މެންޗެސްޓާ (އޮކްޓޫބަރު 30) - ފްރާންސް ފުޓްބޯލް މެގަޒިން އިން ދުނިޔޭގެ އެންމެ މޮޅު ކުޅުންތެރިޔާ އަށް ދޭ ބެލޮންޑިއޯ އެވޯޑް ދިނުމުގައި ވަކި ގޮތެއް ކަނޑައެޅުމަށް އޮންނަ ކަމެއް އޭނާ އަށް ނުފެންނަ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

ފްރާންސް ފުޓްބޯލް އިން 1956 ވަނަ އަހަރުން ދެމުން އަންނަ ބެލޮންޑިއޯ އެވޯޑް، 2010 އިން 2015 އަށް ދިނީ ދުނިޔޭގެ މައި ފުޓްބޯޅަ އިދާރާ ފީފާގެ އެވޯޑާ އެއްކޮށްލައިގެންނެވެ. އެކަމަކު، ފަހުން ފީފާ އިން ބެސްޓް އެވޯޑްސްގެ ނަމުގައި އެވޯޑެއް ތައާރަފްކޮށް، އަނެއްކާ ވެސް ވަކިން އެވޯޑް ދޭން ނިންމީ އެވެ.

މި ފަހަރުގެ ބެލޮންޑިއޯ އެވޯޑް ހޯދީ މެންޗެސްޓާ ސިޓީގެ ސްޕެއިން މިޑްފީލްޑަރު ރޮޑްރީ އެވެ. އެ އެވޯޑް، ރެއާލް މެޑްރިޑްގެ ވިނީޝިއުސް ޖޫނިއާ އަށް ހައްގުވާ ކަމަށް ބުނެ، އެ ގޮތަށް އެކަން ނުވުމުން، ރެއާލް މެޑްރިޑުން ނިންމީ ބެލޮންޑިއޯ އެވޯޑް ހަފްލާ ބޮއިކޮޓްކުރާށެވެ.

މި ކަމާ ބެހޭގޮތުން ކުރި ސުވާލަށް ދިން ޖަވާބުގައި ގާޑިއޯލާ ބުނީ އެހެން ކްލަބްތަކުގެ ކަންކަމަށް ފާޑުކިޔުމަކީ އޭނާ ކުރާހިތްވާ ކަމެއް ނޫން ކަމަށާއި ކޮންމެ ބައެއްގެ ވެސް އަމިއްލަ ނިންމުންތަކެއް ހުންނާނެ ކަމަށެވެ.

"މިދިޔަ އަހަރު ހާލަންޑް، ތިން ތަށި ހޯދައި 50 އަށް ވުރެ ގިނަ ގޯލު ޖެހި. އޭނަ ގާތުގައި އަހަރެން ބުނިން، (ބެލޮންޑިއޯ ނުލިބުނަސް) އެ ތަނުގައި ހުރެވޭތީ އުފާކުރަމާ ހިނގާށޭ. ހަމަ އެ ގޮތަށް، ރޮޑްރީ އަށް ވެސް އަހަރެން އެެދުނީ، ރޮޑްރީ ހޯދީމަ އުފާވޭ، މަރުހަބާ ވެސް ކިޔަން،" ގާޑިއޯލާ ބުންޏެވެ.

"ބެލޮންޑިއޯ އަކީ ވަކި ގޮތަކަށް އޮންނަ ކަމެއް ނޫން، ވޯޓު މި ލަނީ ނޫސްވެރިން. އަހަރެން އެންމެނަށް މަރުހަބާ ކިޔަން، ސުވާލަކީ ވިނީޝިއުސް އަށް ލިބެން ޖެހޭ ހެއްޔޭ؟ ވެދާނެ އެހެން ކަމަށް ވެސް،"

ގާޑިއޯލާ ވަނީ މިދިޔަ 10-15 ވަރަކަށް އަހަރު ތެރޭ ސްޕެއިނުގެ ފުޓްބޯޅަ ބަދަލުވި ގޮތާއި ރޮޑްރީ ފަދަ ކުޅުންތެރިން ފުޓްބޯޅައިގައި ތަފާތު ދައްކަން ފެށި ގޮތް އެއީ މިސާލު ނަގަން ޖެހޭ ކަންކަން ކަމުގައި ބަލަން އެދިފަ އެވެ.

"އެއް ފަހަރު، ތި އެވޯޑްގައި ލަ މާސިއާ ތިން ކުޅުންތެރިން ނޮމިނޭޓްވި، އިނިއެސްޓާ އާއި ޒަވީ އަކަށް މެސީ ބަލިނުކުރެވުނު. މެސީ، ދެން އާދަޔާހިލާފު، އޭނަ ފަހަތަށް ޖައްސައިލެވުނީ ކިރިޔާ ވެސް ރޮނާލްޑޯ އަށް ތި އެވޯޑްގައި،" ގާޑިއޯލާ ބުންޏެވެ.

ރޮޑްރީ އަކީ އިނގިރޭސި ކްލަބަކަށް ކުޅެމުން ބެލޮންޑިއޯ ހޯދި ހަތް ވަނަ ކުޅުންތެރިޔާ އެވެ. އެކާވީސް ވަނަ ގަރުނުގައި އެކަން ހާސިލްކުރީ 2001 ވަނަ އަހަރު ލިވަޕޫލަށް ކުޅުނު މައިކަލް އޯވެން އާއި 2008 ވަނަ އަހަރު މެންޗެސްޓާ ޔުނައިޓެޑަށް ކުޅުނު ކްރިސްޓިއާނޯ ރޮނާލްޑޯގެ އިތުރުން މި ފަހަރު ރޮޑްރީ އެވެ.