އަންނަ އަހަރަށް ސަރުކާރުން ހުށަހެޅި ދައުލަތުގެ ބަޖެޓުގައި ކައުންސިލްތަކަށް ދޭން ކަނޑައެޅި ފައިސާ މަދުކޮށް، ގާނޫނުން ދޭން ލާޒިމް ކުރާ މިންވަރަށް ވެސް ފައިސާ ހިމަނާފައި ނެތަސް ރައްޔިތުންގެ މަޖިލީހުން ބަޖެޓު ފާސްކުރާއިރު އެ އަދަދަށް ބަޖެޓު އޮންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ލާމަރުކަޒީ ގާނޫނުގެ 9. ވަނަ މާއްދާގެ ހ. ގެ އެއް ވަނަ ނަންބަރުގައި ބުނެފައިވާ ގޮތުން، ބަޖެޓުގައި ދައުލަތުގެ އާމްދަނީ ކަމަށް ލަފާ ކުރާ މިންވަރުގެ ފަސް ޕަސެންޓު މަދުވެގެން ކައުންސިލުތަކަށް ހާއްސަ ކުރަންޖެހެ އެވެ.

މި އަހަރު ދައުލަތުން ހުށަހެޅީ 56.6 ބިލިއަން ރުފިޔާގެ ބަޖެޓެކެވެ. ދައުލަތުގެ ޖުމުލަ އާމްދަނީގެ ގޮތުގައި ޖަހާފައިވަނީ 37.1 ބިލިއަން ރުފިޔާ އެވެ. ލާމަރުކަޒީ ގާނޫނުގެ ދަށުން ކައުންސިލްތަކަށް ބްލޮކް ގްރާންޓްގެ ގޮތުގައި ދޫކުރަނީ މި ފައިސާގެ ތެރެއިން ވަކި ކަމަކަށް ކަނޑައަޅާފައި ހުންނަ ފައިސާ އާއި ބިމު ކުލިން ލިބޭ އާމްދަނީ އަދި ޓްރަސްޓް ފަންޑް އާމްދަނީ އުނިކުރުމަށް ފަހު އެވެ.

"އަދަދު" އިން ހެދި ހިސާބުތަކުން ދައްކާ ގޮތުގައި މި ގޮތަށް އުނިކުރަން ޖެހޭ ބައިތައް އުނިކުރުމަށް ފަހު ޖެހޭ އާމްދަނީއަކީ 27.9 ބިލިއަން ރުފިޔާ އެވެ. އޭގެ ފަސް ޕަސެންޓަކީ 1.3 ބިލިއަން ރުފިޔާ އެވެ. މި ފައިސާގެ ތެރެއަށް އިތުރުކުރަން ޖެހެނީ ރިސޯޓުތަކާއި ދަނޑުވެރިކަމުގެ ބޭނުމަށް ދޫކޮށްފައިވާ ރަށްތަކުގެ ކުލީގެ 40 ޕަސެންޓެވެ. އެއީ 747.7 މިލިއަން ރުފިޔާ އެވެ.

އެހެންކަމުން މަދުވެގެން 2.1 ބިލިއަން ރުފިޔާ ކައުންސިލްތަކަށް އެހީދޭން ބަޖެޓުގައި ޖަހަން ޖެހެ އެވެ.

މިކަމާ ގުޅިގެން އިދިކޮޅު ސިޔާސީ ޕާޓީތަކާއި ލޯކަލް ކައުންސިލްތަކުގެ ރައީސުންނާއި ސިޓީތަކުގެ މޭޔަރުންވެސް ވަނީ ކަންބޮޑުވުން ފާޅުކޮށްފަ އެވެ. އަދި ސަރުކާރަށް ފާޑުކިޔާފަ އެވެ.

ރައީސް މުއިއްޒު މިކަމަށް ރައްދު ދެއްވީ މިއަދު ހުޅުމާލޭގައި ހުޅުވި ޕެޓް ކެއާ ސެންޓަރު ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. އެމަނިކުފާނުގެ ވާހަކައިގައި ވިދާޅުވީ މި ސަރުކާރަކީ ކައުންސިލްތަކާ ގުޅިގެން ހިނގާ ސަރުކާރުކާރެއް ކަމަށެވެ. އަދި އެކަން ސާބިތުކޮށްދޭން ތަކުރާރުކޮށް އެތައް މިސާލެއް ދެއްކެވި އެވެ.

"ބްލޮކް ގްރާންޓުގެ %5 އެއީ ގާނޫނުގަ އޮތް ގޮތް، ގާނޫނު އޮތް ގޮތަށް ހުރިހާ ކައުންސިލަކަށް މިފަހަރު ބަޖެޓު ފާސް ވާއިރުގަވެސް ބްލޮކް ގްރާންޓު %5 ލިބޭނެ، އޭގެ އިތުރަށް މި ދެންނެވި، ލޯކަލް ޓޫރިޒަމްގެ ތެރެއިން ވަކި އިންސައްތައެއް ހަވާލުކުރަން އަޅުގަނޑުމެން ގާނޫނު އިސްލާހުކުރަން ފޮނުވާނަން،" ރައީސް ވިދާޅުވި އެވެ.

މީގެއިތުރުންވެސް ގާނޫނުގަ ލިޔެވިފަ އޮތަސް ލޯކަލް ކައުންސިލްތަކާ ހަވާލުނުކުރެވި ހުރި ގިނަ ކަންތައްތަކެއް ކުރިއަށް އޮތް ދެތިން ހަފުތާގެ ތެރޭ އިއުލާނުކުރައްވާ އެކަންކަން ކައުންސިލްތަކާ ހަވާލުކުރައްވާނެ ކަމަށްވެސް އެމަނިކުފާނު ވިދާޅުވި އެވެ. ނަމަވެސް ތަފުސީލަކަށް ވަޑައެއް ނުގައްނަވަ އެވެ.

"ކައުންސިލްތައް، ލާމަރުކަޒީ ނިޒާމުގެ ތެރެއިން ބާރުވެރި ކުރުވައިގެން ކައުންސިލްތައް މެދުވެރިކޮށް، ސަރުކާރުގެ ފަށަލައެއް އެގްޒެކެޓިވް ބްރާންޗުގެ ފަށަލައެއް ކައުންސިލްތަކަކީ. ކައުންސިލްތައް މެދުވެރިކޮށް ކަންތައްތައް ކުރުމުގަ އަޅުގަނޑުމެން މި ގެންދަނީ އަމަލާ ބަހާ ދިމާކުރަމުން،" އެމަނިކުފާނު ވިދާޅުވި އެވެ.