ރައްޔިތުންގެ މަޖިލީހަށް މިހާރު ހުށަހަޅާފައި އޮތް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލަކީ ރާއްޖޭގެ ނޫސްވެރިކަމުގެ މިނިވަން ކަމަށް އޮތް ނުރައްކަލެއް ކަމަށް އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އިން ބުނެފި އެވެ.

މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ) އާއި އައިއެފްޖޭ ގުޅިގެން ނެރުނު ޖޮއިންޓް ސްޓޭޓުމެންޓުގައި ވަނީ ގާނޫނުއަސާސީން ކަށަވަރު ކޮށްދޭ ނޫސްވެރިކަމުގެ މިނިވަންކަމާއި ނޫސްތަކުގެ މިނިވަންކަން ކަށަވަރު ކޮށްދިނުމަށް ގޮވާލައިފަ އެެވެ.

މިހާރު އޮތް މީޑިއާ ކައުންސިލާއި ބްރޯޑްކާސްޓިން ކޮމިޝަން އުވައިލުމަށްފަހު އެ ބިލުގެ ދަށުން އުފައްދާ ކޮމިޝަނުގައި ހިމެނޭ ހަތް މެންބަރުންގެ ތެރެއިން ހަތަރު މެންބަރުންނާއި އެ ކޮމިޝަނުގެ ރައީސް އަދި ނައިބުރައީސް އައްޔަނު ކުރުމުގެ ބާރު ސީދާ ރައީސުލްޖުމްހޫރިއްޔާއަށް ލިބޭ ގޮތަށް އޮތް އޮތުން ކަންބޮޑުވުމެއްގެ ގޮތުގައި އެ ބަޔާނުގައި ފާހަގަކޮށްފައިވެ އެވެ.

އައިއެފްޖޭއިން ބުނެފައި ވަނީ މިހާރު ހުށަހަޅާފައިވާ ބިލަކީ ރާއްޖޭގައި އޮތް ނޫސްވެރިކަމުގެ މިނިވަން ކަމަށް އޮތް ނުރައްކަލެއް ކަމަށެވެ.

"މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން ބިލަކީ ދިވެހިރާއްޖޭގެ މީޑިއާގެ މިނިވަންކަމާއި އަދި ރެގިއުލޭޝަނަށް އޮތް ބޮޑު ނުރައްކަލެކެވެ، މި ގާނޫނު ހުށަހަޅާފައި ވަނީ އިންޑަސްޓްރީ އާ އެއްވެސް މަޝްވަރާއެއް ނުކޮށް،" އައިއެފްޖޭއިން ބުނެފައި ވެ އެވެ.

"އަދި މި ބިލުގެ ސަބަބުން ބާރުގަދަ، ނުފޫޒުގަދަ މީހުން ޖަވާބުދާރީ ކުރުވުމަށް ނޫސްވެރިންގެ ކޮނޑުގައި އެޅިފައި އޮންނަ ޒިންމާ އަދާކުރުމަށް ހުރަސް އެޅި، ނޫސްވެރިންގެ ކަންކަން ބެލެހެއްޓުމުގެ ބާރު ލިބެނީ ސަރުކާރުގެ ނުފޫޒު އޮންނަ ކޮމިޝަނަކަށް. އައިއެފްޖޭއިން ގޮވައިލަނީ ޑިމޮކްރެސީ އާއި ނޫސްވެރިކަމުގެ މިނިވަން ކަމުގެ ހައްގުގައި ވީހައިވެސް އަވަހަކަށް މީޑިއާތަކާ މަޝްވަރާ ހޯދަން،"

އެ ބިލު އެކުލަވައިލިއިރު، އެއްވެސް ވަރަކަށް މަޝްވަރާ ނުކުރާކަމުގެ ކަންބޮޑުވުން ފާޅުކޮށް އެމްޖޭއޭއިން ބުނެފައި ވަނީ ބިލުގެ ސަބަބުން މީޑިއާގެ މިނިވަން ގެއްލި، ނޫސްވެރިންގެ މައްޗަށް ސަރުކާރުގެ ނުފޫޒު އޮންނަ މިންވަރު ނުހަނު ބޮޑުވެގެންދާނެ ކަމަށެވެ.

"މީޑިއާތައް ރެގިއުލޭޓު ކުރުމުގެ ހައްގު އޮންނަންޖެހޭނީ އިތުރު އެއްވެސް ބައެއްގެ ނުފޫޒެއް ނެތި، އަމިއްލައަށް މީޑިއާތަކުން އެކަން ކުރެވޭނެ ގޮތެއްގައި ކަމަށް މި އެސޯސިއޭޝަނުން އަބަދުވެސް ގަބޫލު ކުރަން. އެއީ، މީޑިއާގެ މައިގަނޑު މަސައްކަތްތަކުގެ ތެރޭގައި ސަރުކާރާއި ދައުލަތުގެ މުއައްސަސާތަކާއި އިސްވެރިން ޖަވާބުދާރީ ކުރުވުން ހިމެނޭތީ،" އެމްޖޭއޭއިން ބުނެފައިވެ އެވެ.

އައިއެފްޖޭއިން ވަނީ މީގެ ކުރީގެ ސަރުކާރުތަކުގެ ނުފޫޒުން މީޑިއާ މަސައްކަތްތެރިންނާއި ޖަމިއްޔާތަކެއް ކުރިމަތިވެ، ރާއްޖޭގެ ބައެއް މީޑިއާތައް ބަންދު ކުރަންޖެހުނުކަން ފާހަގަކޮށްފަ އެވެ. އަދި މި ބިލު ފާސްކޮށްފި ނަމަ މީޑިއާގެ މިނިވަންކަން ގެއްލި މީގެ އެތައް އަހަރެއް ކުރީގައި ހައްގުތައް އޮތް ގޮތަށް ރުޖޫއަ ވާނެ ކަމަށެވެ.

ބައިނަލްއަގުވާމީ ޖަމިއްޔާތަކާއި ދިވެހި ޖަމިއްޔާތަކާއި ނޫސްވެރިންނާއި އިދިކޮޅު ޕާޓީތަކުން ވެސް މިކަމުގައި ކަންބޮޑުވުން ފާޅުކޮށްފައިވާއިރު، މި ބިލުގެ މަސައްކަތް ކުރިއަށް ގެންދަން ރާވާފައިވާ ގޮތާ މެދު ސަރުކާރާއި ސަރުކާރުގެ ފުލް ކޮންޓްރޯލް އޮތް މަޖިލީހުން ސީދާ ޖަވާބެއް ނުދެ އެވެ.