ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބުނު މީހުންނަށް އާ ޕްލޮޓުތައް ބަހަން މިއަދު ގުރު ނަގާއިރު، ގޯތި ލިބުނު މީހުންގެ ބަދަލުގައި ސަރުކާރުގެ އޮފިޝަލުން ގުރު ނަގަން ހަމަޖައްސައިފި އެވެ.

ގުޅީފަޅު އަދި ގިރާވަރުފަޅުން ގޯތި ލިބުނު މީހުންނަށް ޕްލޮޓުތައް ހަމަޖައްސައި ކުރިން އޮތީ ގޯތީގެ ރަޖިސްޓްރީ ވެސް ދީފަ އެވެ. އެކަމަކު، މި ސަރުކާރުން ވަނީ އެ ދެ ރަށުގެ ލޭންޑް ޔޫސް ޕްލޭންއަށް ބަދަލު ގެނެސްފަ އެވެ. ގޯތި ލިބުނު މީހުންނަށް ލިބޭ ޕްލޮޓު އަލުން ކަނޑައަޅަންޖެހެނީ އެހެންވެ އެވެ.

ގުރު ނެގުމުގެ މަސައްކަތް މިހާރު ވަނީ ފަށައިފަ އެވެ. ޕްލޮޓު ނަންބަރު ޖަހާފައި ހުރި ކަރުދާސްކޮޅުތައް އަޅާފައި ހުރީ ބިއްލޫރި ފޮއްޓެއްގެ ތެރެއަށެވެ. އެ ފޮށީގެ ތެރެއިން ކަރުދާސްކޮޅު ނަގާނީ ސަރުކާރުގެ އޮފިޝަލެކެވެ. ގޯތި ލިބޭ މީހުން ތިބެންޖެހެނީ ބަލާށެވެ.

ފޮށިން ކަރުދާސްކޮޅު ނަގާނީ ސަރުކާރުގެ އޮފިޝަލުން ކަމެއް ކުރިން ހާމައެއް ނުކުރެ އެވެ. އެހެންވެ ގުރު ނަގަން މިއަދު ގޮސް ތިބި ބައެއް މީހުން ވަނީ އެކަމާ ނުރުހުން ފާޅުކޮށްފަ އެވެ. އެކަމާ ހިތްހަމަނުޖެހުމުން އޮފިޝަލުން ބުނަނީ، ގުރު ނެގުމުގައި އެއްވެސް މައްސަލައެއް ނޯންނާނެ ކަމަށާއި ޓީވީއިން ވަގުތުން އެ މަންޒަރު ބްރޯޑްކާސްޓު ކުރާނެ ކަމަށެވެ.

ގުޅީފަޅުގެ ލޭންޑް ޔޫސް ޕްލޭން މި ސަރުކާރުން ތިން ފަހަރަކު ބަދަލު ކުރި އެވެ. އެންމެ ފަހުން ލޭންޑް ޔޫސް ޕްލޭނަށް ބަދަލު ގެނައީ ގުރު ނަގަން 24 ގަޑިއިރަށް ވެފައި ހުއްޓައި އިއްޔެ އެވެ.

ބިންވެރިޔާ ސްކީމުގެ ދަށުން މިދިޔަ ސަރުކާރުގައި މާލެ ރައްޔިތުންނަށް 9،003 ގޯތި ދޫކުރި އެވެ. ބިންވެރިޔާ ސްކީމުން ދޫކުރި ގޯތިތައް ހުންނަނީ ހުޅުމާލޭ އާއި ގުޅީފަޅާއި ގިރާވަރު ފަޅުންނެވެ. އެއީ ހުޅުމާލެއިން ދޫކުރާ 1351 ގޯއްޗާއި ގުޅީފަޅުން ދޫކުރާ 2219 ގޯއްޗާއި ގިރާވަރުފަޅުން ދޫކުރާ 5433 ގޯއްޗެވެ.