ރަށު ރައްޔިތުން ނުކުމެ ފުވައްމުލަކުން މިއަދު ހަވީރު ގެއްލުން ހަތަރު އަހަރުގެ ކުއްޖާ ހޯދައިފި އެވެ.

ފުލުހުން ދާދި ދެންމެ ކުރި މެސެޖެއްގައި ބުނީ އެ ކުއްޖާ މިހާރު ފެނިފައިވާ ކަމަށާއި ފެނުނުއިރު އޭނާގެ ހާލު ރަނގަޅު ކަމަށެވެ.

ފުވައްމުލަކުން މައުލޫމާތު ދިން މީހަކު ބުނި ގޮތުގައި އެ ކުއްޖާ ފެނުނީ ކުއްޖާގެ އާއިލާ ދިރިއުޅޭ ފުލެޓާއި އެއް ފުލެޓު ދޫކޮށް ހުންނަ ފުލެޓަކުން ކަމަށެވެ. އަދި އެ ކުއްޖާ ހޯދުމުގައި ފުލުހުންގެ އިތުރުން ރަށުގެ ގިނަ ބަޔަކު ބައިވެރިވި ކަމަށް ވެސް އޭނާ ބުންޏެވެ.

"އަދަދު" އާ ވާހަކަ ދައްކަވަމުން އެ ސިޓީގެ މޭޔަރު އިސްމާއިލް ރަފީގު ވިދާޅުވީ، ގެއްލިގެން ހޯދީ ހަތަރު އަހަރުގެ ފިރިހެން ކުއްޖެ ކަމަށެވެ. އެ ކުއްޖާ އެންމެ ފަހުން ފެނުނީ މިއަދު ހަވީރު 5:00 ހާއިރު އެ ރަށު ދިގުވާނޑު އަވަށުގައި ހުންނަ ފުލެޓުތައް ކައިރިންނެވެ.