ކުއްލި ހާލަތްތަކުގައި ރައްޔިތުންނަށް އެއް ނަންބަރަކުން ހިދުމަތް ދިނުމުގެ ގޮތުން ނެޝަނަލް އެމަޖެންސީ ކޯލް ސެންޓަރު "911" އިން ހިދުމަތް ދޭން ފަށާފައިވާ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ހާމަ ކުރައްވައިފި އެވެ.

މިނިސްޓަރު އިހުސާން "އެކްސް" ގައި ކުރެއްވި ޕޯސްޓެއްގައި ވިދާޅުވީ އެ މަސައްކަތް ކާމިޔާބުވީ ހޯމްލޭންޑް މިނިސްޓްރީ، ފުލުހުން، އެމްއެންޑީއެފް އަދި ހެލްތު މިނިސްޓްރީ ގުޅިގެން ކުރި ބުރަ މަސައްކަތުން ކަމަށެވެ.

ކުއްލި ހާލަތްތަކާ ގުޅިގެން ގައުމީ ހެލްޕް ލައިނެއް ގާއިމު ކުރުމަށް ސޯޝަލް ކައުންސިލަށް ކަރުދާހެއް ހުށަހެޅީ ހެލްތު މިނިސްޓްރީންނެވެ. އެ ހުށަހެޅުން ސޯޝަލް ކައުންސިލުން ފާސްކޮށް، އެ މަސައްކަތް ފަށާފައި ވަނީ އޮކްޓޯބަރު މަހުގެ ތެރޭގަ އެވެ.

އެ ހެލްޕް ލައިނުގެ މަސައްކަތް ކުރިއަށް ގެންދަނީ ހޯމްލޭންޑް މިނިސްޓްރީގެ ބެލުމުގެ ދަށުންނެވެ.

މިއީ ރާއްޖޭގެ ތާރީހުގައި ކުއްލި ހާލަތްތަކުގައި ގުޅުމަށް ނަންބަރެއް ތައާރަފް ކުރި ފުރަތަމަ ފަހަރެވެ. މީގެ ކުރިން ކަމެއް ދިމާވުމުން ގުޅަނީ ކަމާ ގުޅޭ މުއައްސަސާއަށެވެ.