ވެރިކަން ކުރާ ޕީޕަލްސް ނެޝަނަލް ކޮންގުރެސް ޕާޓީ (ޕީއެންސީ) ގެ އެތެރޭގެ އިންތިހާބަށް ކުރިމަތިލީ ބައެއް ކެންޑިޑޭޓުންގެ ނަންތައް އުނިކޮށް، ކުރިމަތި ނުލާ ބައެއް މީހުންގެ ނަން އިތުރުކޮށް ކެންޑިޑޭޓުންގެ ލިސްޓު ގަޑުބަޑުކޮށްފައިވާ ކަމަށް ބުނެ އެ ޕާޓީގެ މެންބަރުން އެކަމާ ކަންބޮޑުވުން ފާޅުކުރަން ފެށުމުން، އެއީ "އިދާރީ އޮޅުމެއް" ކަމަށް ހަދައި، އިއްޔެ އާންމުކުރި ކެންޑިޑޭޓުންގެ ލިސްޓު ބާތިލުކޮށްފި އެވެ.

މައްސަލަ ހޫނުވުމުން ރޭ ޕީއެންސީން އާންމުކުރި ބަޔާނުގައި ބުނީ އާންމުކުރި "އެ ލިސްޓުގައި އިދާރީ މައްސަލަތައް ކޮންމެ ވެސް ވަރަކަށް ހުރިކަން ވަނީ ފާހަގަ ކުރެވިފަ" ކަމަށެވެ.

އެ ލިސްޓު މުރާޖައާކޮށް، ޝަރުތުތަކާއި އިޖުރާއަތު ފުރިހަމަވާ ކެންޑިޑޭޓުންގެ ފުރިހަމަ ލިސްޓެއް ނޮވެމްބަރު 16 ވަނަ ދުވަހުގެ ކުރިން އާންމު ކުރާނެ ކަމަށް އެ ޕާޓީން ބުނެ އެވެ.

"އަދަދު" އަށް އެނގިފައިވާ ގޮތުގައި ޕީއެންސީގެ އެތެރޭގެ އިންތިހާބަށް ކުރިމަތިލި މީހުންގެ ލިސްޓު އިއްޔެ އިއުލާނު ކުރިއިރު، ބައެއް ދާއިރާތަކަށް ކުރިމަތިލީ ކެންޑިޑޭޓުންގެ ނަންތައް ވަނީ އުނިކޮށްފަ އެވެ. އަދި ބައެއް މީހުން ކުރިމަތިލީ ދާއިރާ ނޫން އެހެން ދާއިރާތަކަށް ބަދަލު ކޮށްފައި ހުރި ކަމަށް ތުހުމަތުކޮށް ޕީއެންސީގެ ބައެއް މެންބަރުން މި ނޫހަށް މައުލޫމާތު ދިނެވެ.

"ވޯޓު ކަރުދާހުން ފާހަގަ ވެއްޓޭގޮތަށް މިއިނީ ހުޅުމާލެ މެދު ދާއިރާގެ ނައިބު [ރައީސް ކަމުން] ހުޅުމާލެ ދެކުނު ރައީސް ކަމަށް ބަދަލުވެފައި، ސަނީހު އަކީ [ހުޅުމާލެ] މެދު ދާއިރާގެ ނައިބު ރައީސް ކަމަށް ލާފައި ހުރި މީހެއް، ދެން މި ދާއިރާގެ ރައީސް ކަމަށް ކުރިމަތިލީ ޝާނީޒު ހާޝިމްގެ ނަމެއް ނެތް ލިސްޓުގައެއް،" ނަން ނުޖެހުމަށް ޝަރުތުކޮށް ވާހަކަދެއްކި ޕީއެންސީ މެންބަރަކު ބުންޏެވެ.

ހުޅުމާލެ ދެކުނު ދާއިރާގެ ރައީސްގެ މަގާމަށް ކުރިމަތިލާފައިވާ ކަމަށް ޕީއެންސީން އާންމު ކުރި ލިސްޓުން ފެންނަން އޮތީ އަހުމަދު ސަނީހު ހަނީފުގެ ނަން އެކަންޏެވެ. ނަމަވެސް މަޖިލިސް އިންތިހާބުގައި ޕީއެންސީގެ ޓިކެޓުގައި އެ ދާއިރާއަށް ވާދަކުރި ޝާނީޒް ހާޝިމް ވެސް އެ ދާއިރާއަށް ކުރިމަތިލި ކަމަށް މި ނޫހަށް މައުލޫމާތު ދިން މީހާ ބުންޏެވެ.

އެ ދާއިރާގެ އިތުރުން މާފަންނު އުތުރު ދާއިރާގެ ރައީސް ކަމަށް ކުރިމަތިލި އިސްމާއިލް އަބްދުއްރަހީމްގެ ނަން ވެސް ވަނީ މިއަދު އިއުލާނު ކުރި ކެންޑިޑޭޓުންގެ ލިސްޓުން އުނިކޮށްފަ އެވެ.

ޕީއެންސީން އާންމުކުރި ލިސްޓުގައި އެ ދާއިރާއަށް ކުރިމަތިލާފައިވާ ކަމަށް ފެންނަން އޮތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ އާއިލީ ގުޅުން އޮންނަ، ރައީސް އޮފީހުގެ މިނިސްޓަރު، އަލީ އާރިފްގެ ނަން އެކަންޏެވެ. އޭގެ އިތުރުން ބައެއް އެހެން ދާއިރާތަކަށް ކުރިމަތިލީ މީހުންގެ ނަންތައް ވެސް އުނިކޮށްފައިވާ ކަމަށް މި ނޫހަށް މައުލޫމާތު ދިން ޕީއެންސީގެ މެންބަރުން ބުންޏެވެ.