މޮންޓެވީޑޯ، އުރުގުއޭ (ނޮވެމްބަރު 14) - އުރުގުއޭ ގައުމީ ފުޓްބޯޅަ ޓީމަށް ކުރިން ކުޅުނު ލެޖެންޑަރީ ފޯވާޑް، ޑިއޭގޯ ފޯލާން، ޕްރޮފެޝަނަލް ޓެނިސް މުބާރާތެއްގައި ކުޅުނު ފުރަތަމަ މެޗުން ބަލިވެއްޖެ އެވެ.

އުމުރުން 45 އަހަރުގެ ފޯލާން، ފުޓްބޯޅަ ކެރިއަރު ނިންމާލީ 2019 ވަނަ އަހަރު އެވެ. ޕްރޮފެޝަނަލް ލެވަލްގައި، ފޯލާން ޓެނިސް ކުޅެން ނިންމައި، ކުޅުނު ފުރަތަމަ މެޗަކީ، އުރުގުއޭ އޯޕަންގެ ފިރިހެން ޑަބަލްސް އިވެންޓްގެ މެޗެކެވެ.

ފޯލާންގެ ޑަބަލްސް ޕެއާ އަކީ، އާޖެންޓީނާގެ ފެޑެރީކޯ ކޯރިއާ އެވެ. އޭނާ އަކީ، ދުނިޔޭގެ ފިރިހެން ސިންގަލްސްގެ 101 ވަނަ އެވެ، މިދިޔަ އަހަރު އޭނާ ވަނީ ދުނިޔޭގެ 49 ވަނަ އަށް ވެސް ޖެހިލައިފަ އެވެ. ފޯލާން އާއި ކޯރިއާގެ ޕެއާ އިން މިއަދު ކުޅުނު މެޗު 47 މިނިޓް ތެރޭ ނިމުނީ، އެ ޕެއާ 6-1، 6-2 އިން ބަލިވެެގެންނެވެ.

މިއީ، އޭޓީޕީ ޗެެލެންޖް ޓުއާ މުބާރާތެކެވެ. މި މުބާރާތަކީ، އޭޓީޕީގެ ދެ ވަނަ ފަންތީގެ މުބާރާތެކެވެ. ޖޫނިއާ ލެވަލްގައި ޓެނިސް ކުޅެފައިވާ ފޯލާން އަށް މި މުބާރާތުގައި ކުޅެން ފުރުސަތު ލިބުނީ، ވައިލްޑްކާޑް ސްލޮޓެއްގަ އެވެ.

އިންޓަނޭޝަނަލް ޓެނިސް ފެޑެރޭޝަންގެ މާސްޓާސް އިވެންޓްތަކުގައި ކުޅެމުން އައި ފޯލާން ކުރިއަށް އޮތްތަނުގައި ވެސް އޭޓީޕީ ޗެލެންޖް ލެވަލްގެ މުބާރާތްތަކުގައި ކުޅެން ވަނީ ނިންމައިފަ އެވެ.

ޕްރޮފެޝަނަލް ފުޓްބޯޅަ ކެރިއަރުގައި ސީނިއާ ލެވަލް 20 އަހަރު ކުޅުނު ފޯލާން، މެންޗެސްޓާ ޔުނައިޓެޑާ 2002 ވަނަ އަހަރު ގުޅި އެ ޓީމަށް 98 މެޗު ކުޅެދިނެވެ. ފޯލާންގެ ކެރިއަރުގައި އެންމެ ބޮޑު ތަފާތެއް ދެއްކީ ވިޔަރެއާލް އާއި އެތުލެޓިކޯ އަށް ކުޅުނުއިރު އެވެ. އޭނާ ވަނީ ޔޫރަޕްގެ ލީގުތަކުގައި އެންމެ ގިނަ ގޯލު ޖަހާ ކުޅުންތެރިޔާ އަށް ދޭ ރަން ބޫޓު ދެ ފަހަރު ހޯދައިފަ އެވެ.

އުރުގުއޭ އިން 2010 ވަނަ އަހަރުގެ ފީފާ ވޯލްޑް ކަޕް ފުޓްބޯޅަ މުބާރާތުގެ ތިން ވަނަ ހޯދިއިރު، މުބާރާތުގެ މޮޅު ކުޅުންތެރިއަކަށް ހޮވުނު ފޯލާން ވަނީ، ޖެހިގެން އައި އަހަރު ބޭއްވި ކޮޕަ އެމެރިކާ ފުޓްބޯޅަ މުބާރާތް އުރުގުއޭ އަށް ހޯދައިދޭން އެހީތެރިވެދީފަ އެެވެ.