ޕެރިސް (ޑިސެމްބަރު 11) - ޔުއެފާ ޗެމްޕިއަންސް ލީގުގައި ރޭ ޖިރޯނާ އަތުން 1-0 އިން މޮޅުވެ، ލިވަޕޫލުން މި ފަހަރުގެ މުބާރާތުގައި ދަމަހައްޓަމުން އަންނަ ސައްތަ އިން ސައްތަ ރެކޯޑް ކުރިއަށްގެންދިޔައިރު، ރެއާލް މެޑްރިޑާއި ޕީއެސްޖީން ކުޅުނު މެޗުތަކުން މޮޅުވެ، ލީގު ތާވަލުގެ ކުރިއަށް ޖެހިލައިފި އެވެ.

އެޓަލަންޓާ ދަނޑުގައި ރެއާލް މޮޅުވީ، 2-3 އިންނެވެ. ޕީއެސްޖީން ވަނީ ސަލްޒްބާގް ދަނޑުގައި 3-0 އިން ކުރިހޯދައިފަ އެވެ.

ލިވަޕޫލުން މި ފަހަރުގެ ޗެމްޕިއަންސް ލީގުގައި ކުޅުނު ހަ ވަނަ މެޗުގައި، ރޭ ޖިރޯނާ ބަލިކުރީ ދެ ވަނަ ހާފުގައި މުހައްމަދު ސަލާހު ޖެހި ޕެނަލްޓީންނެވެ. މި މެޗުގައި، ލިވަޕޫލްގެ ފޯވާޑް ޑާވިން ނޫނޭޒަށް ގޯލު ޖަހާނެ ރަނގަޅު ފުރުސަތުތަކެއް ލިބި ބޭނުމެއް ނުކުރެވުނެވެ.

ޗެމްޕިއަންސް ލީގުގެ ލީގު ތާވަލުގެ އެއް ވަނައިގައި ލިވަޕޫލް އޮތީ ހަ މެޗުން 18 ޕޮއިންޓާ އެކު އެވެ.

ދެ ވަނައިގައި އޮތް ލެވަކޫސަން އާއި ތިން ވަނައިގައި އޮތް އެސްޓަން ވިލާ އަށް ހަ މެޗުން ވަނީ 13 ޕޮއިންޓް ލިބިފަ އެވެ. ލެވަކޫސަނުން ވަނީ 1-0 އިން އިންޓަ މިލާން ބަލިކޮށްފަ އެވެ. އަދި އެސްޓަން ވިލާ އިން ލައިޕްޒިގު ދަނޑުގައި ވަނީ 3-2 އިން މޮޅުވެފަ އެވެ.

ރެއާލަށް ރޭގެ މެޗުގައި ލަނޑުތައް ޖަހައިދިނީ، ކީލިއަން އެމްބާޕޭ، ވިނީޝިއުސް ޖޫނިއާ އަދި ޖޫޑް ބެލިންހަމް އެވެ. އެޓަލަންޓާގެ ގޯލުތައް ޖެހީ، ޑި ކަޓެލެއާ އާއި އެޑަމޯލާ ލުކްމަން އެވެ. މި މޮޅާ އެކު، ރެއާލް ވަނީ ހަ މެޗުން ނުވަ ޕޮއިންޓާ އެކު، 18 ވަނަ އަށް ޖެހިލައިފަ އެވެ.

ޕީއެސްޖީން މޮޅުވީ ގޮންޒާލޯ ރާމޯސް، ނޫނޯ މެންޑޭޒް އަދި ޑެޒައިއާ ޑޯއު ޖެހި ގޯލުތަކުންނެވެ. މި މޮޅާ އެކު، ޕީއެސްޖީ ވަނީ ލީގު ތާވަލުގެ 24 ވަނަ އަށް ޖެހިލައިފަ އެވެ. އެއީ، ދެ ވަނަ ބުރަށް ދިއުމުގެ ޕްލޭއޮފްގެ ފަހު ޖާގަ ލިބޭ ފަހު މަގާމެވެ. ޕީއެސްޖީ އަށް ހަ މެޗުން ލިބުނީ، ހަތް ޕޮއިންޓެވެ.

ޗެމްޕިއަންސް ލީގުގައި ރޭ ބަޔާން މިއުނިކުން ވަނީ ޝަހުތަރު ޑޮނެސްކް ދަނޑުގައި 5-1 އިން މޮޅުވެފަ އެވެ. މެޗުގައި ފުރަތަމަ ލީޑުނެގި ޝަހުތަރުގެ ހަމައެކަނި ގޯލު ޖެހީ، ކެވިން އެވެ. ފަހަތުން އަރައި މޮޅުވި، ބަޔާންގެ މައިކަލް އޮލީސޭ ދެ ގޯލު ޖެހިއިރު، އެ ޓީމުގެ އަނެއް ގޯލުތައް ޖެހީ ކޮންރަޑް ލައިމާ، ޖަމާލް މުސިއާލާ އަދި ތޯމަސް މުލާ އެވެ.

ބަޔާން އޮތީ ހަ މެޗުން 12 ޕޮއިންޓާ އެކު، އަށް ވަނައިގަ އެވެ.