މިލާން (ނޮވެމްބަރު 18) - ޔުއެފާ ނޭޝަންސް ލީގުގެ ލީގު އޭގެ ގްރޫޕް ތިނެއްގައި ރޭ ފްރާންސް އިން އިޓަލީ ދަނޑުގައި 3-1 އިން މޮޅުވެ، ގްރޫޕްގެ އެއް ވަނަ ހޯދައިފި އެވެ.

އިޓަލީ އާއި ފްރާންސަށް މި މެޗުގެ ކުރިން ވެސް ވަނީ ކުއާޓާ ފައިނަލުން ޖާގަ ޔަގީންވެފަ އެވެ. އެއް ވަނަ ކަނޑައަޅަން ޖެހިފައި އޮތް މި މެޗުގައި، ކާމިޔާބު ހޯދައި، ފްރާންސް އިން ވަނީ އިޓަލީއާ އެއްވަރަށް ހަ މެޗުން 13 ޕޮއިންޓް ހޯދައިފަ އެވެ. ފްރާންސަށް އެއް ވަނަ ލިބުނީ ލަނޑުގެ ތަފާތުންނެެވެ.

މި ގްރޫޕްގައި ރޭ ކުޅުނު އަނެއް މެޗުން ބެލްޖިއަމް އަތުން އިޒްރޭލް 1-0 އިން މޮޅުވި ނަމަވެސް އެ ޓީމު ވަނީ ލީގު ބީ އަށް ރެލިގޭޓްވެފަ އެވެ. ތިން ވަނައިގައި ނިންމި ބެލްޖިއަމާއި ގްރޫޕްގެ ފުލަށް ދިޔަ، އިޒްރޭލަށް ހަ މެޗުން ހަތަރު ޕޮއިންޓް ލިބުނުއިރު، ލަނޑުގެ ތަފާތުންނެވެ.

ފްރާންސް އިން ލީޑުނެގީ މެޗުގެ ދެ ވަނަ މިނިޓްގައި، އެޑްރިއަން ރަބިއޯ ބޮލުން ޖެހި ގޯލުންނެވެ. މިއީ، ލޫކަސް ޑީނިއާގެ ކޯނަރަކުން ރަބިއޯ ޖެހި ގޯލެެކެވެ. ފްރާންސް އިން ލީޑުފުޅާކުރީ، 33 ވަނަ މިނިޓްގައި، ޑީނިއާގެ ހިލޭޖެހުމުން އިޓަލީގެ ކީޕަރު، ގުގްލިއެލްމޯ ވިކާރިއޯ ގައިގައި ޖެހިފައި ބައިކޮޅަށް ވަން ގޯލެކެވެ.

އޭގެ ދެ މިނިޓް ފަހުން، އަންޑްރެއާ ކަމްބިއާސޯ ވޮލީ އަކުން ޖެހި ގޯލަކުން އިޓަލީން ފަރަގު ކުޑަކުރި އެވެ.

މެޗުގެ 65 ވަނަ މިނިޓްގައި، ޑީނިއާގެ ހިލޭ ޖެހުމަކުން ރަބިއޯ ވަނީ އިތުރު ގޯލެއް ޖަހައި ފްރާންސަށް އަލުން ލީޑުފުޅާކޮށްދީފަ އެވެ. އިޓަލީ އަށް ދެ ވަނަ ލަނޑެއް ޖަހައިދޭން، މޮއިސް ކީން ފޮނުވާލި ބޯޅަ ފްރާންސްގެ ކީޕަރު މޮއިސް ކީން ވަނީ މަތަކޮށްފަ އެވެ.

މިއީ، 1983 ވަނަ އަހަރު އިޓަލީ އަމިއްލަ ދަނޑުގައި ސްވިޑެން އަތުން 3-1 އިން ބަލިވި ފަހުން، އަމިއްލަ ދަނޑުގައި މި ވަރުގެ ފަރަގަކުން ބަލިވި ފުރަތަމަ މެޗެވެ.

ނޭޝަންސް ލީގުގެ ކުއާޓާ ފައިނަލުގެ އަށް ޖާގައިގެ ތެރެއިން ހަ ޖާގަ ވަނީ ޔަގީންވެފަ އެވެ. އެ ޖާގަތައް ހޯދާފައިވަނީ، ޕޯޗުގަލް، ފްރާންސް، ޖަރުމަނު، ސްޕެއިން، އިޓަލީ އަދި ނެދަލެންޑްސް އެވެ. ނޭޝަންސް ލީގުގެ ކުއާޓާ ފައިނަލު އޮތީ އަންނަ އަހަރުގެ މާޗް މަހުގަ އެވެ.