އުރީދޫ މޯލްޑިވްސްއިން ހުޅުމާލޭގައި ޑިސެމްބަރު 20، ގައި ބޭއްވުމަށް ހަމަޖެހިފައިވާ ފަން ރަންގައި ރަޖިސްޓްރީ ކުރުމުގެ އެންމެ ފަހު ދުވަހަކީ ނޮވެމްބަރު 16، ކަމަށް ބުނެފި އެވެ.

އުރީދޫއިން ބުނީ ފަން ރަންގައި ބައިވެރިވާން ބޭނުންވާ ފަރާތްތަކަށް ޕޯޓަލް މެދުވެރިކޮށް ރަޖިސްޓްރޭޝަން ފުރިހަމަ ކުރެވޭނެ ކަމަށެވެ.

އުރީދޫ ފަން ރަންއަކީ ކޮންމެ އަހަރަކު އުރީދޫއިން ބާއްވަމުންދާ ހަރަކާތްތަކުގެ ތެރެއިން އާއްމުންގެ މެދުގައި އެންމެ މަގުބޫލު އެއް ހަރަކާތެވެ. މިދިޔަ އަހަރު ހުޅުމާލޭގައި ކުރިއަށް ގެންދިޔަ މަޖާ އެ ހަރަކާތްތަކުގައި 5،000 އަށްވުރެ ގިނަ މީހުން ވަނީ ބައިވެރިވެފަ އެވެ.

އުރީދޫގެ އެސިސްޓެންޓް މެނޭޖާ، ޕަބްލިކް ރިލޭޝަންސް، މަރިޔަމް ޝިއުނާ ހަމީދު "އަދަދު" އަށް ވިދާޅުވީ ފަން ރަންގެ އެންމެ ހާއްސަ ކަމަކީ ފަސް ކިލޯ މީޓަރު ހިމެނޭ އެ ދުވުމުގެ ކޮންމެ ކިލޯ މީޓަރެއް ނިންމާލުމަށްފަހު، މަޖާ ހަރަކާތްތައް ކުރިއަށް ގެންދާނެ ކަމަށެވެ.

"ކޮންމެ ކިލޯ މީޓަރެއް ނިންމޭއިރު ވެސް އިންނާނެ ކޮންމެ ވެސް ކަހަލަ އެކްޓިވިޓީއެއް. އެއީ ކުލަ ޖެހުން ކަމަށްވިޔަސް، ފޯމް ކަމަށްވިޔަސް، އޮބްސްޓެކެލްސް ކަމަށް ވިޔަސް، އެކަހަލަ ގިނަ ކަންތައްތަކެއް އެކުލެވުގެންދާނެ ފަން ރަންގެ ތެރޭގައި،" ޝިއުނާ ވިދާޅުވި އެވެ.

ފަން ރަންގައި ހަ އަހަރުން މަތީގެ ހުރިހާ ފަރާތްތަކަށް ބައިވެރިވުމުގެ ފުރުސަތު ވަނީ ހުޅުވާލާފަ އެވެ. އެ ދުވުމަކީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފަ، ޖޮގްކޮށްފަ، ދުވެފަ ނޫނީ ނަށަމުންވެސް އެ ދުވުން ނިންމިދާނެއެވެ.

އުރީދޫ ފަން ރަންގެ އަމާޒަކީ، ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުން ކަމަށް އުރީދޫއިން ބުންޏެވެ.

އުރީދޫ ފަން ރަންގެ ކިޓްތައް ލިބެން ހުންނަ ދެ ކެޓަގަރީ އަކީ ސްޓޭންޑަޑް ކިޓްސް އަދި ފަން ކިޓްސް ކެޓަގަރީ އެވެ.

ސްޓޭންޑަޑް ކިޓްގައި ފަން ރަން ޓީޝާޓް އަދި ރިސްޓްބޭންޑް ހިމެނޭ އިރު އަގަކީ 100ރ. އެވެ. 210ރ. އަށް ލިބޭ ފަން ކިޓްގައި އުރީދޫ ފަން ރަން ޓީޝާޓްގެ އިތުރުން ރިސްޓްބޭންޑަކާއި، ފޮތި ދަބަސް، އައިނު އަދި ބަންޑާނާ ހިމެނެ އެވެ. އަދި ބިބް ކަސްޓަމައިޒް ކުރުން ސްޓެންޑަޑް ކިޓާ އެކު 150ރ. ފަން ކިޓާއެކު 260ރ. އަށް ލިބެ އެވެ.