ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޖެނެރަލް ސެކްރެޓަރީ އަކަށް ނާހިލް އަހުމަދު ސިއްދީގު އައްޔަންކުރަން ނޯމަލައިޒިން ކޮމީޓީން ނިންމައިފި އެވެ.

ސްޕޯޓްސް މިނިސްޓްރީގެ ޕޮލިޓިކަލް ޑިރެކްޓަރުގެ ވަޒީފާ އަދާކުރަމުން އައި ނާހިލް، 24، އެފްއޭއެމްގެ ޖެނެރަލް ސެކްރެޓަރީގެ މަގާމަށް އައްޔަންކުރަން ނޯމަލައިޒިން ކޮމީޓީން ނިންމީ މަގާމަށް ކުރިމަތިލި ފަރާތްތަކުގެ ވަނަވަރާއި ތައުލީމީ ތަޖުރިބާ އަދި އިންޓަވިއު އަށް ބެލުމަށް ފަހު އެވެ. އެ މަގާމަށް ކުރިމަތިލުމަށް، އެފްއޭއެމް އިން ވަނީ ގެޒެޓްގައި އިއުލާނު ވެސް ކޮށްފަ އެވެ.

ރާއްޖޭގެ ޒުވާން ގައުމީ ޓީމުގައި ވެސް މީގެ ކުރިން ހިމެނުނު ނާހިލް ވަނީ ވެސްޓް އޮފް އިންގްލެންޑް ޔުނިވަސިޓީގެ ބިޒްނަސް މެނޭޖްމެންޓް އަދި ބިޒްނަސް އެޑްމިނިސްޓްރޭޝަނުން ފުރަތަމަ ޑިގްރީ އާއި މާސްޓާސް ޑިގްރީ ވެސް ހާސިލުކޮށްފަ އެވެ.

މީގެ ކުރިން، އެފްއޭއެމްގެ ކޮމްޕެޓިޝަން ޑިޕާޓްމަންޓްގައި މަސައްކަތްކުރި ނާހިލް ސަރުކާރުގެ ވަޒީފާ އަށް ދިއުމަށްޓަކައި، އެފްއޭއެމް އިން ވަކިވީ މި އަހަރުގެ ކުރީކޮޅުގަ އެވެ. އެފްއޭއެމްގައި، ވަޒީފާ އަދާކުރިއިރު، އެފްއޭއެމް މެދުވެރިކޮށް ލިބުނު ފުރުސަތުތެއްގައި، ފުޓްބޯޅައިގެ މެނޭޖްމަންޓް ސެޓްފިކެޓެއް ވެސް ނާހިލް ވަނީ ހާސިލްކޮށްފަ އެވެ.

ދާދި ފަހުން، ގައުމީ 16 އަހަރުން ދަށުގެ ޓީމު، އޭއެފްސީ 16 އަހަރުން ދަށުގެ މުބާރާތުގެ ކޮލިފައިންގައި ޗައިނާގައި މެޗުތައް ކުޅުނުއިރު، ރާއްޖެ ޓީމުގެ ހެޑް އޮފް ޑެލިގޭޝަންގެ ގޮތުގައި، ޗައިނާ އަށް ދަތުރުކުރި، ނާހިލް، އެފްއޭއެމްގެ ޖެނެރަލް ސެކްރެޓަރީގެ މަގާމުގެ ޒިންމާއާ ކުރިއަށް އޮތް ހަފްތާ ތެރޭގައި ހަވާލުވާނެ އެވެ.

އެފްއޭއެމްގެ ޖެނެރަލް ސެކްރެޓަރީގެ މަގާމު އެންމެ ފަހުން އަދާކުރީ ޖައުޝަން ޝަރީފް (ޖައު) އެވެ. އެފްއޭއެމްގެ ކުރީގެ ރައީސް، ބައްސާމް އަދީލް ޖަލީލްގެ ދައުރުގެ ފަހު ބައިގައި ޖެނެރަލް ސެކްރެޓަރީގެ މަގާމު އަދާކުރި ޖައު ވަނީ އޮގަސްޓް މަހު، ފީފާ އިން އައްޔަންްކުރި، ނޯމަލައިޒިން ކޮމިޓީން އެފްއޭއެމްގެ މަސައްކަތް ފެށިއިރު ވެސް ޖެނެރަލް ސެކްރެޓަރީގެ މަގާމު އަދާކޮށްފަ އެވެ. އެއީ، އެ މަގާމަށް ނޯމަލައިޒިން ކޮމީޓީން ފަރާތެއް ހަމަޖައްސަންދެން އެއްވެސް އުޖޫރައެއް ނުނަގާ ގޮތަށް ޖައުޝަން އަދާކުރެއްވި ޒިންމާއެއް ކަމަށް ނޯމަލައިޒިން ކޮމީޓީން ބުނެފައިވެ އެެވެ.

ޖެނެރަލް ސެކްރެޓަރީގެ މަގާމުން އިސްތިއުފާދޭން ޖައުޝަން، ހުށަަހެޅުމަށް ފަހު ވެސް، ފަހުން މަގާމުގައި ދެމިހުރީ، ނޯމަލައިޒިން ކޮމިޓީން އެދިގެންނެވެ.

ނާހިލް ވެގެންދާނީ މިދިޔަ 10 ވަރަކަށް އަހަރު ތެރޭ އެފްއޭއެމްގައި މަސައްކަތްކުރާ ހަތަރު ވަނަ ޖެނެރަލް ސެކްރެޓަރީ އަށެެވެ. އަދި އޭނާ އަކީ އެފްއޭއެމްގެ ތާރީހުގައި އެ މަގާމާ ހަވާލުވާ އެންމެ އުމުރުން ހަގު ޖެނެރަލް ސެކްރެޓަރީ އަށެވެ. ޖެނެރަލް ސެކްރެޓަރީގެ މަގާމަކީ، އެސޯސިއޭޝަންގެ އަސާސީ ގަވާއިދުގައިވާ ގޮތުގެ މަތިންނާއި ހިންގާ ކޮމިޓީގެ ލަފާ އާއި އިރުޝާދުގެ ދަށުން އެސޯސިއޭޝަންގެ ދުވަހުން ދުވަހަށް ކުރަން ޖެހޭ މަސައްކަތްތައް ހިންގުމަށް ހުންނަ ފަރާތެވެ.