ނޭޕްލްސް، އިޓަލީ (ޑިސެމްބަރު 17) - މެންޗެސްޓާ ސިޓީން ނަޕޯލީ އަށް ކުޅޭ ޖޯޖިއާގެ ވިންގް، ކްވިޗާ ކްވަރަޝްކޭލިއާ ގަންނަ ނަމަ 84 މިލިއަން ޑޮލަރުގެ ފީއެއް ދައްކަންޖެހޭނެ ކަމަށް މީޑިއާ ރިޕޯޓްތައް ބުނެފި އެވެ.

ސިޓީގެ އިތުރުން ބާސެލޯނާ އިން ވެސް އަންނަނީ، ކްވަރަޝްކޭލިއާ، 23، ހޯދަން މަސައްކަތް ކުރަމުންނެވެ. ސިޓީން ފުރަތަމަ ނިންމީ މި ސީޒަން ނިމުމުން ކްވަރަޝްކޭލިއާ އަށް ބިޑް ކުރުމަށެވެ. އެކަމަކު، ސިޓީގެ ފޯމު ވަރަށް ބޮޑަށް ދަށްވުމާ ގުޅިގެން ޖެނުއަރީ ޓްރާންސްފާގައި އެ ކްލަބުން ބޮޑު ހޭދައެއް ކުރަން ތައްޔާރުވަމުން އަންނައިރު، ކްވަރަޝްކޭލިއާ އަށް ބިޑްކުރާނެ ކަމަށް ރިޕޯޓްތައް ބުނެ އެވެ.

ޖޯޖިއާގެ ޑިނަމޯ ބަޓޫމީ ދޫކޮށް 10 މިލިއަން ޑޮލަރުގެ އަގަކަށް 2022 ވަނަ އަހަރުގެ ޖުލައި މަހު ނަޕޯލީ އަށް ބަދަލުވި ކްވަރަޝްކޭލިއާގެ ޑިމާންޑް ބޮޑުވުމާ ގުޅިގެން އޭނާ 100 މިލިއަން ޑޮލަރަށް ވެސް ނުވިއްކާނެ ކަމަށް އެ ޓީމުގެ ރައީސް އައުރޭލިއަން ޑީ ލައުރެންޓީސް މީގެ ކުރިން ވިދާޅުވި އެވެ.

އެކަމަކު، ނަޕޯލީގެ މާލީ ހާލަތު ހުރި ގޮތުން އާ ކުޅުންތެރިން ގަންނަން އިންވެސްޓްކުރެވެން އޮތީ ކުޅުންތެރިން ވިއްކައިގެން ލިބޭ އާމްދަނީ އަށް ބަލައިގެން ކަމަށްވާތީ، ބޮޑު އަގުގައި ބައެއް ކުޅުންތެރިން ދޫކޮށްލަން އޮތީ ޖެހިފަ އެވެ.

ކްވަރަޝްކޭލިއާއާ އެކު، ނަޕޯލީން ހަދާފައި އޮތް ކޮންޓްރެކްޓް އޮތީ 2027 ވަނަ އަހަރުގެ ޖޫން މަހުގެ ނިޔަލަށެވެ. އެހެންވެ، ނަޕޯލީން ވަނީ ކްވަރަޝްކޭލިއާގެ އަގު 84 މިލިއަން ޑޮލަރު އަށް ކުޑަކޮށްފަ އެވެ.

ނަޕޯލީ އަށް މި ސީޒަނުގައި ކުޅެދިން 17 މެޗުން ކްވަރަޝްކޭލިއާ ވަނީ ފަސް ގޯލު ޖަހައި ތިން ގޯލު ޖަހަން ފުރުސަތު ތަނަވަސްކޮށްފަ އެެވެ.