ރާއްޖޭގައި ގާއިމު ކުރުމަށް ރައީސުލްޖުމްހޫރިއްޔާ ނިންމަވާފައިވާ ފައިނޭންޝަލް ސެންޓަރުގެ މަސައްކަތަށް އެއްބާރުލުން ދޭން އެއްބަސްވެ، އިކޮނޮމިކް މިނިސްޓަރީން ގަތަރު ފައިނޭންޝަލް ސެންޓަރާއެކު (ކިއުއެފްއެސް) އެމްއޯޔޫއެއްގައި ސޮއިކޮށްފި އެވެ.

އިކޮނިމިކް މިނިސްޓަރީން ބުނީ އެ އެމްއޯޔޫގެ ދަށުން ރާއްޖޭގައި ގާއިމު ކުރާ ފައިނޭންޝަލް ސެންޓަރު އިތުރަށް ޕްރޮމޯޓުވުމުގެ އިތުުރުން އެ ސެންޓަރު ގާއިމު ކުރުމަށް ބޭނުންވާ މުހިންމު ހިޔާލާއި މަޝްވަރާ ލިބޭނެ ކަމަށެވެ.

"މި އެއްބަސްވުމުގެ ދަށުން ފައިނޭންޝަލް ސެންޓަރެއް ރާއްޖޭގައި ގާއިމު ކުރުމަށް ބޭނުންވާ ފައިނޭންޝަލް މެނޭޖުމެންޓުގެ ބެސްޓު ޕްރެކްޓިސް އާ ބެހޭ މައުލޫމާތާއި ރެގިއުލޭޓަރީ ފްރޭމްވޯކުގެ އިތުރުން އޮޕަރޭޝަނަލް ސްޓެރެޓެޖީސް އާ ބެހޭ މައުލޫމާތު ހިއްސާ ކުރުމަށް ހާއްސަ ސެޝަންތައް ކިއުއެފްއެސް އިން ކުރިއަށް ގެންދާނެ،" އެއްބަސްވުމާ ގުޅިގެން އިކޮނޮމިކް މިނިސްޓަރީން ނެރުނު ބަޔާނުގައި ބުނެފައިވެ އެވެ.

އޭގެއިތުރުން އިއްޔެ ސޮއިކުރި އެއްބަސްވުމުގެ ދަށުން ފައިނޭންޝަލް އިންސްޓިޓިއުޝަންތަކާއި ކަމާ ގުޅުންހުރި ފަރާތްތަކާއި އެ ދާއިރާގެ މާހިރުންނާއި ރާއްޖެ ގުޅުވައިދީ އިތުރު ފުރުސަތުތައް ފަހިކޮށްދޭނެ ކަމަށް އެ މިނިސްޓަރީން ބުންޏެވެ.

އެ އެއްބަސްވުމާ ގުޅޭގޮތުން ވާހަކަދައްކަވަމުން ކިއުއެފްއެސްގެ ޗީފް އެގްޒެކެޓިވް އޮފިސަރު، ޔޫސުފް މުހައްމަދު އަލް ޖައިދާ ވިދާޅުވީ އެފަދަ އެއްބަސްވުމެއްގައި އިކޮނޮމިކް މިނިސްޓަރީ އާއެކު ސޮއި ކުރެވުމަކީ ލިބުނު ޝަރަފެއް ކަމަށެވެ.

"މި އެއްބަސްވުމުގެ ދަށުން ދުނިޔޭގެ މާލީ އިދާރާތަކާއި ވަރުގަދަ ގުޅުންތަކެއް ގާއިމު ކޮށްދިނުމުގެ އިތުރުން އިގުތިސާދީ ކުރިއެރުމަށް މަގުފަހިކޮށްދޭ ދެމެހެއްޓެނިވި މާލީ ނިޒާމެއް ގާއިމު ކުރުމުގެ އަމާޒަށް މަގުކޮށައިދޭނެ،" ޔޫސުފް ވިދާޅުވި އެވެ.