މިނިވަން މުއައްސަސާތަކުގެ ރައީސުންނާއި ނައިބުން އައްޔަންކުރުމުގެ ބާރު ރައީސުލްޖުމްހުރިއްޔާއަށް ލިބިދޭ ގޮތަށް ގާނޫނަށް ހުށަހަޅާފައިވާ އިސްލާހުތަކަށް ކުރިމަތިވި ފާޑުކިޔުންތަކާއެކު، އެއްވެސް މުއައްސަސާއަކަށް ނުފޫޒު ނުފޯރުވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރާއްޖޭގައި މިވަގުތު އޮތް އެންމެ މުހިންމު ދެ މިނިވަން މުއައްސަސާ ކަމަށްވާ އިލެކްޝަންސް ކޮމިޝަން (އީސީ) އާއި އެންޓި ކޮރަޕްޝަން ކޮމިޝަން (އޭސީސީ) ގެ ވެރިން އައްޔަންކުރުމުގެ ބާރު ރައީސަށް ލިބިދޭ ގޮތަށް ސަރުކާރުން ގާނޫނަށް އިސްލާހު ހުށަހެޅީ އޮކްޓޯބަރު 27، ގަ އެވެ. އެ ބިލު ބަލައިގަނެ މިއަދު ވަނީ މަޖިލީހުގައި ބަހުސްކޮށްފަ އެވެ.

ބިލަށް ބަހުސްކުރި ގިނަ އިދިކޮޅު މެންބަރުންގެ އިތުރުން ސޯޝަލް މީޑިއާގައި އާންމުންވެސް ވަނީ މިއީ ޑިމޮކްރަސީގައި ރާއްޖެއިން ފަހަތަށް އަޅާ ފިޔަވަޅެއް ކަމަށް ބުނެ ސަރުކާރަށް ފާޑުކިޔަމުންނެވެ.

މި ފާޑުކިޔުންތަކަށް ރައްދު ދެއްވައި ރައީސް މުއިއްޒު މިރޭ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ދައުލަތުގެ ބާރުތަކާއި، މިނިވަން މުއައްސަސާއަތައް އަދި އިންތިހާބުކުރެވޭ ބަޔަކަށް އެމަނިކުފާނު މިހާތަނަށް ވެސް ނުފޫޒު ނުފޯރުވާ ކަމަށާއި ކުރިއަށް އޮތްތަނުގައި ވެސް ނުފޯރުވާނެ ކަމަށެވެ.

ނަމަވެސް އެތަންތަން އިސްލާހު ކުރަން ގާނޫނަށް ގެންނަން ޖެހޭ ކަމަށް ފެންނަ ބަދަލުތައް ސަރުކާރުން މަޖިލީހަށް ހުށަހަޅާނެ ކަމަށްވެސް ރައީސް ވިދާޅުވި އެވެ.

"އެފަދަ ފަރާތްތަކުން އަދުލުވެރިކަމާއި، އިންސާފާއި، ހަމަހަމަކަމާއެކު، ވަކި މީހަކަށް ބެލުމެއްނެތި، ހަލުއި ދުވެލީގައި މަސައްކަތްކުރަމުން ދޭތޯ ކަށަވަރުކުރުމާއި އެ މަގަށް ކަންކަން ބައްޓަން ކުރުމަށް ކުރަންޖެހޭ އެންމެހާ ކަންކަން ކުރުމަށް، ގާނޫނާއި ގަވާއިދަށް ގެންނަންޖެހޭ އިސްލާހެއްވާނަމަ އެ އިސްލާހެއް ގެންނަން ސަރުކާރުން ހުށަހަޅަމުން ގެންދާނެ ވާހަކަ ދަންނަވަން،" ރައީސް ވިދާޅުވި އެވެ.

ރައީސް މިހެން ވިދާޅުވި ނަމަވެސް މިއަދު މަޖިލީހުގައި މި ބިލަށް ބަހުސް ކުރައްވަމުން ވެރިކަންކުރާ ޕީއެންސީގެ ބައެއް މެންބަރުން ވަނީ ވަކިވެފައިވާ ތިން ބާރަށާއި މިނިވަން މުއައްސަސާތަކަށް ސީދާ ރައީސްގެ ބާރު އޮންނަން ޖެހޭނެ ކަމަށް ފާޅުގައި ވިދާޅުވެފަ އެވެ.

އެގޮތުން، ރައްޔިތުންގެ މަޖިލީހާއި ޖުޑީޝަރީން ވެސް ކަމެއް ގޯސްކޮށް ކުރާނަމަ އެކަން އިސްލާހުކުރުމުގެ ބާރު ރައީސްއަށް ދޭން އޭދަފުށީ ދާއިރާގެ މެންބަރު އަހުމަދު ސަލީމް ގޮވާލެއްވި އެވެ.

"މިކަންކަން އޮންނަން ޖެހޭނީ ސީދާ ރައީސުލްޖުމްހުރިއްޔާގެ އަތްޕުޅުގަ. މުޅި ގައުމު އިސްލާހު ކުރުމުގަ ބޮޑު ބާރު އޮންނާނީ ރައީސްގެ [އަތްޕުޅުގަ]. އަދި ޖުޑީޝަރީން ކަމެއް ގޯސްކޮށް ހިނގިޔަސް އެކަންކަން އިސްލާހުކުރުމުގެ ބާރުވެސް އޮންނަންވާނީ ރައީސުލްޖުމްހުރިއްޔާގެ އަތްޕުޅުގަ. އަދި މި މަޖިލީހުން ކަމެއް ގޯސްކޮށް ހިނގިޔަސް އެކަން އިސްލާހުކުރުމުގެ ބާރުވެސް އޮންނަން ޖެހޭނީ ރައީސުލްޖުމްހުރިއްޔާގެ އަތްޕުޅުގަ،" މިއަދުގެ ޖަލްސާގައި ވާހަކަދައްކަވަމުން ސަލީމް ވިދާޅުވި އެވެ.

މީގެއިތުރުން، ގާނޫނަށް މިފަދަ އިސްލާހެއް ގެންނަން ޖެހުނު ސަބަބަކީ ސަރުކާރުން ބޭނުންވާ ގޮތަށް ކޮމިޝަންތައް ނުހިންގުން ކަމަށް ފޭދޫ ދެކުނު ދާއިރާގެ މެންބަރު އިބްރާހިމްދީދީ މިއަދު ވިދާޅުވި އެވެ. އަދި މިނިވަން މުއައްސަސާތަކުގެ އިތުރުން އަތޮޅު ކައުންސިލްތަކުގެ ވެރިންވެސް ރައީސް އައްޔަންކުރަން ޖެހޭ ކަމަށް އޭނާ ވިދާޅުވި އެވެ.