ވޯޓުން ކަމެއް ސާފެއް ނޫނެވެ.

މިނިވަން މުއައްސަސާތަކުގެ ކޮމިޓީން މިހާރު ބަލަމުންދާ މައްސަލަތަކުގެ ތެރޭގައި ސިވިލް ސާވިސް ކޮމިޝަން (ސީއެސްސީ)ގެ ރައީސް މުހައްމަދު ނާސިހާއި އިލެކްޝަންސް ކޮމިޝަން (އީސީ)ގެ މެންބަރުން އަލީ ނަޝާތާއި މުހައްމަދު އާސިފުގެ އިތުރުން އެންޓި ކޮރަޕްޝަން ކޮމިޝަން (އޭސީސީ)ގެ މެންބަރު ތޯހާ މުހައްމަދުގެ އިތުބާރު ނެތްކަމުގެ މައްސަލަ ހިމެނެ އެވެ.

އޭގެއިތުރުން, މިދިޔަ މަހު މޯލްޑިވްސް މީޑިއާ ކައުންސިލު (އެމްއެމްސީ) އިން ދިން ނޫސްވެރިކަމުގެ އެވޯޑުގެ މައްސަލައަކާއި ރައީސް އޮފީހުން ހުށަހެޅި މައްސަލަތައް ނުބަލާ ކަމަށް ބުނެ އެ އޮފީހުން ހުށަހެޅި މައްސަލަވެސް ހިމެނެ އެވެ.

އެވޯޑާ ގުޅިގެން ބަލަމުންދަނީ 11 ވަނަ ނޫސްވެރިކަމުގެ އިނާމުގައި އަދަދު ނޫހުން ތައްޔާރުކުރި "ސްކީލާން" ޑޮކިއުމެންޓަރީއަށް ލިބުނު އެވޯޑާ ގުޅޭ މައްސަލަ އެކެވެ. އެ މައްސަލާގައި އެމްއެމްސީގެ އިތުރުން އިނާމަށް އިންސާފުކުރި ފަނޑިޔާރުންވެސް ހާޒިރުކުރަން ވަނީ ނިންމާފަ އެވެ.