ކުޑަކަމުދާނިޒާމުގެ ބަލިތަކާއި ޔޫރޮލޮޖީ ޓްރާންސްޕްލާންޓުގެ ފަރުވާ ދޭ ހާއްސަ ޑޮކްޓަރެއް ކަމައްވާ ޑރ. އިވާން ނެރެޓްޔަކް ނޮވެމްބަރު 25، އިން ނޮވެމްބަރު 28، ގެ ނިޔަލަށް ޓްރީ ޓޮޕް ހޮސްޕިޓަލުގައި ބަލިމީހުން ބެލުމަށް ހަމަޖެހިއްޖެ އެވެ.

ޑރ. އިވާން ފޯރުކޮށްދޭ ހާއްސަ ހިދުމަތްތަކުގެ ތެރޭގައި ޕެރިޓޯނިއަލް ޑަޔަލިސިސްއަށް ބޭނުންވާ ކެތީޓާ ހޮޅި ލެއްވުމާއި ހީމޯޑަޔަލިސިސް ފިސްޓުލާ އޮޕަރޭޝަންތައް (ފިސްޓުލާ ހެދުމާއި ފިސްޓުލާ މަރާމާތުކުރުމުގެ ސަޖަރީތައް) ހިމެނެ އެވެ.

ޕެރިޓޯނިއެލް ޑަޔަލިސިސް ހިދުމަތް – ހޮސްޕިޓަލަށް ނައިސް ޑަޔަލިސިސް ފަރުވާ

މިހާތަނަށް ރާއްޖޭގައި ކިޑްނީ ފެއިލްވެފައިވާ ބަލިމީހުންނަށް ލިބެން އޮތީ ހަމައެކަނި ހީމޯޑަޔަލިސިސް ފަރުވާ އެވެ. އެއީ ވަކި ހާއްސަ ތަނެއްގައި، ނުވަތަ ހޮސްޕިޓަލުގައި ކުރަންޖެހޭ ފަރުވާއެކެވެ އެވެ.

ޕެރިޓޯނިއެލް ޑަޔަލިސިސް އަކީ ބަނޑުގައި ހުންނަ "ޕެރިޓޯނިއެލް ލައިނިންގް" ކިޔާ ފަށަލައިގެ ބޭނުންހިފައިގެން ފަސޭހައިން ހޮސްޕިޓަލަށް ނައިސް ހޯދޭ ޑަޔަލިސިސް ފަރުވާއެކެވެ.

މިގޮތުން ބަލިމީހާއަށް ފަސޭހަ ތަނެއްގައި ހުރެގެން، ހޮސްޕިޓަލަށް ނައިސް އަމިއްލަޔަށް މި ފަރުވާ ކުރެވެ އެވެ. އޭގެ ސަބަބުން ހޮސްޕިޓަލަށް އައުމަށް ހޭދަވާ ހަރަދާއި ވަގުތު ކުޑަކުރެވެ އެވެ.

ހާއްސަކޮށް ރާއްޖޭގެ އެކި ރަށްތަކުގައި ދިރިއުޅޭ ޑަޔަލިސިސް ފަރުވާ ހޯދާ ފަރާތްތަކަށް މީގެ ސަބަބުން ވަރަށް ބޮޑު ލުޔެއް ލިބިގެންދާނެ އެވެ.

ޕެރިޓޯނިއެލް ޑަޔަލިސިސްގެ ހޭލުންތެރިކަމާއި މައުލޫމާތު ފޯރުކޮށްދިނުން

މިފަރުވާ ތައާރަފު ކުރުމުގެ ގޮތުން ޑރ. އިވާން ނެރެޓްޔަކް އަދި ޓްރީ ޓޮޕް ހޮސްޕިޓަލުގެ ކުޅަދާނަ ނެފްރޮލޮޖީ ޓީމުން ޑަޔަލިސިސް ފަރުވާ ހޯދާ ފަރާތްތަކަށް މައުލޫމާތު ފޯރުކޮށްދިނުމަށާއި، ހިލޭ ކައުންސެލިން ދިނުމަށް ވަނީ ހަމަޖެހިފަ އެވެ.

ޕެރިޓޯނިއަލް ޑަޔަލިސިސްއަށް ބޭނުންވާ ކެތީޓާ ހޮޅި ލެއްވުމާއި، ބަލިމީހާއަށް ގޭގައި ހުރެގެން މިކަން ކުރާނެ ގޮތުގެ އިރުޝާދު ވެސް ދިނުމަށް ވަނީ ހަމަޖެހިފަ އެވެ.

ޕެރިޓޯނިއެލް ޑަޔަލިސިސް ހެދުމަށް ބޭނުންވާ ފަރާތްތަކުން ހިލޭ ކައުންސެލިންގްއަށް ޓްރީ ޓޮޕް ހޮސްޕިޓަލުގެ ކޯލް ސެންޓަރ 3351610 ނަންބަރަށް ގުޅައިގެން ނުވަތަ [email protected] އަށް އީމެއިލް ކުރުމުން ރެޖިސްޓްރީ ކުރެވެ އެވެ.

މި ކައުންސެލިންގް ސެޝަންތަކުން މިހާރު ވެސް ޑައިލިސިސް ފަރުވާ ހޯދަމުންދާ ފަރާތްތަކަށާއި، ކިޑްނީ ފެއިލްވެފައިވާ ނަމަވެސް އަދި ޑައިލިސިސް ފަރުވާ ނުފަށައި، އެކިއެކި ފަރުވާތައް ދިރާސާކުރަމުންދާ ފަރާތްތަކަށް ބޭނުންތެރި މަޢުލޫމާތު ލިބޭނެ އެވެ.

އެ ސެޝަންތަކުގެ ތާރީހުތައް ކަނޑައެޅޭނީ، އިތުރު މައުލޫމާތު ހޯދުމަށް ޝައުގުވެރިކަން ފާޅުކުރާ ފަރާތްތަކާ މަޝްވަރާކޮށް، އެއްބަސްވެވޭ ގޮތެއްގެ މަތިންނެވެ.

އިންޝިއުރަންސް ކަވަރޭޖް

ޓްރީ ޓޮޕް ހޮސްޕިޓަލްއިން ވަނީ ޑައިލިސިސް ހިދުމަތްތައް ފަސޭހަކަމާއެކު ލިބޭނެ މަގު ތަނަވަސްކޮށްދިނުމަށާއި، އަދި އަގުހެޔޮ ގޮތެއްގައި މި ހިދުމަތް ފޯރުކޮށްދިނުމަށް ގިނަ މަސައްކަތްތަކެއް ކުރަމުންނެވެ.

މިގޮތުން މޯލްޑިވްސް ނޭޝަނަލް ޑިފެންސް ފޯސް، މޯލްޑިވްސް ޕޮލިސް ސާވިސް އަދި އަމިއްލަ އިންޝުއަރެންސް ކުންފުނިތަކުން ވަނީ ޕެރިޓޯނިއަލް ޑައިލިސިސްއާ ގުޅުންހުރި އެންމެހައި ޕްރޮސީޖާތަކާއި ހިދުމަތްތަކަށް ފުރިހަމައަށް ހަރަދު ހަމަޖައްސައިދޭނެކަން ކަށަވަރުކޮށްދީފަ އެވެ.

ޓްރީ ޓޮޕް ހޮސްޕިޓަލަކީ ރާއްޖޭގެ ގިނަ ބައެއްގެ އިތުބާރު ހޯދާފައިވާ ޒަމާނީ ފެންވަރަށް ސިއްހީ ހިދުމަތް ފޯރުކޮށްދެމުން އަންނަ ހޮސްޕިޓަލެކެވެ.

އެންމެފަހުގެ ވަސީލަތްތަކާ އެކު ތަފާތު ހިދުމަތްތައް ތައާރަފު ކުރުމަށް ޓްރީ ޓޮޕުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އެ މަސައްކަތް ކުރިއަށް ގެންދަނީ އެކި ދާއިރާތަކުގެ ނަން މަޝްހޫރު ހާއްސަ ޑޮކްޓަރުންގެ އިސްނެގުމުގެ ދަށުން، ވަރަށް ގާބިލު އަދި ތަޖުރިބާކާރު ޑޮކްޓަރުންގެ ޓީމަކުންނެވެ.