ފްލޮރެންސް، އިޓަލީ (ނޮވެމްބަރު 19) - އެއްވެސް ޓީމަކާ ނުގުޅެ އެއް އަހަރު ކުޅުމާ ދުރުގައި ހުރި ސްޕެއިނުގެ ގޯލްކީޕަރު ޑޭވިޑް ޑެހެއާ، އިޓަލީގެ ފިއޮރެންޓީނާ އަށް ބަދަލުވެ، ދައްކަމުން އަންނަ މޮޅު ކުޅުމުގެ ސަބަބުން އޭނާގެ މުސާރަ ބޮޑުކޮށް ކޮންޓްރެކްޓް އާ ކުރަން އެ ކްލަބުން ނިންމައިފި އެވެ.

ޑެހެއާ, 34، ޔުނައިޓަޑާ ވަކިވީ އެ ކްލަބުގައި 12 އަހަރު ހޭދަކުރުމަށް ފަހު އެވެ. އެއްވެސް ކްލަބަކާ ނުގުޅި ހުރުމަށް ފަހު މި ސީޒަނުގައި ފިއޮރެންޓީނާ އަށް ބަދަލުވީ އެއް އަހަރުގެ ކޮންޓްރެކްޓެއްގަ އެވެ.

އެ އެއްބަސްވުމުގައި ވަކި މާއްދާތަކެއް ހިމަނާފައިވާއިރު، ޑެހެއާގެ މުސާރަ މިހާރު ލިބެމުން އަންނަ މިންވަރަށް ވުރެ ދެ ގުނަ ބޮޑުކުރަން ފިއޮރެންޓީނާ އިން ނިންމައިފިނަމަ، އެ އެއްބަސްވުން އިތުރު އެއް އަހަރަށް އާ ވާނެ މާއްދާ އެއް ވެސް އޮވެ އެވެ.

އިޓަލީގެ މީޑިއާ ރިޕޯޓްތައް ބުނާގޮތުން، ފިއޮރެންޓީނާ އިން ނިންމީ އެ މާއްދާ އަށް ބަލައި، ޑެހެއޭގެ މުސާރަ ބޮޑުކޮށް ކޮންޓްރެކްޓް އާ ކުރާށެވެ. އެހެންކަމުން، އެއްބަސްވުން އާ ވުމާ އެކު، ޑެހެއާ އަށް ކުރިއަށް އޮތް ސީޒަނުގައި ލިބޭ މުސާރަ އަހަރަކަށް ހަތަރު މިލިއަން ޑޮލަރަށް އަރާނެ އެވެ.

ފިއޮރެންޓީނާ އަށް މި ފަހަރު 11 މެޗު ކުޅެ، ހަތަރު ކްލީންޝީޓް ފުރިހަމަކޮށްފައިވާ ޑެހެއާ ވަނީ ފިއޮރެންޓީނާ އިން މިލާން ބަލިކުރި މެޗުގައި ދެ ޕެނަލްޓީ މަތަކޮށްފަ އެވެ. އަދި މިދިޔަ ހަފްތާގައި ހެލަސް ވެރޯނާ ކޮޅަށް މޮއިސް ކީން ޖެހި ގޯލަށް ފުރުސަތު ތަނަވަސްކޮށްދިނީ ވެސް ޑެހެއާ އެވެ.