ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމަށް އެއް އަހަރު ފުރުން ކުލަގަދަކޮށް ފާހަގަކުރުމަށް މިރޭ ބާއްވާ ޖަލްސާއަށް ސަރުކާރުގެ މުވައްޒަފުންނަށް ވެސް ދައުވަތު ދީފި އެވެ.

ރައީސް މުއިއްޒުގެ ވެރިކަމަށް އަހަރެއް ފުރުން ފާހަގަ ކުރުމަށް ބާއްވާ ޖަލްސާ އޮތީ މިރޭ 7:45 ގައި ސޯޝަލް ސެންޓަރުގަ އެވެ. އެ ޖަލްސާއަށް ސަރުކާރު މުވައްޒަފުންގެ އިތުރުން މަޖިލިސް މެންބަރުންނަށް ވަނީ ދައުވަތު އަރުވައިފަ އެވެ.

ސަރުކާރަށް އެއް އަހަރު ފުރުން ފާހަގަ ކުރުމަށް ބާއްވާ ޖަލްސާއަށް ދައުވަތު ފޮނުވާފައި ވަނީ ސީދާ ރައީސުލްޖުމްހޫރިއްޔާގެ ނަމުގަ އެވެ. އެ ޖަލްސާއަށް ވަދެވެނީ ހަމައެކަނި އެމަނިކުފާނު ދައުވަތު ފޮނުއްވާ ބޭފުޅުންނަށެވެ.

ސަރުކާރަށް އެއް އަހަރު ފުރުން ފާހަގަ ކުރަން ބޮޑު ޖަލްސާއެއް ބާއްވަން ރާވައި، ދައުވަތު ކާޑުތައް އެކި މީހުންނަށް ފޮނުވާފައިވާއިރު، މިއީ ސަރުކާރުން އިންތިޒާމު ކޮށްގެން މިހައި ކުލަގަދަކޮށް ސަރުކާރަކަށް އަހަރެއް ފުރުން ފާހަގަ ކުރާ ފުރަތަމަ ފަހަރެވެ. މީގެ ކުރިން ރާއްޖޭގެ އެއްވެސް ވެރިއަކު ރަސްމީ ސިފައެއްގައި. ދުވަސްތަކަކަށް ދެމިގެންދާ ގޮތަށް ވެރިކަމަށް އަހަރު ފުރުން ފާހަގަކޮށްފައެއް ނުވެ އެވެ.

ސަރުކާރަށް އަހަރެއް ފުރުން ފާހަގަ ކުރުމަށް މިރޭ ޖަލްސާއެއް ބާއްވާއިރު، އިއްޔެ އާއި އޭގެ ކުރީ ދުވަހު ސަރުކާރުގެ ވުޒާރާތަކުން ވަނީ އެކިއެކި ހަރަކާތްތައް ހިންގައިފަ އެވެ. އެގޮތުން އިއްޔެ ހުޅުމާލޭގެ ސެންޓްރަލް ޕާކުގައި ކުޑަކުދިންގެ ހަވީރެއް ވެސް ކުރިއަށް ގެންދިޔަ އެވެ.