ސްޕޯޓްސް މިނިސްޓްރީން އެންޑޯޒް ކޮށްފައި އޮތް ނަމަވެސް ރައީސް ޑރ. މުހައްމަދު މުއިއްޒުގެ ނުރުހުން އަމާޒުވުމުން، އަންނަ ހަފުތާގައި ބާއްވަން ނިންމާފައިވާ 15 ވަނަ ވޯލްޑް ބޮޑީބިލްޑިން ޗެމްޕިއަންޝިޕް ރާއްޖޭގައި ބޭއްވޭނެ ކަމާމެދު މިހާރު ސުވާލު އުފެދިއްޖެ އެވެ.

ނޮވެމްބަރު 5، އިން ނޮވެމްބަރު 11، އަށް އައްޑޫ ސިޓީގެ ކެނެރީފް ރިސޯޓުގައި ބާއްވަން ހަމަޖެހިފައިވާ "ވޯލްޑް ބޮޑީބިލްޑިން އެންޑް ފިސީކް ސްޕޯޓްސް ޗެމްޕިއަންޝިޕް" ރަސްމީކޮށް އޮކްޓޯބަރު 8، ގައި އިފުތިތާހުކޮށްދެއްވީ ކުޅިވަރާ ބެހޭ މިނިސްޓަރު އަބްދުﷲ ރާފިއު އެވެ.

އެކަމަކު، އިސްލާމް ދީނާ ނުގުޅޭ ކަމަށް ބުނެ މިސް ޔުނިވާސް މުބާރާތުގައި ރާއްޖޭގެ މޮޑެލަކު ބައިވެރިވުން ޔޫތު މިނިސްޓްރީން ކުށްވެރި ކުރި ފަހުން އުފެދުނު ބަހުސާއެކު، ރައީސް މުއިއްޒު ވަނީ އަންހެނަކު އަދި ފިރިހެނަކު ވިޔަސް "ހަށިގަނޑު ހާމަކޮށްގެން" ބާއްވާ މުބާރާތްތަކުން ގައުމަށާއި ދީނަށް ލިބޭނެ ރީތި ނަމެއް ކާމިޔާބެއް ނެތް ކަމަށް ވިދާޅުވެފަ އެވެ.

"ފިރިހެނަކުވިޔަސް، އަންހެނަކުވިޔަސް، މާތް ﷲ ރުހިވޮޑިގެންނުވާ ގޮތަކަށް ތިމާގެ ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން، ތިމާއަށް ނުވަތަ ތިމާގެ ދިނާއި ގައުމަށް ލިބޭނެ ހަގީގީ ރީތި ނަމެއް، އުފަލެއް، ކާމިޔާބީއެއް ނެތް!،" ރައީސް ވިދާޅުވި އެވެ.

ބޮޑީބިލްޑިން މުބާރާތްތަކަކީ ހަށިގަނޑުގެ ރީތިކަން ދެއްކުމަށް ބާއްވާ މުބާރާތެކެވެ. ރާއްޖޭގައި ބާއްވާ ބޮޑީބިލްޑިން މުބާރާތްތަކުގައި ވެސް ފިރިހެނުން ތިބެނީ ހަށިގަނޑުގެ ބޮޑު ބައި ފެންނަ ގޮތަށް ހެދުން އަޅައިގެންނެވެ. ބޮޑީބިލްޑިންގެ ހަރަކާތްތައް އެކި ފެންވަރުގައި ރާއްޖޭގައި ބާއްވާތާ އެތައް އަހަރުތަކެއްވެއްޖެ އެވެ.

އަންނަ ހަފުތާގައި ބާއްވާ ބޮޑީބިލްޑިން މުބާރާތް ކެންސަލް ކުރުމަށް ވެސް ބައެއް މީހުން ދަނީ ގޮވާލަމުންނެވެ. އޭގެ ތެރޭގައި ޝެއިހް ފަޒްލޫން ބިން މުހައްމަދު ފަދަ ދީނީ އިލްމުވެރިން ވެސް ހިމެނެ އެވެ. އޭގެ އިތުރުން ވެސް ވަރަށް ގިނަ ބަޔަކު ދަނީ މިސް ޔުނިވާސް މުބާރާތް ސަރުކާރުން ކުށްވެރި ކުރުމަށްފަހު ބޮޑީބިލްޑިން މުބާރާތެއް ރާއްޖޭގައި ބާއްވާތީ އެކަން ދެކޮޅު ނުޖެހޭ ކަމަށް ބުނަމުންނެވެ.

މި ނޮވެމްބަރުގައި މެކްސިކޯގައި ބާއްވާ މިސް ޔުނިވާސް ރީތީގެ މުބާރާތުގައި ރާއްޖެ ތަމްސީލު ކުރަނީ މަރިޔަމް ޝައިނާ، 21، އެވެ. އޭނާ އެ މުބާރާތުގައި ބައިވެރިވާ ވާހަކަ ނޫސްތަކަށް އެރުމުން ދީނީ ނަސޭހަތް ދޭ ބައެއް ޝެއިހުން ވަނީ އެކަން ވަރަށް ބޮޑަށް ކުށްވެރިކޮށްފަ އެވެ. އޭގެ ފަހުން ޔޫތު މިނިސްޓްރީން ވަނީ ޝައިނާ ވަރަށް ބޮޑަށް ކުށްވެރިކޮށް އެ މުބާރާތުގައި ބައިވެރިނުވާން އޭނާއަށް ގޮވާލައިފަ އެވެ.

"ދިވެހިންގެ ދީނާއި އަގީދާ އާއި ސަގާފަތާ ނުގުޅޭ ހަރަކާތްތަކާއި މުބާރަތްތައް ބޭއްވުމާއި އަދި އެކިއެކި ފަރާތްތަކުން ބާއްވާ އެފަދަ މުބާރާތްތަކާއި ހަރަކާތްތަކުގައި ދިވެހިން ބައިވެރިވުމަކީ ދިވެހި ސަރުކާރުން ބަލައިގަންނާނެ ކަމެއް ނޫން،" ޔޫތު މިނިސްޓްރީން ބުދަ ދުވަހު ނެރުނު ބަޔާނެއްގައި ބުންޏެވެ.

އަރަބިއްޔާ ސްކޫލުގެ ކުރީގެ ޓީޗަރު އަދި ދީނީ ނަސޭހަތް ދިނުމުގެ މަސައްކަތް ކުރާ ޒަމްޒަމް ފާރިޝް، ޝައިނާއާ ބެހޭ ގޮތުން ވާހަކަ ދައްކަމުން ސޯޝަލް މީޑިއާގައި ބުނެފައި ވަނީ ޝައިނާ ފަދަ އަންހެނުންނަށް ހައްގީ ނަރަކަ ކަމަށެވެ.

"އަންހެނުން އަރުވައިގެން އޮރިޔާންވާ މުބާރާތަށް ކިޔަންވީ މިސް ޔުނިވާސްއެއް ނޫން. އެއަށް ކިޔަންވީ މިސް ޖަހަންނަމަ. އެއަށް އަރައި ބަރަހަނާވާ އަންހެނުންނަކީ ދުނިޔެވީ މަދު ފައިސާ ކޮޅަކަށްޓަކައި މުޅި ދުނިޔޭގައި އޮރިޔާން އާންމު ކުރަން އުޅޭ ފާސިދު ފާޖިރުންތަކެއް. އެފަދަ މީހުންނަށް އެންމެ އައުލާކަން ބޮޑީ ޖަހަންނަމަ،" ޒަމްޒަމް ބުންޏެވެ.