މަޖިލިސް މެންބަރުން ޕާޓީ ބަދަލުކޮށްފިނަމަ ނުވަތަ ޕާޓީން ވަކިކޮށްފި ނަމަ ގޮނޑި ގެއްލޭ ގޮތަށް ގާނޫނުއަސާސީ ބަދަލު ކުރުމަށް ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ހުށަހެޅި ބިލާ ގުޅިގެން އެ ޕާޓީގެ މަޖިލިސް މެންބަރުންގެ މެދުގައި ކަންބޮޑުވުންތަކެއް އޮއްވައި އެއްވެސް މެންބަރަކަށް ދެރަ ގޮތެއްވުމުގެ ފުރުސަތު ނުދޭނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ޕީއެންސީގެ މަޖިލިސް މެންބަރުން ތިއްބަވާ ވަޓްސްއަޕް ގްރޫޕަކަށް ރައީސް މުއިއްޒު ފޮނުއްވި މެސެޖެއްގައި ވިދާޅުވީ ޕާޓީގެ ރައީސްގެ ގޮތުގައި އެމަނިކުފާނު ހުންނެވި ހިނދެއްގައި މަޖިލިސް މެންބަރުންގެ ތެރެއިން އެއްވެސް މެންބަރަކާ މެދު ތަފާތުކޮށް ދެރަގޮތެއްވިޔަ ނުދޭނެ ކަމަށެވެ.

"ޕާޓީގެ ރައީސްގެ ގޮތުގައި އަޅުގަނޑު ހުރިހާ ހިނދަކު ތިޔަ ހުރިހާ އިއްޒަތްތެރި މަޖިލިސް މެމްބަރުންގެ ތެރެއިން އެއްވެސް މެމްބަރަކާ މެދު ތަފާތު ކުރުމެއް, ދެރަ ގޮތެއް, ބޭއިންސާފު ކަމެއް ކުރުމަކަށް ފުރުސަތު ނުދޭނެ ކަމުގެ ޔަގީންކަން އަޅުގަނޑު އަރުވަން،" ރައީސް ވިދާޅުވި އެވެ.

އެމަނިކުފާނަށް މެންބަރުން އިތުބާރު ކުރައްވާނެ ކަމަށް ޔަގީންކުރައްވާކަން ފާހަގަކުރައްވާ ރައީސް މުއިއްޒު ވިދާޅުވީ އެގޮތަށް ދެންނެވީ މެންބަރުންގެ މެދުގައި އެކަމާ ގުޅިގެން ކަންބޮޑުވުންތަކެއް އޮތްކަން ހިއްސާ ކުރައްވާފައިވާތީ ކަމަށެވެ.

އޭގެއިތުރުން އަބަދުވެސް ޕީއެންސީގެ މެންބަރުން ދެއްވާ ތާއީދާއި އެއްބާރުލުމަށް އެމަނިކުފާނު ވަނީ ޝުކުރު އަދާ ކުރައްވާފަ އެވެ.

ސަރުކާރުގެ ފަރާތުން ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވި ބިލުގެ ފުރަތަމަ ކިޔުން ވަނީ މިއަދު އިއްވައި، ބިލުގެ އިބްތިދާއީ ބަހުސް ވެސް ވަނީ ފަށާފަ އެވެ.

ބިލުގައި ގާނޫނު އަސާސީއަށް މައިގަނޑު ހަތަރު އިސްލާހެއް ވަނީ ހުށަހަޅައިފަ އެވެ. އެ ގޮތުން ފުރަތަމަ ހިމަނާފައިވަނީ ރާއްޖޭގެ ސަރަހައްދަށް ބަދަލެއް ގެނައުމުގެ ކުރިން ރައްޔިތުންގެ މަޖިލީހުގެ ތިންބައިކުޅަ ދެބައިގެ ރުހުން ހޯދަން ޖެހޭ ގޮތަށް ހެދުމެވެ. އަދި, މެންބަރުން ވަކިކުރުމުގެ ބާރު ސިޔާސީ ޕާޓީތަކަށް ދިނުމަށެވެ.

އެ ބިލާ މެދު ޕީއެންސީ މެންބަރުންގެ މެދުގައި ހިޔާލު ތަފާތުވުންތަކެއް އުޅޭ ކަމަށް "އަދަދު" އަށް ވަނީ މައުލޫމާތު ލިބިފަ އެވެ. ނަމަވެސް މިހާތަނަށް އެއްވެސް މެންބަރަކު ފާޅުގައި އެކަން ހާމައެއް ނުކުރައްވަ އެވެ.