އަމިއްލަ އިިންޝުއަރެންސް ހުސްނުވަނީސް އާސަންދަ ބޭނުން ނުކުރެވޭ ގޮތް ހެދުމުން، އިންޝުއަރެންސްގެ ހިދުމަތް ދޭ ބައެއް ކުންފުނިތަކުގެ ކޭޝްލެސް ހިދުމަތް މެދުކަނޑާލުމާއެކު، ހިތްހަމަނުޖެހުމާއި ޝަކުވާ ބޮޑުވެގެން ދިޔުމުން އެފަދަ ހާލަތްތަކުގައި ވެސް އަމިއްލަ ޖީބުން ފައިސާ ދައްކަން ނުޖެހި، އާސަންދަ ލިބޭނެ ކަމަށް އެންސްޕާއިން ބުނެފި އެވެ.

ނޮވެމްބަރު 1 އިން ފެށިގެން އަމަލު ކުރަން ފެށި އާ އުސޫލުގައި އޮތީ އަމިއްލަ އިންޝުއަރެންސް ކަވަރޭޖެއް އޮތްނަމަ އާސަންދަ ލިބޭނީ އެ ކަވަރޭޖެއް ހުސްވުމުން ކަމަށެވެ.

ނަމަވެސް އާސަންދަ ކުންފުނިން ރޭ ނަރުނު ބަޔާނެއްގައި ބުނެފައި ވަނީ ޕްރައިވެޓު އިންޝުއަރެންސްގެ ކަވަރޭޖު ނުވަތަ ހިދުމަތް ނުލިބޭ ހާލަތެއްގައި ނަމަ އެ ފަރާތަކަށް އާސަންދަ ސްކީމުން މިހާރު ވެސް ހިދުމަތް ލިބެމުންދާ ގޮތަށް ބޭސްފަރުވާގެ ހިދުމަތް ލިބިގެންދާނެ އެވެ.

"އަމިއްލަ އިންޝުއަރަންސް ކުންފުނިތަކުން ކޭޝްލެސް ޕޭމަންޓު ހުއްޓާލުމުގެ ސަބަބުންކަމުގައިވިޔަސް އަމިއްލަ އިންޝުއަރަންސް ޕޮލިސީން ކަވަރޭޖު ނުލިބި އަމިއްލަ ޖީބުން ފައިސާ ދައްކަންޖެހޭ ހުރިހާ ހާލަތެއްގައި އާސަންދަ ކަވަރޭޖު ކުރެކޭވެސް އެއްގޮތަށް ލިބިގެންދާނެ އެވެ،" އާސަންދަ ކުންފުނީގެ ބަޔާނުގައި ބުނެފައިވެ އެވެ.

އިޝްރާފު ބޮޑުވެގެން އާސަންދަ އިސްލާހުކުރުމުގެ މަސައްކަތް ސަރުކާރުން މިފެށީ، މާލީ ހާލަތު ވަރަށް ބޮޑަށް ދަށްވެގެން ދިޔުމުންނެވެ.

އަމިއްލަ އިިންޝުއަރެންސެއް އޮތްނަމަ އެ ހުސްނުވަނީސް އާސަންދަ ބޭނުން ނުކުރެވޭ ގޮތް ކުއްލިއަކަށް ހެދުމަކީ، ހޮސްޕިޓަލްގެ ކައުންޓަރުން ހިދުމަތް ދިނުމަށް ލަސްތަކެއް އަންނާނެ ކަމެއް ކަމަށް، ރާއްޖޭގެ އެންމެ ބޮޑު އަމިއްލަ ހޮސްޕިޓަލް، އޭޑީކޭއިން ވަނީ ބުނެފަ އެވެ.