އަނގަ ބަންދުވެ ހަމައެކަނި ބަޓަނަށް އޮބާ ބޮޓަކަށް އޭނާ ބަދަލު ނުވާނެ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު އަބްދުއްރަހްމާން ވިދާޅުވެއްޖެ އެވެ.

އަބްދުއްރަހުމާން "އެކްސް" ގައި ކުރެއްވި ޕޯސްޓެއްގައި ވިދާޅުވީ ރައްޔިތުންގެ އަޑު އިއްވަން މަޖިލީހަށް ރައްޔިތުން ފޮނުވާފައި ތިބި ރައްޔިތުންގެ މަންދޫބުންގެ އަނގަ ބަންދުކޮށް ބަޓަނަށް އޮބާ "ބޮޓުންނަށް" ބަދަލު ކުރުމުން އެތަނަށް ރައްޔިތުންގެ މަޖިލީހޭ ކިޔާނެ ކަމަށް ގަބޫލު ނުކުރާ ކަމަށެވެ.

"ދާއިރާ ރައްޔިތުން ވިއްކައިގެން މަޖްލީހަށް ވަދެ ހަމަ ބޮޓުންގެ ގޮތުގައި ތިބެން މިދާއިރާތަކުގެ ރައްޔިތުން ރުހޭނެތޯ މިވެސް އަޅުގަނޑު އުފެދޭ ސުވާލެއް. ޔަގީނުން ވެސް އައްޑޫ މީދޫ ދާއިރާގެ މެންބަރު ހުސް ބަޓަނަށް އޮބާ ބޮޓަކަށް ނުވާނެ،" އަބްދުއްރަހްމާން ވިދާޅުވި އެވެ.

އަބްދުއްރަހްމާން ވިދާޅުވީ މަޖިލީހުގެ މެންބަރުން ބަޔަކު ޖަހާހާ ބެރަކަށް ނަށާ ބަޔަކަށް ވެގެން ނުވާނެ ކަމަށާއި މެންބަރުންގެ އިއްޒަތާއި ގަދަރުގައި ދިވެހި ރައްޔިތުންގެ ހިދުމަތުގައި ރައްޔިތުންގެ ހައްގުގައި ވަކާލާތު ކުރެވޭނެ ހާލަތެއްގައި ތިބޭ ބަޔަކަށްވާން އެދޭ ކަމަށެވެ.

މަޖިލިސް މެންބަރުން ޕާޓީ ބަދަލުކޮށްފިނަމަ ނުވަތަ ޕާޓީއިން ވަކިކޮށްފި ނަމަ ގޮނޑި ގެއްލޭ ގޮތަށް އަވަސް އަރުވާލައިގެން ގާނޫނުއަސާސީ ބަދަލު ކުރުމަށް ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން މިއަދު ވަނީ ރައްޔިތުންގެ މަޖިލީހަށް ހުށަހަޅާފަ އެވެ.

ސަރުކާރުގެ ފަރާތުން ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވި ބިލުގެ ފުރަތަމަ ކިޔުން ވަނީ މިއަދު އިއްވާފަ އެވެ. އަދި ބިލުގެ އިބްތިދާއީ ބަހުސް ވެސް މިއަދުގެ ޖަލްސާގައި ވަނީ ފަށާފަ އެވެ.

ބިލުގައި ގާނޫނު އަސާސީއަށް މައިގަނޑު ހަތަރު އިސްލާހެއް ވަނީ ހުށަހަޅައިފަ އެވެ. އެ ގޮތުން ފުރަތަމަ ހިމަނާފައިވަނީ ރާއްޖޭގެ ސަރަހައްދަށް ބަދަލެއް ގެނައުމުގެ ކުރިން ރައްޔިތުންގެ މަޖިލީހުގެ ތިންބައިކުޅަ ދެބައިގެ ރުހުން ހޯދަން ޖެހޭ ގޮތަށް ހެދުމެވެ. އަދި, މެންބަރުން ވަކިކުރުމުގެ ބާރު ސިޔާސީ ޕާޓީތަކަށް ދިނުމަށެވެ.