ރާއްޖޭގައި 186 ރަށުގައި މީހުން އާބާދުވެ ދިރިނޫޅެވޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ޖުމްހޫރީ ދުވަސް ފާހަގަކުރަން އާދީއްތަ ދުވަހުގެ ރޭ ބޭއްވި ޖަލްސާގައި ދެއްވި ދިގު ތަގުރީރުގައި ރައީސް މުއިއްޒު ވިދާޅުވީ ރާއްޖެއަކީ ތިމާވެށީގެ ގޮތުން ނާޒުކު ގައުމެއް ކަމަށެވެ. ސަރަހައްދީ ތަރައްގީ އެއްފަސްކޮށް، މީހުން އުޅޭ ރަށްތަކުގެ އަދަދު މަދުކުރަން ޖެހެނީ އެެހެންވެކަން އެމަނިކުފާނު ފާހަގަ ކުރެއްވި އެވެ.

"އަޅުގަނޑުމެންގެ ގައުމަކީ ވަރަށް ނާޒުކު ގައުމެއް. ނާޒުކޭ މި ދަންނަވަނީ ތިމާވެށީގެ ގޮތުން ނާޒުކު ވާހަކަ. ސަރަހައްދީ ތަރައްގީ ބޭނުންވަނީ އެހެންވެ. 200 ރަށުގައި 186 ރަށުގައި އަޅުގަނޑުމެންނަށް ނޫޅެވޭނެ. މި ފެކްޓު ގަބޫލުކުރަން އެބަޖެހޭ. މޫސުމީ ބަދަލަކީ ހަގީގަތެއް،" އެ މަނިކުފާނު ވިދާޅުވި އެވެ.

ގާނޫނަށް ބަދަލު ގެނެސް، ކައުންސިލްތަކުގެ މެންބަރުންގެ އަދަދު ވެސް ރާއްޖެ އަށް އެކަށީގެންވާ މިންވަރަކަށް ކުޑަކުރަންޖެހޭ ކަމަށް ވެސް ރައީސް މުއިއްޒު ވިދާޅުވި އެވެ.އެ ބަދަލު ގެންނަ ގަސްދު ކުރާ ވާހަކަ އިއުލާނު ކުރެއްވި އެވެ.

އެ ވާހަކަ ދައްކާއިރަށް، އެއީ ކައުންސިލްތަކުގެ ބާރު ކަނޑުވާލަން ކުރާ ކަމެއް ކަަމަށް ބައެއް ފަރާތްތަކުން ވާހަކަ ދައްކާނެ ކަމަށާއި ނަމަވެސް އެއީ ހަގީގަތެއް ނޫން ކަމަށް ވިދާޅުވި އެވެ.

"100 މީހުން ތިބޭ ރަށުގައި ވެސް 5 ކައުންސިލަރުން އެބަ ތިއްބޭ. ކައުންސިލްގައި ތިބެނީ. ބައްޕަ އާއި މަންމަ އާއި ދަރިންނާ. އެކަކު ދަނީ މަހަށް،" ރައީސް ވިދާޅުވި އެވެ.

"އެއީއެއް ނޫން އަޅުގަނޑުމެން ބޭނުންވާ ގޮތަކީ."

އާބަދީ މަދު ރަށްރަށުގައި ކައުންސިލްތަކުގައި ތިބޭ މެންބަރުން އަދަދު މަދުކުރުމަށް ގާނޫނަށް ގެންނަންޖެހޭ ބަދަލުތައް ގެންނާނެ ކަމަށާއި، މުހިއްމީ ރައްޔިތުން ތަމްސީލުވާ ގޮތަށް އިންތިހާބީ ކައުންސިލެއް އޮތުން ކަމަށް ރައީސް ވިދާޅުވި އެވެ.

މިހާރު ކައުންސިލްތަކުގައި މަދުވެގެން 5 މެންބަރުން ތިއްބަވަ އެވެ.