ޓޫރިސްޓު ފެލިސިޓީތަކުން ބޭންކަށް ޑޮލަރު މާރު ކުރަން މަޖުބޫރުކުރާ މައްސަލައިގައި އެއްވެސް ދުލެއް ނުދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވުމާ ގުޅިގެން، ޓޫރިޒަމް އެޑްވައިޒަރު މުހައްމަދު ހަލީލު އިސްތިއުފާ ދެއްވުމުގެ އަޑުތައް ފެތުރިފައި ވަނިކޮށް، މިއަދުއިކޮނިމިކް ކައުންސިލަށް އޭނާ އައްޔަނު ކޮށްފި އެވެ.

ހަލީލު މެނޭޖިން ޑިރެކްޓަރަކަށް ހުންނެވި ޕަލްސް ކުންފުނިން އެމްއެމްއޭ އަށް ފޮނުވާފައިވާ ސިޓީގައި ބުނެފައި ވަނީ ޑޮލަރު މާރުކުރެވެން ނެތް ކަމަށާއި މިއީ އިންޑަސްޓްރީގެ ހާލަތާ ނުބައްދަލު ގަވާއިދެއް ކަމަށް ވިދާޅުވެފައިވެ އެވެ.

އެ ކުންފުނިން ހިންގާ ރިސޯޓުތަކަކީ ނޮޓިލަސް މޯލްޑިވްސް، ކަނޑިމަ މޯލްޑިވްސް، ނޯވާ މޯލްޑިވްސް އަދި އެވަލަން މޯލްޑިވްސް އެވެ.

ސަރުކާރުގެ އިގުތިސޯދީ ސިޔާސަތު ކަނޑައެޅުމުގައި މަޝްވަރާ ކުރިއަށް ގެންދާ އިކޮނޮމިކް ކައުންސިލް އަށް ރައީސް މުއިއްޒު މިއަދު ހަލީލު އައްޔަން ކުރެއްވީ މަޖުބޫރުން ޑޮލަރު މާރުކުރުމުގެ ގަވާއިދާމެދު ރިސޯޓު ދާއިރާގެ ވިޔަފާރިވެރިން ވަރަށް ބޮޑަށް ހިތްހަމަ ނުޖެހުން އުފެދިފައިވާ ދަނޑިވަޅެއްގަ އެވެ. މިކަމާ ގުޅޭ ގޮތުން އެޑްވައިޒަރު ހަލީލުގެ ބަހެއް ނުލިބެ އެވެ.

ޑޮލަރު މާރުކުރެވެން ނެތް ކަމަށް ބުނެ ގިނަ އަދަދެއްގެ ކުންފުނިތަކުން އެމްއެމްއާއި ކަމާ ގުޅޭ ސަރުކާރުގެ އޮފީސްތަކަށް ސިޓީ ފޮނުވި ނަމަވެސް، މިހާތަނަށް އެކަމަށް އިޖާބައެއް ނުދެ އެވެ.

ސަރުކާރުން ބޭނުން ވަނީ ޑޮލަރު މާރުކުރުމުގެ ސިޔާސަތު ތަންފީޒު ކުރުމަށެވެ.

ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުކޮށް އެމްއެމްއޭ އިން އޮކްޓޯބަރު 1 ގެޒެޓުކުރި ގަވާއިދުގެ ދަށުން އެ ފަދަ ތަންތަން އެމްއެމްއޭގައި ރަޖިސްޓްރީވުމަށް ދީފައި އޮތް ސުންގަޑިއަކީ އޮކްޓޯބަރު 30 އެވެ.

މި ގަވާއިދުގެ ދަށުން ޖެނުއަރީ 1، 2025 ފެށިގެން ރިސޯޓާއި ގެސްޓު ހައުސް އަދި ޓޫރިސްޓު އުޅަނދުތަކުން ޑޮލަރު މާރުކުރަން މަޖުބޫރު ވާނެ އެވެ.

އިކޮނޮމިކް ކައުންސިލްގައި އެޑްވައިޒަރު ހަލީލާއެކު ޖުމުލަ 14 މެންބަރުން ތިއްބަވާނެ އެވެ.

ކައުންސިލްގެ އެހެން މެންބަރުން

1. ފިޝަރީޒް މިނިސްޓަރު އަހުމަދު ޝިޔާމް
2. އިކޮނޮމިކް މިނިސްޓަރު މުހައްމަދު ސައީދު
3. ރައީސް އޮފީހުގެ މިނިސްޓަރު މުހައްމަދު ޝާހިދު
4. ޓޫރިޒަމް މިނިސްޓަރު އިބްރާހިމް ފައިސަލް
5. ފިނޭންސް މިނިސްޓަރު މޫސާ ޒަމީރު
6. ހައުސިން މިނިސްޓަރު ޑރ. އަލީ ހައިދަރު
7. ކައުންސިލް މިނިސްޓަރު އާދަމް ޝަރީފު
8. އެގްރިކަލްޗާ މިނިސްޓަރު ޑރ. އައިޝަތު ރަމީލާ
9. ޓްރާންސްޕޯޓު މިިސްޓަރު މުހައްމަދު އަމީން
10. އެންވަޔަރަމެންޓު މިިނިސްޓަރު ތޯރިގު އިބްރާހިމް
11. އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބް
12. ހަޔާ އެޑިއުކޭޝަން މިނިސްޓަރު މަރިޔަމް މާރިޔާ
13. ރައީސް އޮފީހުގެ މިނިސްޓަރު އިބްރާހިމް ހަލީލް
14. ޓޫރިޒަމް އެޑްވައިޒަރު މުހައްމަދު ހަލީލް