އެމެރިކާއިން ޗައިނާއާ ދެކޮޅަށް ހަނގުރާމައެއް ފަށަން ޖެހިއްޖެ ނަމަ އެފަދަ ހަނގުރާމައަކަށް ތައްޔާރުވާން ބޭއްވި ބޮޑު ތަމްރީނެއްގައި ދިވެހި ސިފައިން ބައިވެރިވެއްޖެ އެވެ.

އެމެރިކާއާއެކު ޖުމްލަ 10 ގައުމަކުން ބައިވެރިވި އެ ތަމްރީނު ކުރިއަށް ގެންދިޔައީ ނިމިދިޔަ އޮކްޓޯބަރު 7، އިން ފެށިގެން ހަވާއީ، އެލަސްކާ އަދި ޕަލާއޫގަ އެވެ. އެ ތަމްރީނުގައި ބައިވެރިވި ގައުމުތަކަކީ އެމެރިކާ، ދިވެހިރާއްޖެ، އިނގިރޭސިވިލާތް، ޖަޕާން، މެލޭޝިޔާ، ތައިލެންޑް، އިންޑޮނީޝިއާ، ނިއު ޒީލެންޑް، އޮސްޓްރޭލިއާ އަދި ކެނެޑާ އެވެ.

އެ ތަމްރީނަކީ ޗައިނާއާއެކު ހަނގުރާމައަކަށް ދާންޖެހިއްޖެ ނަމަ އެފަދަ ހާލަތަކަށް ތައްޔާރުވާން ބޭއްވި ތަމްރީނެއްކަން އެމެރިކާއިން ރަސްމީކޮށް ނުބުނެ އެވެ. އެކަމަކު، އެ ގައުމުގައި ހިންގާ އެންމެ ވަރުގަދަ އެއް ނޫސް ނިއު ޔޯކް ޓައިމްސް އިން ވަނީ އެކަން ކަށަވަރު ކުރުމަށްފަހު ރިޕޯޓްކޮށްފަ އެވެ. އެ ލިޔުމަށް އެމެރިކާގެ އޮފިޝަލުން ރަސްމީކޮށް މައުލޫމާތު ދީފައި ހުއްޓެވެ.

އެމެރިކާ އާއި ޗައިނާއިން ހަނގުރާމައަކަށް ގޮސްފި ނަމަ އެކަން ވާނީ މިހާތަނަށް ދުނިޔޭގައި ކުރާ އެންމެ ބޮޑު، ވަރުގަދަ ހަނގުރާމައަށެވެ. ޗައިނާ އަދި އެމެރިކާއަކީ ވެސް ނިއުކްލިއާ ދެ ބާރެވެ. އަދި އެ ދެ ގައުމުގެ އެލައިޒްގެ ގޮތުގައި ބައިވެރިވާނެ ކަމަށް ބެލެވޭ ގައުމުތަކުގައި ވެސް ނިއުކްލިއާ ބާރު އޮވެ އެވެ.

ކައިރި މުސްތަގްބަލެއްގައި ޗައިނާއާއެކު އެމެރިކާއިން ހަނގުރާމައަކަށް ދާންޖެހިދާނެ ކަމަށް އެންމެ ބޮޑަށް ބެލެވެނީ 2027 ގެ ކުރިން ޓައިވާން ހިފަން ތައްޔާރުވުމަށް ޗައިނާގެ ރައީސް ޝީ ޖިންޕިން އަންގަވާފައިވާތީ އެވެ. ޗައިނާއިން ޓައިވާނު ހިފައި، އެ ގައުމުގެ ބާރު އިތުރު ކުރަމީ އެމެރިކާއަށް އޮތް ނުރައްކަލެއް ކަމަށް އެ ގައުމުން ދެކެ އެވެ.

އެމެރިކާ އާއި ޗައިނާއިން ހަނގުރާމައަކަށް ގޮސްފި ނަމަ ބިމުގައި، ވައިގައި އަދި ކަނޑުގައި ވެސް ވަރުގަދައަށް ހަނގުރާމަ ކުރާނެ އެވެ. އޮކްޓޯބަރު މަހު ކުރިއަށް ގެންދިޔަ ތަމްރީނުގައި އެ ހުރިހާ ކަމަކަށް ތައްޔާރުވި އެވެ. ތަމްރީނުތަކުގައި އެކި ގައުމުތަކުން އެ ގައުމުތަކުގެ ހަތިޔާރާއި އަސްކަރީ އުޅަނދުތައް ވެސް ތަމްރީނުތަކުގައި ބޭނުން ކުރި އެވެ.

ރާއްޖެއަކީ އެ ތަމްރީނުތަކުގައި އެންމެ މަދު ސިފައިންނާއެކު ބައިވެރިވި އެއް ގައުމެވެ. އެކަމަކު، ތަމްރީނުގެ ސަބަބުން ރާއްޖެއަށް ފައިދާތަކެއް ކުރާނެ ކަމަށް އޭގައި ބައިވެރިވި މޯލްޑިވްސް ނެޝަނަލް ޑިފެންސް ފޯސްގެ މެރިން ކޯޕްސްގެ ކެޕްޓަން އަލީ ޝަރީފް "ވެސްޓް ހަވާއި ޓުޑޭ" އަށް ދެއްވި އިންޓަވިއުއެއްގައި ވިދާޅުވި އެވެ.

"މި ތަމްރީނުގެ ސަބަބުން އަހަރުމެންނަށް ވަރަށް ގިނަ ފައިދާތަކެއް ވާނެ. ދިވެހި ސިފައިން ގާބިލިއްޔަތުކަން ވެސް ތަމްރީނުގެ ސަބަބުން އިތުރުވާނެ. އަދި ޕާޓްނަރު ގައުމުތަކާއެކު ގުޅުން ބަދަހިވެ، ދުރު އަދި ކައިރި ގައުމުތަކާއެކު މަސައްކަތް ކުރުމުގެ އިތުބާރު ވެސް ބޮޑުވެގެންދާނެ،" އިންޑިއާއިން އަސްކަރީ ތަމްރީނު ހޯދައިގެން ހުންނެވި ޝަރީފް ވިދާޅުވި އެވެ.

ރާއްޖެއާއެކު އޮތް ގުޅުން ބަދަހި ކުރަން އެމެރިކާއިން މި ފަހުން ދަނީ ވަރަށް ގިނަ މަސައްކަތް ކުރަމުންނެވެ. އާ ސަރުކާރު ވެރިކަމާ ހަވާލުވި ފަހުން އެމެރިކާގެ އިސް އޮފިޝަލުން ރާއްޖޭގެ އިސް އޮފިޝަލުންނާ 30 އަށް ވުރެ ގިނަ ފަހަރު ވަނީ ބައްދަލުކޮށްފަ އެވެ. އެމެރިކާގެ ނޭވީގެ ބައެއް އިސް ވެރިން ވެސް ވަނީ ރާއްޖެ ވަޑައިގެންފަ އެވެ.

ރާއްޖެއަށް ތިން އަސްކަރީ ޕެޓްރޯލް އުޅަނދަކާއި އަސްކަރީ މަތިންދާބޯޓެއް ހަދިޔާ ކުރަން ވެސް އެމެރިކާއިން ވަނީ ނިންމައިފަ އެވެ. އަދި ގާތްގަނޑަށް 12 މިލިއަން ޑޮލަރުގެ އެހީ ދިނުމަށް ވެސް އެމެރިކާއިން ވަނީ ނިންމައިފަ އެވެ.

ހަވާއީގައި ބޭއްވި ތަމްރީނުގައި ރާއްޖެއިން ބައިވެރިވިއިރު، ޗައިނާއަކީ ރާއްޖޭގެ އެންމެ ބޮޑު އެއް ޑިވެލޮޕްމަންޓް ޕާޓްނަރެވެ. ސިނަމާލެ ބްރިޖު އިމާރާތް ކުރުމުގެ އިތުރުން އެއާޕޯޓުގެ ތަރައްގީއަށް ވެސް ޗައިނާއިން ދަނީ އެހީތެރިވަމުންނެވެ. ރާއްޖެއަށް އެންމެ ގިނައިން ލޯނު ދީފައިވާ ދެ ގައުމުގެ ތެރޭގައި ވެސް ޗައިނާ ހިމެނެ އެވެ.

ޗައިނާ އާއި ރައީސް ޑރ. މުހައްމަދު މުއިއްޒު އާ ވެސް ވަރަށް ގުޅުން ބޮޑެވެ. އެމަނިކުފާނު މާލޭގެ މޭޔަރަކަށް ހުންނެވިއިރު ވެސް ޗައިނާއާއެކު މަސައްކަތް ކުރެއްވި އެވެ. ނޮވެމްބަރު 17، 2023، ގައި ވެރިކަމާ ހަވާލުވެވަޑައިގެންނެވި ފަހުން ރައީސް މުއިއްޒުގެ އެންމެ ފުރަތަމަ ފުރަމާނަ ދަތުރު ކުރެއްވީ ވެސް ޗައިނާއަށެވެ.