ތަކުރާރުކޮށް ފަސް ކުރަން ޖެހިފައިވާ ސައުތު އޭޝިއަން ގޭމްސް އަންނަ އަހަރުގެ ފެބްރުއަރީ މަހު ބާއްވަން ޕާކިސްތާން އޮލިމްޕިކް ކޮމިޓީން ބޭނުންވި ނަމަވެސް އެ ތާރީހުގައި އެކަން ނުކުރެވޭނެ ކަމަށް ޕާކިސްތާންގެ މީޑިއާ ރިޕޯޓްތައް ބުނެފި އެވެ.

ޕާކިސްތާން އޮލިމްޕިކް ކޮމިޓީން ނިންމާފައިވަނީ ފެބްރުއަރީ އެކެއް ނޫނީ ދެ ވަނަ ދުވަހު މުބާރާތް ފެށުމަށް، ސައުތު އޭޝިއާގެ އޮލިމްޕިކް ކައުންސިލް (އެސްއޭއޯސީ)އާ އެކު މަޝްވަރާކޮށް ފައިނަލް ވެސް ކުރިއެވެ. އަދި އެކަން، ޕާކިސްތާން ސަރުކާރަށް ވެސް ހިއްސާކުރި އެެވެ.

އެކަމަކު، މައްސަލަތައް ފެންމަތިވީ، ޕާކިސްތާން އޮލިމްޕިކް ކޮމިޓީން ސައުތު އޭޝިއަން ގޭމްސް ބާއްވަން ހަރަދުވާނެ ކަމަށް އަންދާޒާކޮށް ހެދި ގާތްގަނޑަކަށް ދެ މިލިއަން ޑޮލަރުގެ ބަޖެޓާ މެދު އުފެދުނު ހިޔާލުތަފާތުވުންތަކަކާ ހެދި އެވެ. އެ ގޮތުން، ޕާކިސްތާން ސަރުކާރުގެ އިކޮނޮމިކް ކޯޑިނޭޝަން ކޮމިޓީ (އީސީސީ) އިން ބުނެފައިވަނީ، މި ބަޖެޓްގައި މި ހިމަނާފައިވާ ކަންކަން މި ބަޖެޓުން ފުރިހަަމަ ނުކުރެވޭނެ ކަމަށެެވެ. އެއާ އެކު، އީސީސީން އަންގާފައިވަނީ، މި ބަޖެޓްގެ ތަފްސީލީ ކަންކަން ހިމެނޭ ރިޕޯޓެއް، ހުށަހެޅުމަށެެވެ.

ގޭމްސް ހޯސްޓްކުރަން، ތިން މިލިއަން ޑޮލަރުގެ ބަޖެޓެއް ޕާކިސްތާން އޮލިމްޕިކް ކޮމީޓީން އެ ގައުމުގެ ސަރުކާރަށް ހުށަހެޅި ނަމަވެސް، ސަރުކާރުން ހުށަހެޅި ބަޖެޓް މާ ބޮޑަށް ވަނީ ކުޑަކޮށްފަ އެވެ. އީސީސީން އަލިއަޅުވާލީ އެކަމަށެވެ.

މި ހުރިހާ ކަމަކަށް ބަަލައި، ޕާކިސްތާންގެ އޮލިމްޕިކް ކޮމިޓީގެ އޮފިޝަލެއް، އެ ގައުމުގެ މީޑިއާ އަކަށް ދިން އިންޓަވިއުއެއްގައި ބުނެފައިވަނީ، ކުރިން ކަނޑައެޅި ތާރީހުގައި ސައުތު އޭޝިއަން ގޭމްސް ނުބޭއްވޭނެ ކަމަށެވެ. އެއީ، ދެ މަސް ދުވަސް ތެރޭގައި، ހުރިހާ ކަމެއް ފުރިހަމަ ނުކުރެވޭނެތީ އެވެ. އެހެންވެ، އެންމެ އަވަހަށް ވެސް ދެން މި ގޭމްސް ޕާކިސްތާންގައި ބޭއްވޭނީ، އަންނަ އަހަރުގެ އޭޕްރީލް މަހުގައި ކަމަށް އޭނާ ވަނީ ބުނެފަ އެވެ.

އެކަމަކު، އިންޑިއާގެ ބައެއް މީޑިއާ ރިޕޯޓްތައް ބުނާގޮތުން، މި ގޭމްސް އަހަރުގެ ފަހުކޮޅަށް ފަސް ވުމުގެ ފުރުސަތު ވެސް އެބައޮތެވެ. އިންޑިއާ އިން ޕާކިސްތާންގައި ހޯސްޓްކުރާ ބައިނަލްއަގުވާމީ މުބާރާތްތަކުގައި ވާދަކުރާ ނިސްބަތް ވަރަށް މަދެވެ. އެ ގޮތުން، އަންނަ އަހަރު ބާއްވާ އައިސީސީ ޗެމްޕިއަންސް ޓްރޮފީ ކްރިކެޓް މުބާރާތަށް ވެސް އިންޑިއާ އިން ޕާކިސްތާނަށް ނުދާނެކަން ވަނީ އަންގައިފަ އެވެ.

މީގެ ކުރިން، ޕާކިސްތާނުގައި ސައުތު އޭޝިއަން ގޭމްސް ބޭއްވީ 1989 ވަނަ އަހަރާއި 2004 ވަނަ އަހަރު އެވެ.

އެންމެ ފަހުން ސައުތު އޭޝިއަން ގޭމްސް ބޭއްވީ 2019 ވަނަ އަހަރު ޑިސެމްބަރު މަހު ނޭޕާލުގެ ކަތުމަންޑޫ އާއި ޕޮކާރާގަ އެވެ. އޭގެ ކުރިން ބޭއްވީ 2016 ވަނަ އަހަރު، ފެބްރުއަރީ މަހު، އިންޑިއާގެ ޝިލޯން އާއި ގުވަހާޓީގަ އެވެ. އެ ދެ ފަަހަރު ވެސް ގޭމްސް ބޭއްވުނީ އެކި ފަހަރު މަތިން ޝެޑިއުލްކޮށްގެންނެވެ. އެންމެ ފަހުން ދެ ފަހަރު ވެސް ސައުތު އޭޝިއަން ގޭމްސް ބޭއްވުނީ ކަނޑައެޅި މުއްދަތަށް ވުރެ ފަހުންނެވެ.