ޕެރިސް (ނޮވެމްބަރު 3) - ފްރެންޗް ލީގުގައި ރޭ ލޯންސް އަތުން 1-0 އިން ޕީއެސްޖީ މޮޅުވިއިރު، އެ ޓީމު ލީގުގެ މެޗުތަކުން މޮޅުވާ ފަރަގާ މެދު މާ ބޮޑަށް ނުވިސްނާ ކަމަށް ޕީއެސްޖީގެ ކޯޗު ލުއިސް އެންރީކޭ ބުނެފި އެވެ.

ލޯންސް އަތުން ހޯދި މި މޮޅާ އެކު، ޕީއެސްޖީން ވަނީ ލީގުގެ އެއް ވަނައިގައި ހަ ޕޮއިންޓަށް ލީޑުފުޅާކޮށްފަ އެެވެ.

ޕީއެސްޖީ އެއް ވަަނައިގައި އޮތީ 10 މެޗުން 26 ޕޮއިންޓާ އެކު އެވެ. ދެ ވަނައިގައި އޮތް މޮނާކޯ އަށް 10 މެޗުން ވަނީ 20 ޕޮއިންޓް ލިބިފަ އެވެ. ތިން ވަނައިގައި އޮތް ލިލް އަށް 10 މެޗުން ލިބިފައި އޮތީ 18 ޕޮއިންޓެވެ. ހަތަރެއްގައި އޮތް މާސޭ މި ހަފްތާގައި ކުޅޭ މެޗުން މޮޅުވެއްޖެނަމަ އެ ޓީމަށް ދެ ވަނަ އަށް އެރޭނެ އެވެ. މާސޭގެ އޮތީ ނުވަ މެޗުން 17 ޕޮއިންޓެވެ.

އަމިއްލަ ދަނޑުގައި ކުޅުނު ޕީއެސްޖީ އަށް ރޭގެ މެޗުގައި ޖަހައިދިން ހަމައެކަނި ލަނޑު ކާމިޔާބުކުރީ އޮސްމާން ޑެމްބެލޭ އެވެ. މެޗުގެ ހަތަރު ވަނަ މިނިޓްގައި ޑެމްބެލޭ މި ގޯލު ޖެހީ ބްރެޑްލީ ބަކޯލާ ދިން ބޯޅައަކުންނެވެ. މެޗުގެ ފަހު 30 މިނިޓް، ލޯންސް އިން ކުޅުނީ ކުޅުންތެރިއަކު މަދުކޮށެވެ. އެއީ، 60 ވަނަ މިނިޓްގައި ލޯންސްގެ ޑިފެންޑަރު، އަބްދުކޮދީރު ހުސަނޯފް އަށް ރަތް ކާޑު ދެއްކުމުންނެވެ.

މި މެޗުގައި ޕީއެސްޖީން ލަނޑުޖަހާނެ ގިނަ ފުރުސަތުތަކެއް ވަނީ ނަގާލައިފަ އެވެ. ޕީއެސްޖީގެ ލަނޑުގެ ތަފާތަށް މި ވަގުތު ތާވަލުގައި 21 ގޯލު އޮތްއިރު، ހަގީގަތުގައި އެ ޓީމަށް ލިބޭ ގިނަ ފުރުސަތުތަކުގެ ތެރެއިން ބޭނުންހިފައި ގޯލު ޖަހާ ނިސްބަތް ރަނގަޅުނަމަ، މި އަށް ވުރެ ވެސް ފައިދާ ގޯލު އިތުރުވާނެ އެވެ. އެކަމަކު، އެއީ އެންރީކޭ ވިސްނާ ކަމެއް ނޫނެވެ.

"އަހަރެން މި ވަގުތަށް މި ބަލަނީ ޕޮއިންޓަށް، އޭގެ ފަރަގު އަހަރެން ބޭނުންވާ ހިސާބުގައި އޮތިއްޔާ އެ ނިމުނީ މި ވަގުތަށް. ދެން، ގިނައިން އަހަރެމެން މެޗުތަކުގައި ރަނގަޅަށް ކުޅޭ ވަރަކަށް ތިބުނާ މައްސަލަ ވެސް ހައްލުވާނެ،" އެންރީކޭ ބުންޏެވެ.

ފްރެންޗް ލީގުގެ 18 ޓީމުގެ ތެރެއިން މި ފަހަރު ބަލިނުވެ އޮތް ހަމައެކަނި ޓީމަކީ ޕީއެސްޖީ އެވެ.