ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ވާންގް ލީޖިން އެ މަގާމުގައި ހުންނަވައިގެން ކޮށްދެއްވި ހިދުމަތަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޝުކުރު އަދާ ކުރައްވައިފި އެވެ.

ލީޖިންއަށް ރައީސް ޝުކުރު އަދާ ކުރެއްވީ ސަފީރުކަމުން ވަކިވެވަޑައިގަތުމުގެ ކުރިން އެމަނިކުފާނުގެ އަރިހަށް އެކަމަނާ ކުރެއްވި ވަދާއީ ޒިޔާރަތުގެ ތެރެއިންނެވެ.

އެ ބައްދަލުވުމުގައި ރައީސް މުއިއްޒު ވަނީ އެކި ދާއިރާތަކުން ރާއްޖެއަށް އެހީތެރިކަން ފޯރުކޮށްދީ ޗައިނާއިން ހިންގި ތަރައްގީގެ މަޝްރޫއުތަކަށް އަލިއަޅުއްވާލައްވައި ޝުކުރު ދަންނަވައިފަ އެވެ.

ލީޖިންގެ ސަފީރުކަމުގައި ދިވެހި ސަރުކާރުން ދިން އެހީތެރިކަމާއި ދިން އެއްބާރުލުމަށް އެކަމަނާ ޝުކުރު އަދާކުރެއްވި އެވެ.

ރައީސް އޮފީހުން ބުނީ ރާއްޖޭގައި ޗައިނާއިން މިހާރު ހިންގަމުންދާ މަޝްރޫއުތަކާއި އަދި ކުރިއަށް އޮތް ތަނުގައި ކުރެވިދާނެ ކަންކަމާ ގުޅިގެން އެ ބައްދަލުވުމުގައި މަޝްވަރާކުރި ކަމަށެވެ. ޗައިނާ އާއެކު ރާއްޖެއިން ބާއްވާ ގާތް ގުޅުން އިތުރަށް ވަރުގަދަ ކުރަން މަސައްކަތް ކުރައްވާނެ ކަމުގެ ޔަގީންކަން ރައީސް މުއިއްޒު ލީޖިންއަށް އެ ބައްދަލުވުމުގައި ދެއްވި އެވެ.

ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރުގެ މަގާމުގެ ދައުރު ހަމަވާތީ އެކަމަނާ ވަނީ ނައިބު ރައީސް، ހުސެއިން މުހައްމަދު ލަތީފްގެ އަރިހަށް ވެސް އިހުތިރާމުގެ ޒިޔާރަތެއް ކުރައްވައިފަ އެވެ.

ލީޖިންގެ އިތުރުން ރާއްޖެއަށް އިންޑިއާއިން ކަނޑައަޅުއްވާފައި ހުންނަވާ ސަފީރު މުނޫ މަހާވަރުގެ ދައުރު ވެސް މިދިޔަ މަހު ވަނީ ހަމަވެފަ އެވެ.