ކުރިއަށް އޮތް ހަތަރު އަހަރު އެމްއެންޑީއެފް އާއި ޕޮލިހަށް ޖުމުލަ 5000 މީހުން އިތުރު ކުރުމަކީ، ރަސްމާލެ އާއި މާލެ ދެމެދުގެ ކަނޑު އަޑީގައި ބިއްލޫރި ޓަނަލް އެޅުމަށް ރައީސް ޑރ. މުހައްމަދު މުއިއްޒު ވެވަޑައިގެންނެވި ފަދަ ވައުދެއް ކަމަށް، ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.

ރާއްޖެ ޓީވީން ރޭ ގެނެސްދިން ފަލަ ސުރުހީ ޕްރޮގްރާމުގައި އުމަރު ވިދާޅުވީ ބިއްލޫރި ޓަނަލް ފަދައިގެން ސިފައިންނާއި ފުލުހުން އިތުރުކުރުން ވެސް ވާނީ ނުފުއްދާނެ ވައުދަކަށެވެ.

މިހާރު ވެސް ދިވެހި އަސްކަރިއްޔާގައި ގާތްގަނޑަކަށް 4000 މީހުން ތިބޭއިރު، އެ އަދަދު ދެގުނަ ކުރުމުން ދެ ބިލިއަނަށް ހަރަދު އިތުރުވާނެ ކަމަށް ބެލެވޭ ކަމުގައި އުމަރު ނަސިރު ވިދާޅުވި އެވެ.

"އެ ދައްކަނީ ދެ ބިލިއަން ރުފިޔާ އަހަރު ސިފައިންނަށް ހަރަދު ކުރާ ވާހަކަ. އެއީ ކުރެވޭނެ ކަމެއް ނޫން. އަދި ކުރަން ބޭނުންވާ ކަންކަމެއް ވެސް ނޫން،" އުމަރު ވިދާޅުވި އެވެ.

"އެއީ ރަސްމާލެ އާއި މާލެ އާއި ދެމެދު ބިއްލޫރި ޓަނަލެއް އެޅުން ފަދަ ކަމެއް. އެކަމެއް ނުއެއް ވާނެ. އޮންނާނީ ފޮތުގައި ލިޔެފައި."

ދިވެހިރާއްޖެ އަށް ބޭނުން ވަނީ ވަރުގަދަ ކުޑަ ފޯހެއް ކަމަށާއި، ބޭނުން ވަނީ ޓޭންކަރުތަކާއި ބަރު ހަތިޔާރެއް ނޫން ކަމަށް އުމަރު ވިދާޅުވި އެވެ. އެއީ ދިވެހިރާއްޖެއަކީ އެހެން ގައުމަކަށް އަރަން ތައްޔާރުވާންޖެހޭ ބަޔަކަށް ނުވުން ކަމަށް އޭނާ ވިދާޅުވި އެވެ.

ފުލުހުންގެ އަދަދު 1000 އިތުރު ކުރެވިދާނެ ކަމަށާއި، ނަމަވެސް މިޒަމާނުގެ ފުލުހުންގެ ހިދުމަތަށް އިތުރު ކުރަނީ ފްރޮންޓު ލައިންގެ ފުލުހުން ނޫން ކަމަށާއި، ކޮމިއުނިޓީއާއެކު އުޅޭނެ ފުލުހުން ކަމަށް ވިދާޅުވި އެވެ.