ބޮޓްސްވާނާ އިންޓަނޭޝަނަލް ބެޑްމިންޓަން މުބާރާތުގެ އަންހެން ސިންގަލްސް ފައިނަލުގައި ރާއްޖޭގެ ރިވައިވަލް ސްޕޯޓްސް ކްލަބުން ވާދަކުރާ ގައުމީ ބެޑްމިންޓަން ޓީމުގެ ދެބެން ކަމަށްވާ، އައިމިނަތު ނަބީހާ (ނަބީ) އާއި ފާތިމަތު ނަބާހާ (ނަބާ) ވާދަކުރަން ޖެހިއްޖެ އެވެ.

މީގެ ކުރިން ނަބާ އާއި ނަބީ ވަނީ ގައުމީ ފައިނަލުގައި ބައްދަލުކޮށްފަ އެވެ. އިންޓަނޭޝަނަލް ފައިނަލެއްގައި މިއީ މި ދެބެން އެއް ކުޅުންތެރިއަކު އަނެއް ކުޅުންތެރިއަކާ ދެކޮޅަށް ކުޅޭ ފުރަތަމަ ފަހަރެެވެ.

މިއީ، ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން ރުހުންދީފައިވާ މުބާރާތެއްގެ ސިންގަލްސް އިވެންޓެއްގެ ފައިނަލުގައި ރާއްޖޭގެ ކުޅުންތެރިން ވާދަކުރާ ފުރަތަމަ ފަހަރެވެ. މީގެ ކުރިން، ރާއްޖޭން ފައިނަލުގައި މުޅިން ވެސް ކުޅެފައިވަނީ، ޑަބަލްސް އިވެންޓްތަކުގަ އެވެ.

ބޮޓްސްވާނާ މުބާރާތުގެ އަންހެން ސިންގަލްސް ސެމީ ފައިނަލުގައި، ނަބާ އާއި ނަބީ ވެސް ވާދަކުރީ އަޒަރުބައިޖާންގެ ދެ ކުޅުންތެރިންނާ އެވެ.

އެ ގޮތުން، ނަބާ ސެމީ ފައިނަލުގައި ކުޅެފައިވަނީ، އަޒަރުބައިޖާންގެ ހާޖަރު ނުރިޔޭވާއާ ދެކޮޅަށެވެ. އެ މެޗުން ނަބާ މޮޅުވީ ސީދާ ދެ ސެޓުންނެވެ. ދާދި ފަހުން، ނިމުނު ޒެމްބިއާ އިންޓަނޭޝަނަލް މުބާރާތުގައި ތިން އިވެންޓުން ވެސް މެޑަލް ހޯދި ނަބާ ވަނީ 21-15، 21-15 އިން ހާޖަރު ނުރިޔޭވާ ބަލިކޮށްފަ އެވެ. ނަބީ ނުކުތީ ސެމީ ފައިނަަލުގައި، ދެ ވަނަ އަށް ސީޑުކޮށްފައިވާ، އަޒަރުބައިޖާންގެ އީރާ މަފްތުހާއާ ދެކޮޅަށެވެ. ތިން ސެޓު ކުޅެން ޖެހުނު މި މެޗުގެ ފުރަތަމަ ސެޓު، 21-12 އިން ނަބީ ގެންދިޔަ އެވެ. އެކަމަކު، ދެން ކުޅުނު ސެޓު، 20-22 އިން ގެންގޮސް ނަތީޖާ ނެރޭ ސެޓަަކަށް މެޗު ދިޔަ އެވެ. މި ސެޓުން ނަބީ މޮޅުވީ، 21-08 އިންނެވެ.

ނަބީ ވަނީ މީގެ ކުރިން، 2019 ވަނަ އަހަރު ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ އަންހެން ސިންގަލްސް އިން ރަން މެޑަލް ހޯދައިފަ އެވެ. ނަބާ ވަނީ މީގެ ކުރިން ދާދި ފަހުން ނިމުނު، ޒެމްބިއާ މުބާރާތުގެ އަންހެން ސިންގަލްސްގެ އިތުރުން މިދިޔަ، އަހަރު އޮސްޓްރޭލިއާގެ ސިޑްނީ އިންޓަނޭޝަނަލް އިން ލޯ މެޑަލް ހޯދައިފަ އެވެ.

ބޮޓްސްވާނާ މުބާރާތުގެ އިތުރު ތިން ފައިނަލުގައި ރާއްޖޭން ވާދަކުރުމުގެ ފުރުސަތު އެބައޮތެވެ. އެއީ، ފިރިހެން ޑަބަލްސް، އަންހެން ޑަބަލްސް އަދި މިކްސް ޑަބަލްސް އިވެންޓްގަ އެވެ. އެ ގޮތުން، ފިރިހެން ޑަބަލްސް ސެމީ ފައިނަލުގައި ޒަޔާން ޒަކީ އާއި ނިބާލް އަހުމަދުގެ ޕެއާ އިން ކުޅެނީ، އަޒަރުބައިޖާންގެ އާގިލް ގަބީލޯވް އާއި ޑިކީ ޑްވީ ޕަންގެސްޓޫގެ ޕެއާއާ އެވެ. އަންހެން ޑަަބަލްސް ސެމީގައި، ނަބާ އާއި ނަބީގެ ޕެއާ އިން ބައްދަލުކުރަނީ، ޒެމްބިއާ މުބާރާތުގެ ފައިނަލުގައި އެ ޕެއާ އަތުން ބަލިވި، ސްރީ ލަންކާގެ ހަސީނީ އަމްބަލަންގޮޑަގޭ އާއި ހަސާރާ ވިޖަރަޔަތުނޭގެ ޕެއާއާ އެވެ. އަދި މިކްސް ޑަބަލްސްގައި ޒަޔާން އާއި ނަބާގެ ޕެއާ ސެމީގައި ކުޅެނީ، އަޒަރުބައިޖާންގެ ޖާހިދު އަލްހަސަނޯފް އާއި ހާޖަރުގެ ޕެއާއާ އެެވެ.