ރައްޔިތުން ވަރަށް އުންމީދާއެކު ގެނައި ސަރުކާރަށް އަހަރެއް ވެގެންދިޔައިރު ގިނަ ދާއިރާތަކުގެ ރައްޔިތުން ތިބީ ވަރަށް ބޮޑަށް މާޔޫސްވެ، ކަންބޮޑުވެފައި ކަމަށް އިހަވަންދޫ ދާއިރާގެ ޕީއެންސީ މެންބަރު އަހުމަދު ނަސީރު މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ޖަލްސާގައި ބަޖެޓަށް ބަހުސް ކުރައްވަމުން ނަސީރު ވިދާޅުވީ ރަށްރަށުގެ ރައްޔިތުން އަހަރެއް ތެރޭގައި ގެންނަން ބޭނުންވި ތަރައްގީ ހުއްޓި، އެކަން ނުކުރެވިގެންދިޔަ ސަބަބުތައް ރައްޔިތުންނަށް ސާފުކޮށްދޭން ޖެހޭ ކަމަށެވެ.

"އެއް އަހަރު ވެގެންދިޔައިރު ގިނަ ދާއިރާތަކުގެ ރައްޔިތުންގެ އިހުސާސްތައް ހުރީ ވަރަށް ބޮޑަށް މާޔޫސްވެ، ކަންބޮޑުވުން ތެރޭގައި އިއްޒަތްތެރި ރައީސް. އެބޭފުޅުންގެ އަޅަން ހަމަޖެހިފައިވާ، ސިއްހީ ނިޒާމު ތެރެއިން އަޅަން ބޭނުންވި ހޮސްޕިޓަލާއި، ތައުލީމަށް އަޅަން ބޭނުންވި ސްކޫލްތަކާއި، މަގު ހެދުމާއި، ނަރުދަމާ އާއި މިނޫން ވެސް ހުރިހާ ކަންތައްތަކެއް ހުއްޓި މި މަސައްކަތް ނުކުރެވިގެންދިޔަ ސަބަބު އަޅުގަނޑުމެން އެބަޖެހޭ ރައްޔިތުންނާ ހިސާބަށް ކިޔައިދޭން އިއްޒަތްތެރި ރައީސް،" ނަސީރު ވިދާޅުވި އެވެ.

ކުރީ ސަރުކާރުން ފަސް އަހަރު ތެރޭގައި ބޮޑެތި ވައްކަންތަކެއް ކޮށްފައި އޮތް ގޮތް އެންމެންނަށް އެނގޭ ގޮތަށް ބުނެދޭން ޖެހޭކަން ކަމަށް ވިދާޅުވެ ނަސީރު އިތުރަށް ވިދާޅުވީ ދައުވާތައް ކޮށްގެން ރުފިޔާތައް ހޯދި ނަމަވެސް އެ ފަސް އަހަރުގައި ގެއްލުނު ވަގުތު ނުލިބޭނެ ކަމަށެވެ.

މި ސަރުކާރުން ރައްޔިތުންނަށްޓަކައި ކުރާ މަސައްކަތް ސާބިތުވާނީ މިދިޔަ ސަރުކާރުގެ ފަސް އަހަރު އޮތް ދަރަނިތަކާއި ކޮށްފައި ހުރި ކަންކަން ސާބިތުކޮށްދީގެން ކަމަށް ވެސް ނަސީރު ވިދާޅުވި އެވެ. އެކަން ސާބިތު ނުކޮށް މިހާރު މިކުރާ މަސައްކަތަކީ ބާރު ދުވެލީގައި ކުރާ މަސައްކަތެއްކަން ކުރިއަށް އޮތް ހަތަރު އަހަރު ރައްޔިތުންނަށް ވިސްނައި ނުދެވޭނެ ކަމަށް ނަސީރު ވިދާޅުވި އެވެ.

އޭގެ އިތުރުން ނަސީރު ވިދާޅުވީ ރާއްޖޭގެ ރަށްތަކަށް ދަތުރުތައް ކުރަން ފަށައި ރައްޔިތުންގެ ވިންދާ އެގޮތަށް މަސައްކަތް ކުރާކަން ރައްޔިތުންނަށް ބުނެދޭން ޖެހޭ ކަމަށެވެ.