އަސުންސިއޯން، ޕެރަގުއޭ (ނޮވެމްބަރު 15) - ފީފާ ވޯލްޑް ކަޕް ކޮލިފައިން ދެކުނު އެމެރިކާ ބުރުގައި ރޭ ވެނެޒުއޭލާ އާއި ބްރެޒިލް ކުޅުނު މެޗު 1-1 އިން އެއްވަރުވިއިރު، ޕެރަަގުއާ އިން 2-1 އިން އާޖެންޓީނާ ބަލިކޮށްފި އެވެ.

މިއީ، މި ފަހަރުގެ ކޮލިފައިންގައި ބްރެޒިލުން ކުޅުނު 11 މެޗުގެ ތެރެއިން ޕޮއިންޓު ގެއްލުނު ހަ ވަނަ މެޗެެވެ.

ވެނެޒުއޭލާ ދަނޑުގައި ކުޅުނު މި މެޗުގައި ބްރެޒިލުން ލީޑުނެގީ މެޗުގެ 43 ވަނަ މިނިޓްގައި، ރަފީނިއާ ޖެހި ގޯލުންނެވެ. ރަފީނިއާ ކުޅުނީ ނޭމާގެ 10 ނަމްބަރު ޖޯޒީގަ އެވެ. ލަނޑު ޖެހުމަށް ފަހު އުފާފާޅުކުރިއިރު، ނޭމާގެ ހަނދާންއާ ކުރި އެވެ.

ފުރަތަމަ ހާފު ލީޑުގައި އޮވެގެން ބްރެޒިލުން ނިންމާލި ނަމަވެސް ދެ ވަނަ ހާފު ފެށިގެން މިނިޓެއް ތެރޭ ވެނެޒުއޭލާ އިން އެއްވަރުކުރި އެވެ. މި ލަނޑު ޖެހީ ސެގޯވިއާ ޕެރޭޒް އެވެ.

މެޗުން މޮޅުވާން ބްރެޒިލަށް ޕެނަލްޓީއެއް ލިބުނެވެ. މެޗުގެ 62 ވަަނަ މިނިޓްގައި ވިނީޝިއުސް ފޮނުވާލި ޕެނަލްޓީ ނާކާމިޔާބުވެ، ރީބައުންސް ފުރުސަތުގައި ވެސް ގޯލަށް ބޯޅަ ފޮނުވާނުލެވުނެވެ.

ކޮލިފައިން އެއް ވަނައިގައި އޮތް އާޖެންޓީނާ އިން ރޭގެ މެޗުގެ 11 ވަަނަ މިނިޓްގައި ވަނީ ލަޓައުރޯ މާޓީނޭޒްގެ ގޯލުން ލީޑުނަގައިފަ އެވެ. އެކަމަކު، ލީޑުގައި އޮވެވުނީ އަށް ވަރަކަށް މިނިޓެވެ. މެޗުގެ 19 ވަނަ މިނިޓްގައިި، އެންޓޯނިއޯ ސަނާބްރިއާ ވަނީ ލަނޑެއް ޖަހައި އެއްވަރުކޮށްފަ އެވެ. ޕެރަގުއޭ މޮޅުވި ގޯލު ޖެހީ ދެ ވަނަ ހާފު ކުޅުން ފެށިގެން ދެ ވަނަ މިނިޓްގަ އެވެ. މި ލަނޑު ޖެހީ އަލްޑެރޭޓޭ ފެނާންޑޭޒް އެވެ.

މިއީ، މި ފަހަރުގެ ކޮލިފައިންގައި އާޖެންޓީނާ އިން ކުޅުނު 11 މެޗުގެ ތެރެއިން ބަލިވި ހަތް ވަނަ މެޗެެވެ. އެ ޓީމު އެއް ވަނައިގައި އޮތީ 22 ޕޮއިންޓާ އެކު އެވެ. ދެ ވަނައިގައި އޮތް ކޮލަމްބިއާ އަށް ވަނީ 19 ޕޮއިންޓް ލިބިފަ އެވެ. ކޮލަމްބިއާ ވަނީ ރޭ ކުޅުނު މެޗުގައި 4-0 އިން ޗިލީ ބަލިކޮށްފަ އެވެ. ބްރެޒިލް ތިން ވަނައިގައި އޮތީ 11 މެޗުން 17 ޕޮއިންޓް ހޯދައިގެންނެވެ.