ހުޅުމާލޭގައި ވީބީ މާޓުގެ ފުރަތަމަ ރީޓެއިލް ފިހާރަ މާދަމާ ހުޅުވާނެ އެވެ.

ފިތުރޯނު މަގުގައި ހުންނަ އޯޝަން ފްރޮންޓް ރެސިޑެންސްގެ ގްރައުންޑު ފްލޯގައި ހުޅުވާ ވީބީގެ އާ ފިހާރަ އަށް މާދަމާ ޒިޔާރަތްކޮށް ވިޔަފާރިކުރާ ފަރާތްތަކުގެ ތެރެއިން ގުރުއަތުން ހޮވޭ 25 ކަސްޓަމަރަކަށް، 2،000ރ. ގެ ކޭޝް ވައުޗަރެއް ލިބޭނެ އެވެ.

"ޖުމުލަ 50،000ރ. ވައުޗަރުގެ ގޮތުގައި ދޫކުރާނެ. އޭގެ އިތުރުން މި މަހުގެ 15-21 ގެ ނިޔަލަށް ވިޔަފާރިކުރާ ފަރާތްތަކުގެ ތެރެއިން ގުރުއަތުން ހޮވޭ ތިން ފަރާތަކަށް ފައިސާގެ އިނާމު ލިބޭނެ،" ވީބީ މާޓުގެ ޖެނެރަލް މެނޭޖުރު އަހުމަދު އިޝާން ބުންޏެވެ.

އެ ގުރުއަތުން އެއް ވަނަ އަށް ހޮވޭ ފަރާތަކަށް 10،000ރ. ކަނޑައަޅާފައިވާއިރު، ދެ ވަނަ އަށް 5،000ރ. އަދި ތިން ވަނަ އަށް 2،500ރ. ލިބޭނެ އެވެ.

މި މާޓު ހުޅުވުމުން ފާހަގަކުރުމުގެ ހަރަކާތްތައް ހަވީރު 4:00 އިން ފެށިގެން ރޭގަނޑު 11:00 އަށް ކުރިއަށް ދާނެ އެވެ.

"ކާޓޫން ކެރެކްޓާތައް މާދަމާ ހަވީރު، މުޅި ސަރަހައްދުގައި ހުންނާނެ. އަދި އިތުރު ހަރަކާތްތައް ވެސް. ރޭގަނޑު އޮންނާނެ މިއުޒިކު ވެސް. އަދި 11 ޖަހާއިރު 2،000ރ ވައުޗަރު ލިބޭ ނަސީބުވެރިން ހޮވާނެ،" އިޝާން ބުންޏެވެ.

މި ފިހާރަ ފަރުމާކޮށްފައި ވަނީ އަރާމުކޮށް ވިޔަފާރިކުރެވޭ ގޮތަށް، ޖާގަ ތަނަވަސްކޮށެވެ. ކެއުންބުއިމާއި ގޭތެރޭގައި ބޭނުންކުރާ ސާމާނާއި މޭވާ އާއި ތަރުކާރީ ވެސް މިތަނުން ލިބޭނެ އެވެ.

ވީބީއަކީ މާލޭގައި ރީޓެއިލް ވިޔަފާރި އެންމެ ފުޅާކޮށް ކުރާ އެއް ކުންފުންޏެވެ. މާލޭގައި ވީބީގެ ދެ މާޓު ހުރިއިރު، ހުޅުމާލޭގައި މިހާރު ވެސް ހޯލްސޭލް ފިހާރައެއް ހިންގަ އެވެ.