މިހާރު ކުރިއަށްދާ ޒެމްބިއާ އިންޓަނޭޝަނަލް 2024، ބެޑްމިންޓަން މުބާރާތުގެ އަންހެން ސިންގަލްސް ކުއާޓާ ފައިނަލުން ފާތިމަތު ނަބާހާ (ނަބާ) އާއި އައިމިނަތު ނަބީހާ (ނަބީ) ޖާގަ ހޯދައިފި އެވެ.

ގަދަ 16 ބުރުގައި ނަބީ ކުޅެފައިވަނީ، ޒެމްބިއާގެ އަންޖުމަން ބަރްދްވާޖްއާ އެވެ. އެ މެޗުން ނަބީ މޮޅުވީ، 21-18، 21-18 އިންނެވެ. ނަބާ ކުޅެފައިވަނީ، ބޫޕޭ މާބޯއާ އެވެ. އެއް ވަނަ އަށް ސީޑުކޮށްފައިވާ ނަބާ މި މެޗުން މޮޅުވީ، 21-04، 21-03 އިންނެވެ.

މިއަދު ކުޅޭ ކުއާޓާ ފައިނަލް މެޗުތަކަށް ބަލާއިރު، އަންހެން ސިންގަލްސްގައި ނަބީ ކުޅޭނީ އަޒަރުބައިޖާންގެ ހާޖަރު ނުރިޔޭވާއާ ދެކޮޅަށެވެ. އަދި ނަބާ ބައްދަލުކުރާނީ، ޒެމްބިއާގެ ސަލިފްޔަންޖީ ސިމްވަކާއާ އެވެ. އަންހެން ޑަބަލަސްގައި ނަބީ އާއި ނަބާގެ ޕެއާ ކުއާޓާގައި ކުޅޭނީ ބޫޕޭ މާބޯ އާއި ޓުކޫޒާ އެމްބޭވޭގެ ޕެއާއާ އެވެ.

ފިރިހެން ސިންގަލްސް ބައިން ވާދަކުރި ރާއްޖޭގެ ނިބާލް އަހުމަދު އާއި ޒަޔާން ޒަކީ ވަނީ ފުރަތަމަ ބުރުން ބަލިވެފަ އެވެ. އެ ގޮތުން، ނިބާލް ބަލިވީ ޔޫއޭއީގެ ބާރަތު ލަތީޝް އަތުންނެވެ. އަދި ޒަޔާން ބަލިވީ ލަގްޒެމްބޯގެ ޖެރޯމް ޕަކޭ އަތުންނެވެ.

ފިރިހެން ޑަބަލްސްގެ ކުއާޓާ ފައިނަލުގައި ނިބާލް އާއި ޒަޔާންގެ ޕެއާ ކުއާޓާ ފައިނަލުގައި ކުޅޭނީ އަޒަރުބައިޖާންގެ ގަބީލޯވް އާއި ޕެންގެސްޓޫގެ ޕެއާއާ ދެކޮޅަށެވެ. މިކްސް ޑަބަލްސްގައި ރާއްޖޭގެ ދެ ޕެއާއެއް ކުއާޓާ ފައިނަލުގައި ކުޅޭނެ އެވެ. އެއީ، ޒަޔާން އާއި ނަބާގެ ޕެއާ އާއި ނިބާލް އާއި ނަބީގެ ޕެއާ އެވެ.

ޒަޔާން އާއި ނަބާގެ ޕެއާ ކުއާޓާގައި ކުޅޭނީ ޒެމްބިއާގެ އަލިންޓޫލާ ހަބޯވާ އާއި އަންޖުމަން ބަރްދްވާޖުގެ ޕެއާއާ އެވެ. އަދި ނިބާލް އާއި ނަބީގެ ޕެއާ ކުއާޓާގައި ނުކުންނާނީ، އަޒަރުބައިޖާންގެ ޖާހިދު އަލްހަސަނޯފް އާއި ހާޖަރު ނުރިޔޭވާގެ ޕެއާއާ ދެކޮޅަށެވެ.