މޯލްޑިވްސް ކަރެކްޝަންސް ގެ ފައިސާތަކަކަށް ހިޔާނާތްތެރިވި ކަމުގެ ތުހުމަތު އޮތް އެސިސްޓަންޓް ކޮމިޝަނާ އޮފް ޕްރިޒަންސް މުހައްމަދު އާސިފު ވަޒީފާއިން ސަސްޕެންޑުކޮށްފި އެވެ.

އޭނާގެ މައްޗަށް ތުހުމަތު ކުރެވިފައި އޮތީ ކަރެކްޝަންގެ މުވައްޒަފުންގެ އިތުރު ހަރަކާތްތައް ހިންގާ ޕްރިޒަންސް ކްލަބުގެ ބަޖެޓުން 200،000 އަށް ވުރެ ގިނަ ރުފިޔާ އެކި އެކައުންޓުތަކަށް ޖަމާކުރި މައްސަލައެއްގަ އެވެ. އެ ކުލަބުގެ ރައީސްކަން ވެސް ކުރައްވާ އާސިފުގެ މައްޗަށް މި ތުހުމަތުތައް ކުރެވުނީ ޖުލައި މަހު އެވެ.

އާސިފު ސަސްޕެންޑުކުރި ހަބަރު ބައެއް މީޑިއާތަކުން ރިޕޯޓުކުރުމާ ގުޅިގެން "އަދަދު" އިން ސުވާލުކުރުމުން، ކަރެކްޝަންސްގެ މީޑިއާ އޮފިޝަލު ވަނީ އެކަން ކަށަވަރުކޮށްދީފަ އެވެ. އަދި ބުނީ އޭނާ ސަސްޕެންޑުކުރީ އިއްޔެ އިން ފެށިގެން ކަމަށެވެ. ނަމަވެސް ބަލަމުންދާ މައްސަލައެއް ކަމުން އިތުރު ތަފުސީލު ދެވެން ނެތް ކަމަށްވެސް ކަރެކްޝަނުން ބުންޏެވެ.

މައުލޫމާތު ލިބިފައިވާ ގޮތުގައި ސަސްޕެންޝަނާ ހިލާފަށް އާސިފު އަމަލުކުރާނަމަ އެކަން ކަރެކްޝަންސްއަށް އެންގުމަށް ވެސް އެ ހިދުމަތުން، މުވައްޒަފުންނަށް ވަނީ އަންގާފަ އެވެ.

މި މައްސަލަ ފެންމަތިވުމާއެކު، ތަހުގީގު އަވަސް ކުރުމަށް އެދި ކަރެކްޝަންސްގެ 35 އޮފިޝަލަކު ވަނީ ކޮމިޝަނާ އޮފް ޕްރިޒަންސް ހަސަން ޒަރީރަށް ޕެޓިޝަނެއްވެސް ހުށަހަޅާފަ އެވެ. ޖަވާބުގައި އެ މައްސަލަ ބަލަމުންދާ ކަމަށް ޒަރީރު އޭރު ވިދާޅުވި އެވެ.

ނަމަވެސް މި މައްސަލަ ދިގުލައިގެން ގޮސްފައިވާތީ ކަރެކްޝަންސްގެ ވެރިން މި މައްސަލަ އޮއްބާލަން މަސައްކަތް ކުރާ ކަމަށްވެސް އެ ޕެޓިޝަން ހުށަހެޅި މުވައްޒަފުން ތުހުމަތުކުރި އެވެ.