ގައުމުގެ ބޮޑެތި ވިޔަފާރިވެރިންނަށް ބަދުބަސްބުނެ ހަޖޫ ޖެހުން ހުއްޓާލަން ވެރިކަންކުރާ ޕީއެންސީއަށް ނިސްބަތްވާ ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ތޯރިގު އެ ޕާޓީގެ ސިޔާސީ މެންބަރުންނަށް ގޮވާލައްވައިފި އެވެ.

މަޖިލިސް މެންބަރުންނާއި މި ސަރުކާރުގެ އިސްވެރިންގެ އިތުރުން ޕީއެންސީގެ އެކްޓިވިސްޓުން ރާއްޖޭގެ ޓޫރިޒަމް ދާއިރާގެ ވިޔަފާރިވެރިންނަށް ގޮންޖަހައި، ފާޑުކިޔަމުންދަނީ ރާއްޖޭގެ ބޭންކުތަކަށް ޑޮލަރު މާރުކުރަން މަޖުބޫރުކޮށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭރު ފައިސާގެ ގަވާއިދަށް އަމަލުކުރެވެން ނެތް ކަމަށް ގިނަ ވިޔަފާރިވެރިން ބުނުމުންނެވެ.

އަންނަ އަހަރަށް ލަފާކޮށް މަޖިލީހަށް ހުށަހަޅާފައިވާ ބަޖެޓަށް މިރޭ ބަހުސް ކުރައްވަމުން ތޯރިގު ވިދާޅުވީ، މިވަގުތު ރާއްޖޭގެ އިގުތިސާދީ އަދި މާލީ ހާލަތު އޮތީ ވަރަށް ގޯސްކޮށް ކަމަށެވެ. އެހެން ކަމުން ޑޮލަރުގެ މައްސަލައާ މެދު ވިސްނާލަން ޖެހޭ ކަމަށް ވެސް އޭނާ ވިދާޅުވި އެވެ.

"އަޅުގަނޑުމެންގެ އެކުވެރި ރައްޔިތުންގެ މަޖިލީހުގެ މެންބަރުންނާ އަދި އަޅުގަނޑުމެންގެ ޕާޓީ، ޕީއެންސީއަށް އަދި މި ސަރުކާރަށް ނިސްބަތްވާ ހުރިހާ ސިޔާސީ ފަރާތްތަކާ އަދި ޕާޓީގެ އެކްޓިވިސްޓުންނަށް އަޅުގަނޑު ގޮވާލަން، އަޅުގަނޑުމެންގެ ގައުމުގެ ބޮޑެތި ވިޔަފާރިވެރިންނަށް ބަދުބަސް ބުނުން ހުއްޓާލަން،" ތޯރިގު ވިދާޅުވި އެވެ.

އެގޮތުން ތަފާތު ނަންތަކުން އެ ވިޔަފާރިވެރިންނާ މުހާތަބުކޮށް، ސޯޝަލް މީޑިއާގައި ހަޖޫ ޖެހުން ހުއްޓާލަން ޖެހޭ ކަމަށާއި ރާއްޖޭގެ އިގުތިސާދު އޮތީ ރަނގަޅު ހާލަތެއްގައި ނޫން ކަމަށް ވެސް ޕީއެންސީގެ ޕީޖީ ގްރޫޕުގެ ޑެޕިއުޓީ ލީޑަރުކަން މީގެ ކުރިން ކުރެއްވި މެންބަރު ތޯރިގު ވިދާޅުވި އެވެ.

"ރާއްޖޭގެ އިގުތިސޯދު އޮތީ ރަނގަޅު ހާލަތެއްގައެއް ނޫން. ހަގީގަތަކީ އެއީ. ރާއްޖޭގެ މާލީ ކަންތައްތައް އޮތީ ރަނގަޅު ހިސާބަކު ނޫން. ރާއްޖޭގަ ތިބި ފުންނާބު އުސް ވިޔަފާރިވެރިންނާ އަޅުގަނޑުމެން ސިޔާސީ ގޮތުން ދިމާކުރުމަކީ އެންމެ ރަނގަޅު ގޮތަކަށް ނުވާނެ،" ތޯރިގު ވިދާޅުވި އެވެ.

އޭނާ އަކީ މިވަގުތު މަޖިލީހުގައި ތިއްބެވި ޕީއެންސީ ކޯލިޝަނުގެ މެންބަރުންގެ ތެރެއިން އެންމެ ތަޖުރިބާކާރު އެއް މެންބަރެވެ. މިއީ އޭނާ މަޖިލީހުގައި އަދާކުރައްވާ ތިންވަނަ ދައުރެވެ.

ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުކޮށް އެމްއެމްއޭ އިން ބޭރު ފައިސާގެ ގަވާއިދަށް ބަދަލު ގެނައީ އޮކްޓޯބަރު 1، ގަ އެވެ. މި ގަވާއިދަށް އަމަލުކުރަން ފަށަނީ ޖެނުއަރީ 1، 2025 އިން ފެށިގެންނެވެ.

މިކަމާ ގުޅިގެން ޓޫރިސްޓު ރިސޯޓުތައް ހިންގާ ވިޔަފާރިވެރިންނާއި އެ ދާއިރާގައި މަސައްކަތް ކުރާ ފަރާތްތަކުގެ އަދަދުން ސިޔާސީންވެސް ދަނީ ސަރުކާރަށް ފާޑުކިޔަމުންނެވެ. މި ގަވާއިދަށް އަމަލުކުރެވެން ނެތް ކަމަށްވެސް 50 އަށްވުރެ ގިނަ ރިސޯޓުން ވަނީ އެމްއެމްއޭ އަށް އަންގާފަ އެވެ.

މި ފާޑުކިޔުންތަކާއި ނިންމުންތަކަށް ގޮންޖައްސަވައި ރައީސް މުއިއްޒު ވަނީ އެމްއެމްއޭ ގެ ގަވާއިދު ބަދަލުނުކުރާނެ ކަމަށް ވިދާޅުވެފަ އެވެ. އެމަނިކުފާނު މިހެން ވިދާޅުވީ ވެރިކަމަށް ވަޑައިގެންނެވިތާ އަހަރެއް ފުރުން ފާހަގަކުރަން ސަރުކާރުގެ ވެރިންނާއި ގިނަ އަދަދެއްގެ ސިޔާސީ މުވައްޒަފުންނާއެކު ސޯޝަލް ސެންޓަރުގައި ބޭއްވި ރަސްމިއްޔާތެއްގަ އެވެ.

"އަޅުގަނޑުމެން ނެތިން މި ގަވާއިދު ބަދަލުކުރާކަށް. ނުކުރާނަން ބަދަލެއް. ވަރަށް ސާފުކޮށް މި ދެންނެވީ ގަވާއިދު ބަދަލެއް ނުކުރާނަމޭ. ވަރަށް ސާފުކޮށް މި ދެންނެވީ ގަވާއިދު ބަދަލެއް ނުކުރާނަމޭ. 500 ޑޮލަރު މާރުކުރައްވަން ޖެހިވަޑައިގަންނަވާނެއޭ. ގަވާއިދަށް އަމަލުކުރުމަކީ އެންމެންގެ މައްޗަށް ލާޒިމު ކަމެކޭ،" ހަރުއަޑުން ރައީސް ވިދާޅުވި އެވެ.

ރައީސްގެ މި ހަރުބަހާއެކު ޕީއެންސީގެ ސިޔާސީ އިސްވެރިންނާއި އެކްޓިވިސްޓުން ދަނީ ކެނޑިނޭޅި ޓޫރިޒަމް ދާއިރާގެ ވިޔަފާރިވެރިންނަށް ފާޑުކިޔައި، ހަޖޫ ޖަހަމުންނެވެ. އަދި، އެ ފަރާތްތަކަކީ ގައުމަށް ހެޔޮ ނޭދޭ ބައެއްގެ ގޮތުގައި ސިފަކުރަމުންނެވެ.