މީގެ އެއް އަހަރު ކުރިން ރައީސް ޑރ. މުހައްމަދު މުއިއްޒު ދިވެހިރާއްޖޭގެ ވެރިކަމަށް ވަޑައިގެންނެވީ ދިވެހި މަސްވެރިންގެ ވަރަށް ބޮޑު ތާއީދަކާއެކު އެވެ.

ސެޕްޓެމްބަރު، 2023، ގައި ބޭއްވި ރިޔާސީ އިންތިހާބުގައި މަސްވެރިކަން ކުރާ 17,000 މީހުންނާއި އެމީހުންގެ އާއިލާގެ ގިނަ ބަޔަކު ރައީސް މުއިއްޒަށް ތާއީދު ކުރިކަން އެއީ ސިއްރެއް ނޫނެވެ.

އެކި މީޑިއާތަކުގައި މަސްވެރިން ދިން އިންޓަވިއުތަކާއި މަސްވެރި އާއިލާތައް ގިނަ ރަށްރަށަށް ރައީސް މުއިއްޒު ވަޑައިގެންނެވުމުން ދައްކާލި ތާއީދުން އެކަން ސާފުވެ އެވެ.

ނަމަވެސް މި ވެރިކަމުގައި އެންމެ ފުރަތަމަ މުޒާހަރާއަށް ނުކުތް ބަޔަކަށްވީ މަސްވެރިންނެވެ. މި ސަރުކާރުން އުވާލި އެންމެ ފުރަތަމަ ވައުދުގެ ގޮތުގައި ވެސް ފެންނަނީ މަސްވެރިންނާ ގުޅޭ ވައުދެކެވެ.

މިއަދު ސަރުކާރަށް އަހަރެއް ފުރުނުއިރު، މަސްވެރިކަން އޮތީ ނިކަމެތި ހާލަތެއްގަ އެވެ. އިއްތިފާގަކުން ނަމަވެސް މި އަހަރު ނިމިގެން މި ދަނީ މަސްވެރިކަން ދަށް އަހަރެއްގެ ގޮތުގަ އެވެ. މަހުގެ އަގު ސަރުކާރުން މި ވަނީ ވަރަށް ބޮޑުތަން ވައްޓާލައިފަ އެވެ.

ރައީސް ޑރ. މުއިއްޒުގެ ފަސް އަހަރުގެ ވެރިކަމުގެ ފުރަތަމަ އަހަރު ނިމިގެންމިދިޔައީ މަސްވެރިކަމާއި މަސްވެރިންނަށް ތަދު އަހަރެއްގެ ގޮތުގަ އެވެ.

މި ސަރުކާރާ ދެކޮޅަށް މަސްވެރިންގެ މުޒާހަރަތަކެއް

ކޫއްޑޫ މުޒާހަރާ

މި ސަރުކާރަށް އަހަރެއް ފުރުނުއިރު މަސްވެރިން ވަނީ ބޮޑު ހަތަރު މުޒާހަރާއެއް ސަރުކާރާ ދެކޮޅަށް ކޮށްފަ އެވެ. އެންމެ ފުރަތަމަ މުޒާހަރާ ކުރީ ސަރުކާރަށް އަހަރެއް ފުރުނު ފަހުން ފެބްރުއަރީ 18، 2024، ގަ އެވެ.

މަސްވެރިން ކޫއްޑޫއަށް ގޮސް މުޒާހަރާ ކުރަން ފެށީ، ސަރުކާރުން މަސް ގަތުމަށްފަހު އެ މަހަށްވާ ފައިސާ ނުދީގެންނެވެ. ވެރިކަމަށް ވަޑައިގެންނެވުމުގެ ކުރިން ސަރުކާރުން ދެއްކި ވާހަކަތަކުން މަސްވެރިންނަށް ހީވެފައި އޮތީ މަސްވެރިންނަށް ފައިސާ ދިނުމުގައި އެއްވެސް ލަސްކަމެއް ކުރިމަތިނުވާނެ ކަމަށެވެ.

"އަޅުގަނޑުމެންގެ އިހުތިޖާޖުގެ ބޭނުމަކީ ތަނަށް ގެއްލުން ދިނުމެއް ނޫން. [ބޭނުމަކީ] ފައިސާއަށް ވީގޮތް އެނގުން. ބާނާ މަސް އެބަ ބޭރުކުރޭ، އެކަމަކު ލާރިއެއް ނުލިބޭ. އެމީހުންގެ ހުރިހާ ކަމެއް އެބަ ކުރެވޭ، މުސާރަ ދެވޭ، އެކަމު އަޅުގަނޑުމެންނަކަށް އެއްވެސް އެއްޗެއް ނުދެވޭ،" މަސް ދޯންޏެއްގެ ކައްޕި މުހައްމަދު ޔާސިރު، އެއިރު މި ނޫހާ ވާހަކަ ދައްކަމުން ބުންޏެވެ.

މުޒާހަރާގެ ބައިވެރިންނާ ވާހަކަ ދެއްކުމަށް މަސްވެރިކަމާ ބެހޭ މިނިސްޓަރު އަހުމަދު ޝިޔާމް ކޫއްޑޫއަށް ވަޑައިގެންނެވި އެވެ. އެކަމަކު މިނިސްޓަރުގެ ވާހަކައިން ވެސް މަސްވެރިން "ރުޅި" މައިތިރިއެއް ނުވި އެވެ.

"އާދެ، [މަސްވެރިން] މުޒާހަރާގައި އެބަތިބި، ކޫއްޑޫގައި ވެސް އެބަ ތިބި، އައްޑޫ ސިޓީގައި ވެސް މުޒާހަރާގައި މަސްވެރިން ތިބީ. އަޅުގަނޑުމެން މި އެދެނީ އެންމެ ދުވަހެއްގެ އާމްދަނީ ވެސް މަދުނުކޮށް، މުޒާހަރާ ހުއްޓާލާފައި މަސްވެރިން ހަމަ އާމްދަނީ ހޯދުމަށް ޓަކައި މަހަށް ވަޑައިގަންނަވާށޭ،" ފެބްރުއަރީ 20، ގައި ކޫއްޑޫގައި މަސްވެރިންނާ ވާހަކަ ދައްކަވަމުން ޝިޔާމް ވިދާޅުވި އެވެ.

ގާތްގަނޑަކަށް ހަތަރު ދުވަހަށް އެ މުޒާހަރާ ދިގުދެމިގެންދިޔަ އެވެ. އެންމެ ފަހުން މަސްވެރިން ކޫއްޑޫ ދޫކޮށް ދިޔައީ ސަރުކާރުން ދޭންޖެހޭ ފައިސާތައް ދޫކުރަން ފެށުމުންނެވެ.

ހުޅުމާލެ، މާލެ، މަޑަވެލި

މަސްވެރިންގެ ދެ ވަނަ މުޒާހަރާ ފެށީ ބޭރުގެ އުޅަނދުތަކަށް ހުއްދަ ލިބޭނެ ގޮތަށް ރާއްޖޭގައި ލޭނުގެ މަސްވެރިކަން ކުރަން ހުޅުވާލަން ނިންމުމުން ޖޫން، 2024، ގަ އެވެ. އެ މުޒާހަރާ އެންމެ ފުރަތަމަ ފެށީ ހުޅުމާލޭ ފަޅު ތެރޭގަ އެވެ. ގާތްގަނޑަކަށް 35 މަސް ދޯނި އެ މުޒާހަރާގައި ބައިވެރިވި އެވެ.

"ބޮޑު ކަންނެލީގައި ލޭނު އެޅުމަށް ހުއްދަ ދިނުމުން މަސްވެރިން ނިކަމެތިވާނެ ކަމުގެ ބިރު އެބައޮތް. ފެކްޓްރީތަކަށް ލޭނު އެޅުމަށް ހުއްދަ ދިނުމުން މަސްވެރިން ބާނާ މަހަށް އޮތް ޑިމާންޑު އެއްކޮށް ގެއްލޭނެ. އެކަން ކުރެވޭނީ ވައުދުތައް ފުއްދުމަށްފަހު،" މުޒާހަރާ ކުރި މަސްވެރިޔަކު އެއިރު ބުންޏެވެ.

އެ މުޒާހަރާގައި މަސްވެރިން ކުރި އެއް ޑިމާންޑަކަށްވީ މަސްވެރިކަމާ ބެހޭ މިނިސްޓަރު އަހުމަދު ޝިޔާމް އެ ސަރަހައްދަށް ވަޑައިގެން މަސްވެރިންނާ ބައްދަލު ކުރެއްވުމެވެ. މިނިސްޓަރު ވަޑައިނުގަތުމުން ދެން މަސްވެރިން އައީ މާލެ އަށެވެ. އެކަމަކު، މަސްވެރިން މާލޭ ފަޅަށް ވަނުމަށް ކޯސްޓްގާޑުން ހުރަސްއެޅި އެވެ. ނަމަވެސް ބައެއް ދޯނިތައް އެވަރުން ވެސް މާލެ ފަޅަށް ވަނެވެ.

އެ މުޒާހަރާ މަސްވެރިން ހުއްޓައިލީ އެމީހުން އެދުނު ގޮތަށް މިނިސްޓަރު ޝިޔާމް އެ ސަރަހައްދަށް ވަޑައިގެން މަސްވެރިންނާ ވާހަކަ ދެއްކެވުމުންނެވެ.

"މި އަހަރަކު އަޅުގަނޑުމެންނަކަށް ނެތް ކަންނެލި މަސްވެރިންގެ އަތުން ކަންނެލި ގަނެވޭކަށެއް. މިފްކޯ އޮތީ އެ ހާލަތަކު ނޫން. މިފްކޯ ރަނގަޅު ކުރުމުގެ މަސައްކަތް ކުރަމުން ދަނީ، ދައުރުގެ ވަރަށް ކުރީކޮޅު ވައުދުތައް ފުއްދަމުންނޭ މި ދަނީ، އެ ކަން ވެސް ސަރުކާރުގެ ވައުދާ އެއް ގޮތަށް ހިނގަމުންދާނެ،" ޖޫން 12، ގައި ވާހަކަ ދައްކަވަމުން މިނިސްޓަރު ވިދާޅުވި އެވެ.

ހަމަ އެ ދުވަހު މަސް ކިރުވުމަށްފަހު ފައިސާ ދޫނުކޮށްގެން ގދ. މަޑަވެލީގައި ވެސް މަސްވެރިން މުޒާހަރާ ކުރި އެވެ.

"އަޅުގަނޑުމެންނަށް މިދިޔަ ރޯދަ ނިމިގެން ހަ ރޯދައަށްފަހު ފައިސާ ޖަމާނުވޭ. ސަރުކާރަށް އެތައް ފަހަރު މަތިން ފައިސާ ޖަމާކޮށްދޭން އެދިފިން. ސޯޝަލް މީޑިއާގައި ކަންބޮޑުވުން ފާޅުކުރިން. އެންމެ ފަހުން އިހުތިޖާޖު ކުރަން ފެށީ އެއްވެސް ހައްލެއް ނުލިބޭތީ،" އެ ދުވަހު މަޑަވެލިން މި ނޫހާ ވާހަކަ ދެއްކި މަސްވެރިޔަކު ބުންޏެވެ.

އައްޑޫ

އެންމެ ވަރުގަދަ މުޒާހަރާއެއް މަސްވެރިން ކުރީ އައްޑޫގައި ޖޫން 22، ވަނަ ދުވަހުން ފެށިގެންނެވެ. ޖުމުލަ 10 ދުވަހަށް ދެމިގެންދިޔަ އެ މުޒާހަރާގައި މަސްވެރިންގެ އިތުރުން މަސްވެރިންގެ އާއިލާތައް ވެސް ބައިވެރިވި އެވެ. އެ މުޒާހަރާ ވެސް ކުރަން ފެށީ މަސްވެރިންނަށް ދޭންޖެހޭ ފައިސާ ސަރުކާރުން ނުދީގެންނެވެ.

އައްޑޫ ފިޝަރީޒް ކޮމްޕްލެކްސް ކައިރި ކުރި އެ މުޒާހަރާގައި 15 މަސް ދޯނި އަދި 80 މަސްވެރިން ބައިވެރިވި އެވެ. އެއިރު ސަރުކާރުން އޮތީ މަސްވެރިންނަށް ގާތްގަނޑަކަށް 50 މިލިއަން ރުފިޔާ ދަރައިފަ އެވެ.

އެ މުޒާހަރާގައި، އިހުތިޖާޖު ކުރުމުގެ ގޮތުން ބައެއް ކަންކަން ކުރި އެވެ. އެގޮތުން ފިޝަރީޒް ކޮމްޕްލެކްސް އިން ކަރަންޓު ކަނޑާލި އެވެ. އަދި މަސް ފެކްޓަރީއަށް ބައެއް މަސްވެރިން ވަދެ، އެތަނުގެ ކެންޓީނުގައި މަޑު ކުރި އެވެ.

މުޒާހަރާއެއްގެ ބަދަލުގައި ސަރުކާރުން އެކަން ދެކުނީ ގާނޫނާ ހިލާފު ހަރަކާތްތަކެއްގެ ގޮތުގަ އެވެ. އަދި މަސްވެރިންނަށް ފިޔަވަޅު އަޅާނެ ކަމުގެ ވަރުގަދަ އިންޒާރެއް ސަރުކާރުން މަސްވެރިންނަށް ދިނެވެ.

"އައްޑޫ ފިޝަރީޒް ކޮމްޕްލެކްސްގައި މިހާރު ހިނގަމުންދާ އިހުތިޖާޖުތަކާއި ގުޅިގެން ތަނުގެ އޮޕަރޭޝަން ހުއްޓު ކުންފުންޏަށް މާލީ ގޮތުން ގެއްލުން ވަމުންދާތީ، ތަން އޮޕަރޭޝަނަށް ގެނައުމަށް ކަމާއިބެހޭ ފަރާތްތަކާއި ގުޅިގެން މިދަނީ މަސައްކަތް ކުރަމުން. އަދި ތަން އޮޕަރޭޝަނަށް ގެނެސް އާންމު ހާލަތަކަށް ގެނައުމަށް މިފްކޯގެ މުވައްޒަފުން ކުރަމުން ގެންދާ މަސައްކަތްތަކާއި، ފުލުހުންގެ ޒިންމާތަކަށް ހުރަސް އަޅާ ދޯނިފަހަރުން މިފްކޯއަށް މަސްގަތުން ތިން މަސް ދުވަހަށް ސަސްޕެންޑު ކުރެވޭނޭ ވާހަކަ ދެންނެވިން،" ޖޫން 23، ގައި މިފްކޯއިން ނެރުނު ބަޔާނެއްގައި ބުންޏެވެ.

އެ މުޒާހަރާ ވެސް މަސްވެރިން ހުއްޓައިލީ ސަރުކާރުން މަސްވެރިންނަށް ދަރާފައި އޮތް ފައިސާ ދޫކުރަން ފެށުމުންނެވެ.

ކުޑަހުވަދޫ

ކުޑަހުވަދޫގައި މަސްވެރިން މުޒާހަރާ ކުރަން ފެށީ ޖޫން 25، ގަ އެވެ. ކުޑަހުވަދޫގައި ވެސް މުޒާހަރާ ކުރަން ފެށީ މަސްވެރިންގެ އަތުން މަސް ގަތުމަށްފަހު އެ މަހަށްވާ ފައިސާ ނުދީގެންނެވެ. ކުޑަހުވަދޫގައި ކުރިއަށް ގެންދިޔައީ ކުރިން ކުރި މުޒާހަރާތަކާ އަޅާބަލާއިރު ކުޑަ މުޒާހަރާއެކެވެ.

އެ މުޒާހަރާ ކުރިއަށްގެންދިޔައީ މަސްވެރިންގެ އެކި ޝުއޫރުތައް ލިޔެފައި ހުރި ޓީޝާޓުތަކެއް ލައިގެންނެވެ. މަސްވެރިން ޑިމާންޑު ކުރަމުންދިޔައީ ސަރުކާރުން މަސްވެރިންނަށް ދައްކަންޖެހޭ ފައިސާތައް އަވަހަށް ދޫކުރުމަށެވެ.

އެ މުޒާހަރާ ހުއްޓާލީ މަސްވެރިން ބޭނުންވާ ވަރަށް ޝުއޫރު ފާޅު ކުރުމަށްފަހު ސަރުކާރަށް ވަރަށް ވަރުގަދައަށް މަސްވެރިންގެ އަޑު އިއްވައިދީފަ އެވެ.

ސަރުކާރުގެ ވައުދާ ހިލާފަށް "ހެޔޮ ނިޔަތުގައި" މަހުގެ އަގު ތިރި ކުރުން

މި ސަރުކާރު ވެރިކަމަށް އައީ މަސްވެރިންނަށް ވަރަށް ސާފު ވައުދުތަކެއް ވުމަށްފަހެވެ. އެންމެ ބޮޑު ވައުދަކީ މަސް ގަންނަ އަގު 20ރ. އަށް ވުރެ ތިރި ނުކުރާނެކަމުގެ ބޮޑު ވައުދެވެ. ނަމަވެސް ވެރިކަމަށް ވަޑައިގަތުމަށްފަހު އެންމެ ފުރަތަމަ ވެސް ސަރުކާރުން ދައްކަން ފެށި އެއް ވާހަކައަކީ މަސް ގަންނަ އަގު ބޮޑުކަމުގެ ވާހަކަ އެވެ.

މަހުގެ އަގަށް ބަދަލެއް ގެންނާނެކަމުގެ އިޝާރާތެއް ސަރުކާރުން ފުރަތަމަ ދިނީ ރައީސް ޑރ. މުއިއްޒު ވެރިކަމުގެ ހުވާ ކުރެއްވިތާ 10 ދުވަސް ވެސް ނުވަނީސް ނޮވެމްބަރު 2، 2023، ގަ އެވެ.

"މިފްކޯއަށް މަހަށް ފައިސާ ނުދެއްކިދާ ދިޔުމަކީ ހަގީގަތުގައި މީގެ އުނދަގޫ. އަގުގެ ވަރަށް ބޮޑު ތަފާތެއްގެ ވާހަކަ މި ދައްކަނީ. ސަބްސިޑީ ދީގެން މިފްކޯއިން މަސް ގަންނައިރުވެސް ފަސޭހަ އަގެއް ނޫން އެއަކީ. އެތައް މިލިއަން ރުފިޔާއަށް ސަބްސިޑީގެ އަގު ބޮޑުވެއްޖެ. މި ވެސް ހަމަ ދިވެހި ރައްޔިތުންގެ ފައިސާ މި ދިމާއަށް މި ދަނީ،" މި ނޫހަށް ދެއްވި އިންޓަވިއުއެއްގައި ނޮވެމްބަރު 24، ގައި ޝިޔާމް ވިދާޅުވި އެވެ.

މި ސަރުކާރު ވެރިކަމަށް އައިއިރު ކަޅުބިލަމަސް ކިލޯއެއްގެ އަގު ހުރީ 25ރ. އަށެވެ. ނަމަވެސް ފެބްރުއަރީ 12، އިން ފެށިގެން މަސް ކިލޯއެއްގެ އަގު 20ރ. އަށް ސަރުކާރުން ތިރި ކުރި އެވެ.

އޭގެ ފަހުން މަސް ގަންނަ އަގަށް ސަރުކާރުން އަނެއްކާ ވެސް ބޮޑު ބަދަލެއް ގެނައީ މަަސްވެރިން ކުރިއަށްގެންދިޔަ މުޒާހަރާތަކަށްފަހެވެ. މަސް ގަންނަ އަގު ވަރަށް ބޮޑަށް ތިރިކޮށް 16ރ. އާއި 5ރ. އާ ދެމެދުގެ ރޭޓުތަކެއް ސަރުކާރުން ކަނޑައެޅީ ޖޫން 30، 2024، ގަ އެވެ.

ގަނޑުކުރި މަސް ގަންނަ އަގު

1.5 ކިލޯއަށް ވުރެ ބަރު މަސް - ކިލޯއަކަށް 16ރ.

1.5 ކިލޯ ހަމަނުވާ މަސް - ކިލޯއަކަށް 7ރ.

ގަނޑު ނުކުރާ މަސް ގަންނަ އަގު

1.5 ކިލޯއަށް ވުރެ ބަރު މަސް - ކިލޯއަކަށް 14ރ.

1.5 ކިލޯ ހަމަނުވާ މަސް - ކިލޯއަކަށް 5ރ.

ފަހުން، ނިމިޔަ އޮކްޓޯބަރު މަހު ރައްޔިތުންގެ މަޖިލީހުގައި ވާހަކަ ދައްކަވަމުން މަސްވެރިކަމާ ބެހޭ މިނިސްޓަރު ޝިޔާމް ވިދާޅުވީ، މަސް ގަންނަ އަގު ތިރި ކުރީ މަސްވެރިކަމުގެ އިންޑަސްޓްރީގެ ފައިދާއަށް، ހެޔޮ ނިޔަތުގައި ކަމަށެވެ.

"[މަހުގެ އަގު ކުޑަ ކުރުމަކީ] އެއީ ބަހަނާއެއް ނޫން އެއީ ރަނގަޅު ނިޔަތެއްގައި ރައީސް ޑރ. މުހައްމަދު މުއިއްޒު ނިންމެވި ވަރަށް ރަނގަޅު ނިންމެވުމެއް. އަދި މަސްވެރި އާއިލާތަކާއި މުޅި މަސްވެރި އިންޑަސްޓްރީގެ ލާބައަށް ނިންމެވި ނިންމެވުމެއް،" އޮކްޓޯބަރު 30، ގައި ޝިޔާމް ވިދާޅުވި އެވެ.

އެ ދުވަހު ވާހަކަ ދައްކަވަމުން ޝިޔާމް އިއުލާނު ކުރެއްވީ ރައީސް މުއިއްޒުގެ ރިޔާސީ ކެމްޕެއިނުގައި އިއުލާނު ކުރެއްވި މަހުގެ ސިޔާސަތާ މުޅިން ހިލާފު ހަމަތަކެކެވެ.

"އިރާދަކުރެއްވިއްޔާ މަސްވެރިންނަށް ބަރާބަރަށް ފައިސާ ދެމުން މި ސަރުކާރުން މި ދަނީ. މަހުގެ އަގު އެއީ ދުނިޔޭގެ ބާޒާރާ ގުޅިގެން ކަނޑައެޅޭ އަގަކަށް ވާންޖެހޭނެ. އެހެން ނޫނިއްޔާ ދެމެހެއްޓެނިވި ގޮތެއްގައި ދިވެހިރާއްޖޭގައި މަސްވެރިކަމުގެ ސިނާއަތެއް ނޯންނާނެ. މަހުގެ އަގަށް އެއިރު ބަދަލު އަޅުގަނޑުމެން ނުގެނައިނަމަހީ ދިވެހިރާއްޖޭގައި މި ސިނާއަތެއް ނޯންނާނެ، މިފްކޯ ކިޔާ ކުންފުންޏެއް، [ހިންގަން] ދިވެހި ރައްޔިތުންގެ ހުރިހާ ޓެކްސް ފައިސާއެއް މިފްކޯ ހިންގަން ހޭދަކޮށްގެން އަޅުގަނޑުމެން ތިބެންޖެހޭނީ،" ޝިޔާމް ވިދާޅުވި އެވެ.

ރައީސް މުއިއްޒުގެ ވައުދުތަކަށް އަވަސް ކަޅިއެއް

ސަރުކާރުން މަހުގެ އަގު އިންތިހާއަށް ވައްޓާލިއިރު، މަހުގެ އަގު ދަށް ނުކުރާނެ ކަމަށް ރިޔާސީ އިންތިހާބުގެ ކެމްޕެއިނުގައި ސީދާ ރައީސް މުއިއްޒު އެތަކެއް ފަހަރަކު ވައުދުވެވަޑައިގެންނެވި އެވެ. އެންމެ ގިނައިން އެ ވައުދުވެވަޑައިގަތީ މަސްވެރިކަން އެންމެ ބޮޑަށް ކުރާ ރަށްތަކަށް ވަޑައިގެންނެވުމަށްފަހެވެ.

އެގޮތުން، މ. ދިއްގަރާއި ޅ. ނައިފަރު އަދި ކ. ގާފަރަށް ވަޑައިގެން މަހުގެ އަގު 20 އަށް ވުރެ ދަށް ނުކުރައްވާނެ ކަމަށް ރައީސް މުއިއްޒު ވައުދުވެވަޑައިގެންނެވި އެވެ. ތިރީގައި މި ގެނެސްދެނީ މަހުގެ އަގާ ގުޅޭ ގޮތުން ރައީސް މުއިއްޒު ވެވަޑައިގެންފައިވާ ބައެއް ވައުދުތަކެވެ.

އޯގަސްޓު 19، 2023 (މ. ދިއްގަރު)

"އެގޮތުން އަޅުގަނޑު ދަންނަވާލަން ބޭނުންވަނީ ދުނިޔޭގެ ބާޒާރުގައި މަސް ގަންނަން ހުންނަ އަގުތަކަށް ރިއާޔަތްކޮށް، އަޅުގަނޑުމެންގެ ސިޔާސަތަކަށް ވާނ،ީ އަޅުގަނޑުމެން ގަސްތުކުރާ ގޮތަކ،ީ ރާއްޖޭގައި މަސް ގަންނ،ަ ރޯމަސް ގަންނަ އެންމެ ދަށް އަގު 20 ރުފިޔާއަށް ހެދުން. އެއީ އަޅުގަނޑުމެން ގަސްދުކުރާ ގޮތް ކަން އަޅުގަނޑު އިއުލާންކުރަން."

އޯގަސްޓު 31، 2023 (ޅ. ނައިފަރު)

"ދެން ދުނިޔޭގެ ބާޒާރުގައި މަހުގެ އަގަށް އަންނަ ބަދަލުތަކަށް ރިއާޔަތްކޮށް އަޅުގަނޑުމެން އޮންނާނީ އިއުލާންކޮށްފައި މިހާރު ރޯމަސް ގަންނަ އަގު އެންމެ ކުޑަ އަގެއްގެ ގޮތުގައި 20 ރުފިޔާ ހަމަ ޖައްސާނެ ވާހަކަ، ކިލޯއަކަށް."

ސެޕްޓެމްބަރު 5، 2023 (ކ. ގާފަރު)

"އަޅުގަނޑު ހަމަ ދަންނަވާލަން ބޭނުންވަނ،ީ އެއް ކަމަކަށް އަޅުގަނޑު މިހާރު ވާނީ ބާނާ މަހުގެ އަގުގެ ވާހަކަ އިއުލާން ކޮށްފައި. އެއީ ހަމަ ތަކުރާރުކޮށްލަން، 20 ރުފިޔާ އެއީ މިނިމަމް އަގުގެ ގޮތުގައި އަޅުގަނޑުމެން ކަނޑައަޅާ އެގޮތަށް އިރާދަކުރެއްވިއްޔާ އަޅުގަނޑުމެން ކުރިއަށް ގެންދާނެ ވާހަކަ ދަންނަވަން."

ސެޕްޓެމްބަރު 6، 2023 (އާސްކް މުއިއްޒު ޕްރޮގްރާމް)

"އަޅުގަނޑުމެން މި ހުށަހަޅައިގެން މިއުޅެނ،ީ މުޅި މަސްވެރިކަމުގެ ސިނާއަތް އެއްކޮށް ނަގާ ކޮޅަށްޖެހުމުގެ ހުށަހެޅުމެއް. އަޅުގަނޑުމެންގެ މެނިފެސްޓޯގައި އޮންނާނީ އެގޮތަށް. އެއް ކަމަކީ ތިޔަ ވިދާޅުވި އަގުގެ ވާހަކަ. އަގު އަޅުގަނޑުމެންގެ ޓާގެޓަކ،ީ ރޯމަސް އަގު، މިނިމަމް ކިލޯގެ އަގު 20 ރުފިޔާއަށް. 20 ރުފިޔާއަކީ މިނިމަމް އަގު ކަމަށް. ދެން ބޮޑު ކަންނެލީގެ އަގު 80 ރުފިޔާ ނުވަތަ އޭ-ގްރޭޑް ވެއްޖިއްޔާ 100 ރުފިޔާއަށް. އެކަހަލަ އަގުތަކެއް ހުންނާނެ ހުށަހަޅާފައި."

ސެޕްޓެމްބަރު 28، 2023 (ވަން ޓު ވަން ރައްޔިތުންނާއެކު ޑރ. މުއިއްޒު ޕްރޮގްރާމް)

"އަޅުގަނޑުމެން މި ހުށަހަޅަނީ ހެޔޮ ނިޔަތުގައި ހުށަހަޅާ ހުށަހެޅުމެއް. އަޅުގަނޑު ދެންނެވިން އަޅުގަނޑުގެ ޓާގެޓަކީ 20 ރުފިޔާ މިނިމަމް އަގުގެ ގޮތުގައި ހިފެހެއްޓުމޭ."

~

ރައީސް މުއިއްޒު މަސްވެރިންނާ ގުޅޭ ގޮތުން ވެވަޑައިގެންނެވި ވައުދާ ހިލާފުވުމަކީ ކުޑަ ކަމެއް ނޫނެވެ. އެއީ އިންތިހާ ބޮޑު ކަމެކެވެ. މަސްވެރިން ރައީސް މުއިއްޒަށް ވޯޓު ދިނީ އެ ވައުދުތަކާ ހިލާފުވެވަޑައިނުގަންނަވާނެ ކަމަށް ބަލައިގެންނެވެ. ނަމަވެސް އާހިރުގައި މަސްވެރިން އަދި ގައުމަށް ވެސް މި ލިބުނީ ވަރުގަދަ ލަނޑެކެވެ.