މިސް ޔުނިވާސް މުބާރާތުގައި ދިވެހިލިބާހެއް ލައިގެން ރާއްޖެ ތަމްސީލުކޮށް މަރިޔަމް ޝައިނާ 21، ތާރީހުން ޖާގަ ހޯދައިފި އެވެ.

މެކްސިކޯގައި މިހާރު ކުރިއަށްދާ މިސް ޔުނިވާސް މުބާރާތުގައި ރޭ އޮތީ ސްވިމް ސޫޓާއި ގައުމީ ހެދުން ދައްކައިލުމުގެ މުބާރާތެވެ. 126 ގައުމެއްގެ ބައިވެރިން ބައިވެރިވި އެ މުބާރާތުގައި ޝައިނާ ދައްކައިލީ ބޯވަޅު އެޅި ރަތް ލިބާހެއްގަ އެވެ. ކަރުގައި ރަން ފައްޓަރެއް އަޅާފައި އޮތްއިރު އަނދެފައި ހުރީ ފޭއްޔެކެވެ.

މިސް ޔުނިވާސްގެ ސްވިމްސޫޓު މުބާރާތުގައި ޝައިނާ ބައިވެރިވީ ނޫ ކުލައިގެ ސްވިމްސޫޓަކާއެކު އެވެ.

މިއީ ދިވެއްސަކުން މިސް ޔުނިވާސް މުބާރާތުގައި ބައިވެރިވި ފުރަތަމަ ފަހަރެވެ. އޭނާ އެ މުބާރާތުގައި ބައިވެރިވީ ސަރުކާރުން އެކަން ކުށްވެރިކޮށް އެކަން ނުކުރުމަށް އިލްތިމާސް ކޮށްފައި އޮއްވަ އެވެ.

މިސް ޔުނިވާސް މުބާރާތުގައި ބައިވެރި ނުވުމަށް ގޮވާލައި ޔޫތު މިނިސްޓަރީން ނެރުނު ބަޔާނުގައި ބުނެފައި އޮތީ ހަށިގަނޑު ހާމަކޮށްގެން ބައިވެރިވާ އެއްވެސް ކުޅިވަރަކަށް ދިވެހި ސަރުކާރުން އެއްބާރުލުން ނުދޭނެ ކަމަށެވެ.

މިސް ޔުނިވާސްގެ ސްވިމްސޫޓު އަދި ގައުމީ ހެދުން ދައްކާލުމުގެ މުބާރާތުން ފައިނަލަށް ދަތުރު ކުރާނެ 30 ބައިވެރިންގެ ނަން އިއުލާނު ކުރާނީ މާދަމާ އެވެ. މުބާރާތުގެ ފައިނަލް އޮންނާނީ އާދީއްތަ ދުވަހު އެވެ.