ޕާޓީ ބަދަލުކޮށްފިނަމަ ނުވަތަ ޕާޓީއިން ވަކިކޮށްފި ނަމަ މަޖިލިސް މެންބަރުކަން ގެއްލޭގޮތަށް ގާނޫނުއަސާސީއަށް ގެންނަން ހުށަހަޅާފައި އޮތް އިސްލާހު ފާސްކުރަން ދޭ ވޯޓަކީ މަޖިލިސް މެންބަރުންގެ ސިޔާސީ ކެރިއަރު ކަފުންކޮށް ވަޅުލަން ދެވޭ ވޯޓެއް ކަމަށް ޕީޕީއެމަށް ނިސްބަތްވެވަޑައިގަންނަވާ އަމިއްލަ މެންބަރު، އަބްދުއްރަހުމާން ވިދާޅުވެއްޖެ އެވެ.

ގާނޫނުއަސާސީގެ މައިގަނޑު ފަސް މާއްދާއަކަށް އިސްލާހު ގެންނަން ސަރުކާރުން މަޖިލީހަށް ހުށަހަޅާފައިވާ ބިލަށް ބަހުސް ކުރައްވަމުން އަބްދުއްރަހުމާން ވަނީ މަޖިލިސް މެންބަރުންގެ ހުވާގެ މަތިން ހަނދުމަ އައު ކޮށްދެއްވައިފަ އެވެ.

"އަދި މިކަން މިގޮތަށް ފާސް ކުރުމަށް ތިޔަ ދެއްވާ ވޯޓަކީ ތިޔަ ބޭފުޅުންގެ ސިޔާސީ ކެރިއަރު ކަފުންކޮށް ވަޅުލަން ސައްދޯކަށް ޖަހާނެ ފަހު މޮހޮރު ކަމުގައި ދަންނަވަން، އަދި ނިންމައިލަމުން ވެސް ތިޔަ އިއްޒަތްތެރި މެންބަރުންނަށް މިތަނަށް ވަދެ ކޮށްގެން ތިޔަ ތިއްބެވި ހުވާ މަތީގައި އިއްޒަތާ އެކީގައި އިހުލާސްތެރިކޮށް ތިބެ ބަޓަނަށް އޮބުމަށް ވެސް ގޮވައިލަން،" އަބްދުއްރަހުމާން ވިދާޅުވި އެވެ.

ގާނޫނުއަސާސީއަށް އިސްލާހު ގެންނަން ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހަޅާފައިވާ ބިލުގައި އޮތް ގޮތުން "ސިޔާސީ ޕާޓީގެ މެންބަރަކު ގާނޫނުގައިވާ ގޮތުގެ މަތިން" ވަކިކޮށްފި ނަމަ މެންބަރުކަމުން ވަކިވާނެ އެވެ.

އަދި ޕާޓީއަކަށް ނިސްބަތްނުވާ މެންބަރަކު ޕާޓީއަކަށް ސޮއިކޮށްފި ނަމަވެސް މަގާމުން ވަކިވާނެ ކަމަށް އެ އިސްލާހުގައި ބަޔާން ކޮށްފައިވެ އެވެ.

އެކަންކަމަށް އިޝާރާތްކޮށް އަބްދުއްރަހުމާން ސިފަ ކުރެއްވީ ގާނޫނުއަސާސީއަށް ގެންނަން ހުށަހަޅާފައިވާ އިސްލާހަކީ "ދަންމަޅި" އެއް ކަމަށެވެ.

"އަޅުގަނޑު ތިޔަ ހުރިހާ އިއްޒަތްތެރި މެންބަރުންގެ ކިބައިން މި ދަންމަޅި ކަރަށް މަހައި ނުލައި ހަމައެކަނި ދިވެހިރައްޔިތުންގެ ހިދުމަތުގައި ދިވެހި ރައްޔިތުންގެ ހައްގުގައި ތިބޭ ބަޔަކަށް ވުމަށް އާދޭހާއެކު އަޅުގަނޑު ދަންނަވަން، އަޅުގަނޑުމެން އިސް ކުރަންޖެހޭނީ އަޅުގަނޑުމެން ކުރި ހުވަޔާ އެއްގޮތަށް ދިވެހިރައްޔިތުން، މި ގައުމުގެ އެންމެ އިސް މަސްލަހަތު، ޕާޓީ ނުވަތަ ޕާޓީ ބޮޑުންގެ މަސްލަހަތެއް ނޫން،" އަބްދުއްރަހުމާން ވިދާޅުވި އެވެ.

މީގެ ކުރިން މިފަދަ ގޮތަކަށް ފަރުމާކޮށްފައި އޮތް ގާނޫނެއް ކުރީގެ ރައީސް އަބްދުﷲ ޔާމީންގެ ވެރިކަމުގައި ފާސް ކުރި އެވެ. އެ ގާނޫނު ފާސް ކުރީ ރެޓްރޯސްޕެކްޓިވްކޮށް އަމަލު ކުރެވޭ ގޮތަށް، ގާނޫނު ފާސް ކުރުމުގެ ކުރިން ޕާޓީން ވަކިވި ނުވަތަ ވަކިކޮށްފައިވާ މެންބަރުންގެ ވެސް ގޮނޑި ގެއްލޭ ގޮތަށެވެ.

އެ ގާނޫނުގެ ދަށުން އެއިރު ޕީޕީއެމް އިން ވަކިވި 12 މެންބަރެއްގެ ގޮނޑި ގެއްލުނެވެ. އެކަމަކު، ވެރިކަން ބަދަލުވުމުން އެ ގާނޫނު އުވައިލީ އެވެ.