މަސްވެރިންގެ އަތުން މަސް ގަތުމަށްފަހު މިފްކޯއިން މަސްވެރިންނަށް ދޭންޖެހޭ ފައިސާގެ އަދަދު 32 މިލިއަން ރުފިޔާއަށް އަރައިފި އެވެ.

ދައުލަތުގެ މަސް ކުންފުނި މިފްކޯއިން އެންމެ ފަހުން މަސްވެރިންނަށް ފައިސާ ދީފައި ވަނީ އޮކްޓޯބަރު 31، ގައި ކަމަށް ބެލެވެ އެވެ. އެ ދުވަހު ގާތްގަނޑަކަށް 16.2 މިލިއަން ރުފިޔާ ވަނީ މަސްވެރިންނަށް ދޫކޮށްފަ އެވެ. އެހެންކަމުން މިއީ އޭގެ ފަހުން މިފްކޯއަށް ކިރި މަހަށް ދޭންޖެހޭ ފައިސާ ކަމަށް ބެލެވެ އެވެ.

މިފްކޯއިން ބުނީ މިހާރު މަސްވެރިންނަށް ދޭންޖެހޭ 32 މިލިއަން ރުފިޔާ އަންނަ ހަފުތާގެ ތެރޭގައި ދައްކަން މަސައްކަތް ކުރަމުންދާ ކަމަށެވެ.

މަސްވެރިންނަށް ދޭންޖެހޭ ފައިސާ 48 ގަޑިއިރު ތެރޭގަައި ދޫކުރުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ. ނަމަވެސް މަސް ކިރުވިތާ 48 ގަޑިއިރުގެ ތެރޭގައި މިހާތަނަށް މަސްވެރިންނަށް ފައިސާ ދޫކޮށްފައެއް ނުވެ އެވެ.

"އަޅުގަނޑުމެންގެ އަމާޒަކީ 48 ގަޑިއިރު ތެރޭ މަސްވެރިންނަށް ލިބޭ ނިޒާމު ގާއިމުކުރާނަމޭ. އަޅުގަނޑަކީ ވައުދުވާ ގޮތަށް ކަން ކުރާނެ މީހެއް. ޓާގެޓަށް ދާން ކުރާ މަސައްކަތް މިކުރަނީ. އެ ޓާގެޓަށް ދާނަން," ފެބްރުއަރީ، 2024، ގައި ރައީސް ވިދާޅުވި އެވެ.

މަސް ގަތުމަށްފަހު ފައިސާ ދޫނުކޮށްގެން މަސްވެރިން ވަނީ މި ސަރުކާރާ ދެކޮޅަށް މި އަހަރުގެ ތެރޭގައި ބޮޑެތި މުޒާހަރާތަކެއް ވެސް ކޮށްފަ އެވެ. އޭގެ ތެރޭގައި ފެބްރުއަރީގައި ކޫއްޑޫގައި ކުރި ބޮޑު މުޒާހަރާއަކާއި ހުޅުމާލެ އާއި މާލޭގައި ޖޫން މަހު ކުރި މުޒާހަރާއަކާއި ހަމަ އެ މަހު އައްޑޫގައި ކުރި މުޒާހަރާ ހިމެނެ އެވެ.

މަސްވެރިންގެ މުޒާހަރާތަކަށްފަހު ސަރުކާރުން ވަނީ މަހުގެ އަގު 20ރ. އަށް ވުރެ ތިރި ނުކުރާނެ ކަމަށް ރައީސް މުއިއްޒު ވެވަޑައިގެންނެވި ރިޔާސީ ވައުދާ ހިލާފަށް މަހުގެ އަގު ވަރަށް ބޮޑަށް ތިރިކޮށްފަ އެވެ. މިހާރު މިފްކޯއިން މަސް ގަންނަނީ 5ރ. އާއި 16ރ. އާ ދެމެދުގެ ރޭޓުތަކެއްގަ އެވެ.

މަހު އަގު ތިރި ކުރުމަށްފަހު ރައްޔިތުންގެ މަޖިލީހުގައި ވާހަކަ ދައްކަވަމުން ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ މަހުގެ އަގު ތިރި ކުރީ ސަރުކާރުން ހެޔޮ ނިޔަތުގައި ކަމަށެވެ.

"[މަހުގެ އަގު ކުޑަ ކުރުމަކީ] އެއީ ބަހަނާއެއް ނޫން އެއީ ރަނގަޅު ނިޔަތެއްގައި ރައީސް ޑރ. މުހައްމަދު މުއިއްޒު ނިންމެވި ވަރަށް ރަނގަޅު ނިންމެވުމެއް. އަދި މަސްވެރި އާއިލާތަކާއި މުޅި މަސްވެރި އިންޑަސްޓްރީގެ ލާބައަށް ނިންމެވި ނިންމެވުމެއް،" އޮކްޓޯބަރު 30، ގައި މަޖިލީހުގައި ވާހަކަ ދައްކަވަމުން މިނިސްޓަރު ވިދާޅުވި އެވެ.