ރާއްޖެއަށް އަންނަ ޓޫރިސްޓުންނަށް ޑިއުޓީ ނުދައްކައި އެތެރެކުރެވޭނެ ދުންފަތުގެ ބާވަތްތައް ކަސްޓަމްސްއިން މިއަދު ކަނޑައަޅައިފި އެވެ.

ދުންފަތް އެތެރެކުރުމާ ބެހޭ ގަވާއިދުގެ ދަށުން ޓޫރިސްޓުންނަށް އެތެރެކުރެވޭ މިންވަރަށް ބަދަލު ގެނެސް އެ ގަވާއިދު މިވަދު ވަނީ އަމަލުކުރަން ފަށާފަ އެވެ. ސިނގިރޭޓު އެތެރެކުރެވޭނީ 18 އަހަރުން މަތީގެ ޓޫރިސްޓުންނަށެވެ.

އެގޮތުން, ޑިއުޓީ ދައްކަން ނުޖެހި އެތެރެ ކުރެވޭނީ 200 ސިނގިރޭޓު ނުވަތަ 25 ސުއްޓާ ނުވަތަ 250 ގްރާމް ދުންފަތެވެ. އެއީ 10 ފޮށި ސިނގިރޭޓު ނުވަތަ ސިނގިރޭޓު ކާޓަނެކެވެ. މިއީ އަމިއްލަ ބޭނުމަށް ގެންނަ ތަކެއްޗަށް ވާން ޖެހެ އެވެ.

ސިނގިރޭޓާއި ބިޑިން ނަގާ އިމްޕޯޓް ޑިއުޓީ 3ރ. އިން 8ރ. އަށް މަތިކުރަން ގާނޫނަށް ވަނީ ބަދަލު ގެނެސްފަ އެވެ. އެއާއެކު ރާއްޖޭގެ ބާޒާރުގައި ސިނގިރޭޓުގެ އަގު ވަނީ ވަރަށް ބޮޑަށް އުފުލިފަ އެވެ.

ރާއްޖޭގެ ފިހާރަތަކުން މިވަގުތު ސިނގިރޭޓު ފޮށްޓެއް ލިބެން ހުރީ 250ރ. އާއި 240ރ. އާ ދެމެދުގެ އަގެއްގަ އެވެ. އެންމެ ފުޅާދާއިރާއެއްގައި ރާއްޖެއަށް ސިނގިރޭޓު އެތެރެކޮށް ވިއްކާ ރޫޓު ފިހާރައިން މީގެ ކުރިން 995ރ. އަށް ވިއްކަމުން އައި ސިނގިރޭޓު ކާޓަނެއްގެ އަގު މިހާރު ހުރީ 2240ރ. އަށެވެ.

ސަރުކާރުން އަންދާޒާކުރާ ގޮތުގައި ގާނޫނަށް ގެނައި ބަދަލާއެކު އަންނަ އަހަރު ދައުލަތަށް އާމްދަނީގެ ގޮތުގައި އިތުރު 1.1 ބިލިއަން ރުފިޔާ ލިބޭނެ އެވެ.