ޔުނައިޓެޑް ވިކްޓަރީ (ޔޫވީ) އާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ގުޅިގެން، މިހާރު ކުރިއަށްގެންދާ އޭއެފްސީ ސީ ލައިސަންސް ކޯޗިން ކޯހުގައި މިހާރު ވެސް ކުޅެމުން އަންނަ ބައެއް ކުޅުންތެރިން އަންނަނީ ބައިވެރިވަމުންނެވެ.

އެ ގޮތުން، ޖުމްލަ، 26 ފަރާތަކުން ބައިވެރިވާ މި ކޯޗިން ކޯހުގައި ކިޔަވައިދެނީ އެފްއޭއެމް ޓެކްނިކަލް ޑިޕާޓްމަންޓްގެ އިސް ފަރާތެއްގެ ގޮތުގައި މަސައްކަތްކުރަމުން އަންނަ އަހުމަދު ޝާކިރު (ޝާކިއްޓެ) އާއި ޕްރޯ ލައިސަންސް ކޯޗު މުހައްމަދު ޝާޒްލީ (ޝާޒް) އެވެ.

މީގެ އިތުރުން، ކުރިން އެފްއޭއެމްގެ ޓެކްނިކަލް ޑިރެކްޓަރުގެ މަގާމު ފުރި އަހުމަދު ޝަރީފް (ޑުންގާ) އާއި ކޯޗު އަލީ ނިސްތާރު މުހައްމަދު ވެސް ބައެއް ސެޝަންތައް ނަގައިދިނުމުގައި ބައިވެރިވެ އެވެ.

އެފްއޭއެމް އިން ކުރިއަށްގެންދާ އޭއެފްސީ ސީ ލައިސަންސް ކޯޗިން ކޯހުގެ ތެރެއިން.--- ފޮޓޯ: މިރާޝް ނާޝިމް / އަދަދު

ކޯހުގެ ބައިވެރިންނަށް ބަލާއިރު، މި ވަގުތު ކުޅުމުގެ ކެރިއަރު ކުރިއަށްގެންދަމުން އަންނަ، ގައުމީ ޓީމަށް ގިނަ އަހަރުތަކެއް ވަންދެން ކުޅުނު، އަކުރަމް އަބްދުލް ގަނީ (އަކޫ)، މުހައްމަދު އުމެއިރުގެ އިތުރުން ފުރަތަމަ ޑިވިޝަނުގައި ގިނަ ޓީމުތަކަށް ކުޅެފައިވާ، ގޯލްކީޕަރު މުހައްމަދު ޝަފީއު (ޗެކް)، ފުރަތަމަ ޑިވިޝަނުގައި ގިނަ އަހަރުތަކެއް ކުުޅުނު އަލީ އިމްރާން އަދި ޒުވާން ގައުމީ ޓީމަށް ކުޅެ، އެސްޕަޔާ އެކަޑަމީގައި ވެސް ކޯޗިން މަސައްކަތްކުރަމުން އަންނަ ޒުވާން މިޑްފީލްޑަރު، މުހައްމަދު ޔަޒްދާން ހުސެއިން ހިމެނެ އެެވެ.

މީގެ އިތުރުން، ލެޖެންޑުންނަށް ބަލާއިރު، ގައުމީ ޓީމުގެ ކުރީގެ ފޯވާޑް، ކ. ހުރާގެ އަލީ ޝިހާމް (އައްޔަ) އާއި ހުރާ ޓީމުން ފާހަގަވި، އަތީފް އަހުމަދު ވެސް ހިމެނެ އެވެ.

މި ކޯހުގައި ނޭޕާލުގެ އާދިތުޔާ ކާކީ އާއި ސްޕެއިނުގެ އެންހެލް މުނޯޒް ވެސް ބައިވެރިވެ އެވެ. މުނޯޒް އަކީ ރާއްޖޭގެ ގިނަ ކްލަބްތަކަށް ކުޅެފައިވާ ކުޅުންތެރިއެކެވެ.

އެފްއޭއެމް އިން ކުރިއަށްގެންދާ ސީ ލައިސަންސް ކޯޗިން ކޯހުގެ ތެރެއިން.--- ފޮޓޯ: މިރާޝް ނާޝިމް / އަދަދު