އިލެކްޝަންސް ކޮމިޝަންގެ މިހާރު ރައީސް، ފުއާދު ތައުފީގުގެ މެންބަރުކަމުގެ ދައުރު ނޮވެމްބަރު މަހު ހަމަވާތީ، އެ މަގާމަށް އަބްދުލް ހަސީބު އިސްމާއިލް އައްޔަނު ކުރުމަށް މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ފާސްކޮށްފި އެވެ.

އެ މަގާމަށް އޭނާ އައްޔަނުކުރުމަށް ފާސްވީ ވޯޓުގައި ބައިވެރިވެވަޑައިގެންނެވި 67 މެންބަރުންގެ އިއްތިފާގުންނެވެ.

އަބްދުލްހަސީބު އަކީ މިދިޔަ ސަރުކާރުގެ ދުވަސްވަރު އިސްލާމިކް މިނިސްޓަރީގެ ޕާމަނަންޓް ސެކްރެޓަރީގެ މަގާމުގައި ހުންނެވި ބޭފުޅެކެވެ. ނަމަވެސް މިނިސްޓަރީގެ ބައެއް މުވައްޒަފުންނާ މެދު ވަރަށް ހަރުކަށިކޮށް އަމަލު ކުރާ ކަމަށް ބުނެ އެ މަގާމުން އޭނާ ވަކި ކުރެއްވީ އޭރު އިސްލާމިކް މިނިސްޓަރު، ޑރ. އަހުމަދު ޒާހިރުގެ އެދިގެންނެވެ.

އިލެކްޝަންސް ކޮމިޝަނުގެ އެސިސްޓެންޓު ޑިރެކްޓަރުގެ މަގާމުގައި މިހާރު ހުންނެވި އަބްދުލް ހަސީބުގެ ނަން މަޖިލީހަށް ފޮނުއްވީ ރައީސް ޑރ. މުހައްމަދު މުއިއްޒެވެ.

އިލެކްޝަންސް ކޮމިޝަނުގެ މެންބަރުކަމުގެ ދައުރަކީ ފަސް އަހަރެވެ. އެ ކޮމިޝަނުގެ މެންބަރެއްގެ ގޮތުގައި ކޮންމެ ބޭފުޅަކަށް ވެސް އަދާ ކުރެއްވޭނީ ދެ ދައުރެވެ. ފުއާދުގެ މެންބަރުކަމުގެ މުއްދަތު ހަމަވާނީ ނޮވެމްބަރު 24، ގަ އެވެ.