ޕެރިސް (ނޮވެމްބަރު 16) - ދަރަނި މައްސަލަތައް ހައްލުނުކޮށްފިނަމަ، މި ސީޒަން ނިމުމުން ފްރާންސްގެ ދެ ވަނަ ޑިވިޝަނަށް ލިޔޯން ރެލިގޭޓްކޮށްލުމަށް ފްރާންސް ފުޓްބޯޅައިގެ މާލީ ކަންކަން ބަލަމުން އަންނަ ޑީއެންޖީސީން ނިންމައިފި އެވެ.

ފްރާންސްގެ ޗެމްޕިއަންކަން ހަތް ފަހަރު ހޯދާފައިވާ ލިޔޯން ހިންގަމުން އަންނަ، ޖޯން ޓެކްސްޓާ އަކީ، އެހެން ގައުމުތަކުގެ ކްލަބްތަކެއްގައި ވެސް ހިއްސާ އޮންނަ ފަރާތެކެވެ. އެ ގޮތުން، އިނގިރޭސި ޕްރިމިއާ ލީގުގެ ކްރިސްޓަލް ޕެލަސް އާއި ބްރެޒިލްގެ ބޮޓަފޯގޯގައި ވެސް ޓެކްސްޓާގެ ހިއްސާ އެބައޮތެވެ.

މި ކްލަބްތައް ހިންގާ ޓެކްސްޓާގެ ކުންފުނި، އީގަލްސް ފުޓްބޯލް ގްރޫޕްގެ ދަރަނި ވަނީ 500 މިލިއަން ޑޮލަރަށް ވުރެ އިތުރުވެފަ އެވެ. މީގެ ތެރެއިން، ބޮޑު ބައެއް އޮތީ ލިޔޯންގެ މާލީ ކަންކަމާ ގުޅިފަ އެވެ.

ލިޔޯނަށް ކުރިއަށް އޮތް ޖެނުއަރީ ޓްރާންސްފާ މާކެޓްގައި އެއްވެސް ކުޅުންތެރިއަކު ނުގަނެވޭނެ އެވެ. އަދި ބެލެވޭގޮތުގައި، ލިޔޯންގެ މާލީ ހާލަތު ރަނގަޅުކުރުމަށް އެ ޓީމަށް ކުޅެމުން އަންނަ މުހިންމު ކުޅުންތެރިންތަކެއް ވިއްކާލުމުގެ ފުރުސަތު ބޮޑެވެ.

ބައެއް މީޑިއާ ރިޕޯޓްތައް ބުނާގޮތުގައި، ލިޔޯންގެ މާލީ ހާލަތު ރަނގަޅުކުރުމަށް، ޓެކްސްޓާ މަޝްވަރާކުރަމުން އަންނަ އެއް ކަމަކީ ކްރިސްޓަލް ޕެލަސް އާއި ބޮޓަފޯގޯގައި އޭނާ ކޮންޓްރޯލް ކުރާ ހިއްސާގެ ތެރެއިން ވަކި ބައެއް ވިއްކާލުމަށެެވެ.

ކަރިމް ބެންޒެމާ ފަދަ ކުޅުންތެރިން ޕްރޮފެޝަނަލް ފުޓްބޯޅަ އަށް ނެރެދިން ލިޔޯން މި ފަދަ މާލީ ހާލަތެއްގައި މިހާރު މި އޮތީ އަހަރުތަކެއް ވަންދެން ގިނަ ގޯސްތަކެއް ހަދާފައިވާތީ އެވެ.

ލިޔޯން މި ވަގުތު އޮތީ ފްރާންސް ލީގުގެ ފަސް ވަނައިގަ އެވެ. އަދި ޔޫރޮޕާ ލީގުގެ ނުވަ ވަނައިގަ އެވެ.