މޯލްޑިވްސް ޓެނިސް އެސޯސިއޭޝަން (ޓީއޭއެމް) ގެ ރައީސް ކަމަށް ދެ ވަނަ ދައުރަކަށް އަޙްމަދު ހަފީޒް އިންތިހާބުވެވަޑައިގެންފި އެވެ.

ޓީއޭއެމްގެ މި ފަހަރުގެ އިންތިހާބުގައި ކޮންމެ މަގާމަކަށްވެސް ކުރިމަތިލާފައިވަނީ އެންމެ ފަރާތެކެވެ. އެހެންކަމަށް ވުުމާ އެކު، މި ފަހަރުގެ އިންތިހާބު ކުރިއަށްދިޔައީ ފެންނަ ނުފެންނަ ވޯޓަކުންނެވެ. ޓީއޭއެމްގެ އިންތިހާބުގައި ވޯޓު ލެވޭ ސައްހަ މެމްބަރުންގެ އަދަދަކީ 275 އެވެ.

ރައީސް ކަމަށް ހަފީޒް އިންތިހާބުވެވަޑައިގެންނެވީ ވޯޓުލީ 95 މެމްބަރުންގެ ތެރެއިން 93 މެމްބަރުންގެ ވޯޓާ އެކުގަ އެވެ. ނުފެންނަ ކަމަށް ދެ ފަރާތަކުން ވޯޓުލި އެވެ.

ހަފީޒްގެ ރައީސް ކަމަށް އިންތިހާބުވީ 2020 ވަނަ އަހަރު އެވެ. ހަފީޒްގެ އައު ދައުރު ފުރިހަމަވާނީ 2028 ގަ އެވެ. ހަފީޒްގެ ފުރަތަމަ ދައުރުގައި ޓެނިސް އެސޯސިއޭޝަނުން ވަނީ މުހިންމު މަސައްކަތްތަކެއް ފަށައިފަ އެވެ. އެ ގޮތުން، މޯލްޑިވްސް ޓެނިސް ޗެލެންޖްގެ ނަމުގައި އިންޓަނޭޝަނަލް މުބާރާތެއް ވަނީ ފަށައިފަ އެވެ.

ހަފީޒްގެ އިތުރުން ޓީއޭއެމްގެ އިންތިހާބު ދެން ކާމިޔާބުކުރެއްވީ އައިމިނަތު މަލީލާ ސޯލިހާއި ހަސަން ޝާމް އަދި މުހައްމަދު ފަސީހެވެ. މީގެ ތެރެއިން ފަސީހު މަގާމަށް އިންތިހާބުވި މިއީ ހަތަރު ވަނަ ފަހަރެވެ.